Read Batak Simalungun AMOS 3 Bible Online

AMOS 3 - Batak Simalungun bible

AMOS 3

¹Tangar nasiam ma hata on na hinatahon ni Jahowa pasal nasiam, alo nasiam halak Israel, pasal ganup bangsa in, na huarahkon luar hun tanoh Masir,

²“Pitah hanima do na Hutandai humbani sagala bangsa na i tanoh on, halani ai balaskonon-Ku ma bannima sagala hajahatonnima ai. [20]

³Mintor tumaram ma odor dua halak mardalan anggo seng parlobei mardos ni uhur sidea?

⁴Mintor tumaram ma maraum singa ibagas harangan anggo seng dong sorohanni? Mintor tumaram ma pamalingon ni anak ni singa sorani humbagas liangni, anggo seng dong na jumpahsi?

⁵Mintor tumaram ma madabuh manuk-manuk bani tirangkap i tanoh, anggo seng dong sigiutini? Mintor tumaram ma tolkas siding ai hun tanoh, anggo seng dong dapotsi?

⁶Mintor tumaram ma hona sompul tarompit ibagas huta, lang gobir halak? Mintor tumaram ma masa parmaraan ibagas huta, na so binahen ni Jahowa? [21]

⁷Tongon tene, seng dong ipamasa Tuhan Jahowa, anggo lang palobei ipatalar rusia-Ni bani nabi, juakjuak-Ni ai.

⁸Maraum singa, ise na so mabiar? Marsahap Tuhan Jahowa, ise ma na so manjahai?

⁹Pabogeihon nasiam ma hubani benteng-benteng na i Assur ampa hubani benteng-benteng na i tanoh Masir, anjaha hatahon ma, “Martumpu ma nasiam hu atas dolog ni Samaria, anjaha idah nasiam ma hageoron bolon na ibagas ai, ampa pandorunon na i tongah-tongahni.

¹⁰Seng ibotoh sidea be mambahen na pintor,” nini Jahowa; “Ipajunjun sidea do panamunon ampa hagedukon ibagas benteng-benteng ni sidea.”

¹¹Halani ai sonon do nini Tuhan Jahowa, “Munsuh ma manginggoti tanoh on, anjaha patoruhonni ma humbam partahananmu, anjaha ayobonni ma benteng-bentengmu.”

¹²Sonon do hata ni Jahowa, “Songon parpaluah ni parmahan hun babah ni singa dua hae-hae barang sangkibul pinggol, sonai do paluahon halak Israel, na hundul i suhi-suhi ni podoman ampa i atas ni tutup podoman na lambut. [22]

¹³Tangar anjaha saksihon hanima ma in dompak rumah ni si Jakob,“ nini Tuhan Jahowa, Naibata Zebaot.

¹⁴“Bani ari panguhum-Hu bani Israel halani hajahaton ni sidea ai, uhumon-Ku ma anjapanjap ni Betel, ponggolhonon-Ku ma ijai tanduk ni anjapanjap ai anjaha dabuh hu tanoh. [23]

¹⁵Parsedaon-Ku ma rumah musim borgoh ampa rumah musim milas, magou ma rumah gading, anjaha masabkonon-Ku ma rumah-rumah bolon ai,” nini Jahowa. [24]