Read Batak Simalungun HOSEA 9 Bible Online

HOSEA 9 - Batak Simalungun bible

HOSEA 9

¹“Ulang ma marmegah-megah, ale Israel! Ulang ma marolob-olob songon bangsa-bangsa na legan, ai marriah-riahi do ho, marbalik humbani Naibatamu. Marosuh do ho manjalo upah parriah-riahon bani sagala pardogeian. [67]

²Seng be parmudu-muduon ni pardogeian atap kilang anggur sidea, anjaha anggur pe manipu sidea do.

³Lang be i tanoh ni Jahowa sidea marianan, tapi maningon mulak do Efraim hu Masir, anjaha panganon ni sidea do na mabutak i Assur. [68]

⁴Seng be mambere galangan anggur sidea bani Jahowa, anjaha seng be pasirsirhon galangan sisayaton sidea Bani; ruti ni sidea ai gabe ruti pusok ni uhur ma, sagala na mangankon ai gabe butak ma; ai bani sidea sandiri mando rutini ai, seng masuk be ai hu rumah ni Jahowa. [69]

⁵Aha ma sibahenonnima bani ari pesta ampa bani ari raya ni Jahowa?

⁶Ai tonggor ma, na laho ma sidea hu Assur; patumpu-tumpuon ni Masir ma sidea, anjaha Mempis do na mananom sidea. Duri-duri do na manrungkub arta pirak ni sidea ai, anjaha suga-suga do na martubuhan i lampolampo ni sidea. [70]

⁷Roh ma ari uhum, roh ma ari pambalason; ahapkonon ni Israel ma ai. Nimu ma, ʻNa oto do nabi ai, na podoan do dalahi sipartonduy ai, halani buei ni hajahatonmu ampa panlawanonmu.ʼ

⁸Manggompangi do Efraim bani lampolampo ni nabi ai; siding do itaon bani sagala dalanni; ilawan do ia age i rumah ni Naibatani.” [71]

⁹Bagas tumang do ipabutak sidea dirini, songon na masa i Gibea; halani ai ingaton-Ni do hajahaton ni sidea ai, balaskonon-Ni do dousa ni sidea ai. [72]

¹⁰“Songon buah ni anggur i halimisan, sonai do jumpah Ahu Israel; songon buah mula-mula bani hayu ara, sonai do Huidah ompungnima. Hape laho do sidea hu Baal-Peor, anjaha iondoskon dirini bani Baal, anjaha gabe hagigi do sidea songon sisombahon na hinarosuhkon ni sidea ai. [73]

¹¹Hamuliaon ni Efraim maningon habang do ai songon manuk-manuk; seng tubuhan tuah, seng boratan rumah anjaha seng solat be.

¹²Age pe pagodang-godangkon anak sidea, popor do sidea bahenon-Ku, gabe seng dong be jolma. Tongon, magou ma sidea, anggo surut Ahu humbani sidea.”

¹³Sanggah na huidah Efraim, usih do ai bani Tirus, sangap isuan; tapi sonari maningon boanon ni Efraim ma anakni hu panayatan.

¹⁴Bere Ham ma bani sidea, ale Jahowa! Aha do na sihol bereon-Mu? Bere Ham ma bani sidea harambuyan na lambang ampa bagod-bagod na horah!

¹⁵I Gilgal do junjun sagala hajahaton ni sidea, tongon, ijai do mulai Ahu magigi mangidah sidea. Halani jahat ni pambahen ni sidea usiron-Ku do sidea hun rumah-Ku. Seng be holong uhur-Hu mangidah sidea, panggeori do sagala panrajai ni sidea. [74]

¹⁶Hona bogbog do Efraim, melus do uratni, seng marbuah be. Porini pe tubuhan anak sidea bunuhon-Ku do boras ni boltok ni sidea na pinarsinta ni sidea ai.

¹⁷Ambukkonon ni Naibatangku do sidea, ai seng itangihon sidea Ia; gabe madou-adou mando sidea i tongah-tongah ni bangsa-bangsa.