Read Batak Simalungun AMOS 2 Bible Online

AMOS 2 - Batak Simalungun bible

AMOS 2

¹Sonon do hata ni Jahowa, “Halani na tolu panlanggaron ni Moab ampa halani na ompat ai seng pasuruton-Ku uhum ai, halani na tinutunganni ai holiholi ni raja Edom bahen hapur. (Jes. 15; Jer. 48)

²Jadi tongoson-Ku ma apuy hubani Moab, gabe panganonni ma bois benteng-benteng ni Keriot, anjaha Moab matei ma ibagas hageoron, i tongah-tongah ni surak-surak ampa sora ni tarompit.

³Anjaha siapkonon-Ku ma panrajai hun tongah-tongahni, anjaha bunuhon-Ku ma kopala-kopalani rap pakonsi,” nini Jahowa. [11]

⁴Sonon do hata ni Jahowa, “Halani na tolu panlanggaron ni Juda ampa halani na ompat ai seng pasuruton-Ku uhum ai, ai iambungkon sidea do titah ni Jahowa, anjaha seng idalankon aturan-Ni, tapi sisombahon parladung ni sidea ai do pakahouhon sidea, ai ma na niirikkon ni ompung ni sidea homa;

⁵halani ai tongoson-Ku do apuy hubani Juda, gabe panganonni ma bois benteng-benteng ni Jerusalem.”

⁶Sonon do hata ni Jahowa, “Halani na tolu panlanggaron ni Israel ampa halani na ompat ai seng pasuruton-Ku uhum ai, ai ijualhon sidea do parpintor marhalanihon pirak, ampa halak na miskin marhalanihon sipatu sapasang. [12]

⁷Idogei-dogei sidea do ulu ni halak na maetek ibagas orbuk ni tanoh, anjaha iusir do halak na masombuh. Rap laho do anak ampa bapani marayak boru jalang, gabe butak goran-Ku na mapansing in. [13]

⁸Ipatibal sidea do dirini i lambung ni sagala anjapanjap, i atas ni hiou gadeian, anjaha isobur anggur ni halak na hona donda ibagas rumah ni naibata ni sidea. [14]

⁹Ahu do namin na maniapkon halak Amori i lobei ni sidea, na songon gijang ni hayu ares gijangni anjaha songon jajabi Gogohni, Ahu do parsedahon buahni i atas ampa uratni i toruh. [15]

¹⁰Ahu do homa na mangarahkon hanima luar hun tanoh Masir, anjaha Huiring-iring do hanima ompat puluh tahun i halimisan, laho manean tanoh ni halak Amori. [16]

¹¹Anjaha Ahu do na pabangkitkon deba humbani anaknima gabe nabi, anjaha deba humbani parananima gabe halak Nasir. Ai lang tongon do sonai, alo nasiam halak Israel?” nini Jahowa. [17]

¹²“Hape ipainumkon hanima do anggur bani halak Nasir, anjaha iparentahkon hanima bani nabi, ʻSeng bulih hanima manjahai.ʼ [18]

¹³Tonggor ma, odohkonon-Ku ma hanima bani ianannima, songon pangodohkon ni gareta, na gok radean.

¹⁴Seng marguna ijai halintunon bani halak na lingkat, seng tarunsagahkon halak pargogoh gogohni, anjaha seng tarpaluah halak na borani hosahni; [19]

¹⁵halak parsior pe seng tahan jongjong, anjaha halak na lingkat mardalan seng tarpaluahisi dirini, anjaha sonai homa siajak huda seng tarpaluahisi hosahni.

¹⁶Age paruhur na pag i tongah-tongah ni halak na borani, maningon talanjang maporus bani ari ai,” nini Jahowa.