Read Batak Simalungun AMOS 5 Bible Online

AMOS 5 - Batak Simalungun bible

AMOS 5

¹“Tangar hanima ma hata on, na Hutangiskon pasal hanima, ale ginompar ni Israel.

²Domma dabuh boru Israel, seng tarjongjongkonsi be; jorgong tibal ia i tanohni, seng dong na pajongjongkonsi.

³Ai sonon do hata ni Tuhan Jahowa, ʻHuta na pabingkatkon saribu, tading hunjai saratus, na pabingkatkon saratus, tading hunjai sapuluh bani ginompar ni Israel.ʼ ” [33]

⁴Ai sonon do hata ni Jahowa bani ginompar ni Israel, “Pindahi Ahu, ase manggoluh hanima! [34]

⁵Tapi ulang ma pindahi Betel, anjaha ulang ma laho hu Gilgal barang mandipar hanima hu Berseba; ai maningon buangkononkon do Gilgal, anjaha gabe na lang do Betel. [35]

⁶Pindahi nasiam ma Jahowa, ase manggoluh nasiam, ase ulang idorab rumah ni si Josep marhasoman apuy, bois ipangan, anjaha sahalak pe lang adong na mangintopi i Betel.

⁷E nasiam na pagolingkon uhum gabe pogu, anjaha na mangambukkon hapintoron hu tanoh! [36]

⁸Ia, sijadihon bintang pariama ampa bintang sidongdong, na paubahkon na lotir gabe sogod ni ari, na pagolapkon ari gabe borngin, na mandilo bah ni laut laho manguseihon ai hu atas tanoh, Jahowa do goran-Ni. [37]

⁹Ia do na parohkon hasedaon bani halak na gogoh, gabe sogop hasiapon bani benteng.”

¹⁰Ihasogamkon sidea do sidalankon uhum i horbangan, anjaha magigi sidea mangidah halak sihatahon na sintong. [38]

¹¹Halani ai, ibahen na idogei-dogei hanima halak na musil, anjaha iporoh hanima humbani sidea sibere-bere gandum, age pe ipauli hanima rumah humbani batu na binarbar seng anjai ianannima ai; sonai homa, age pe isuani hanima pohon anggur na dear-dear, seng inumonnima anggurni. [39]

¹²Ai Hubotoh do buei ni panlanggaronnima, ampa sonaha banggal ni dousanima manosak halak parpintor, manjalo sisip, anjaha mangodohkon halak na musil i paruhuman.

¹³Halani ai sip ma halak paruhur bani panorang on; ai panorang na jahat do on. [40]

¹⁴Pindahi nasiam ma na madear, ulang ma na jahat, ase manggoluh nasiam; ase tongon ma Jahowa, Naibata Zebaot hasoman nasiam, songon na hinatahon nasiam. [41]

¹⁵Hagigihon nasiam ma na jahat, haholongi nasiam ma na madear, anjaha pajongjong nasiam ma uhum i horbangan, andohar marpangulaki uhur ni Jahowa, Naibata Zebaot mangidah simasima ni si Josep. [42]

¹⁶Halani ai sonon do hata ni Jahowa, Naibata Zebaot, Tuhan In, “Bani haganup alaman masa tangis-tangis; anjaha bani haganup dalan hatahonon ni sidea, ʻAih, aih!ʼ Diloon ni sidea do parjuma-juma laho manangisi, ampa na pandei tangis laho manjojori.

¹⁷Anjaha bani haganup pohon anggur masa doruh-doruh, anggo montas Ahu hun tongah-tongahnima,” nini Jahowa!

¹⁸“Bursik ma hanima na mangkasiholi ari ni Jahowa! Ai aha do ari ai bannima? Hagolapan do ai, seng haliharon. [43]

¹⁹Songon sada halak na bansah humbani singa, hape roh gipul manjumpahkonsi; barang masuk hu rumah anjaha itungkolhon tanganni bani dingding, hape roh ulog mamagutsi. [44]

²⁰Ai halotiron do tongon ari ni Jahowa, sedo haliharon, hagolapon do, seng dong haliharon ibagas.”

²¹“Sogam anjaha magigi do uhur-Hu mangidah ari rayanima, anjaha seng iharosuhkon uhur-Hu tumpuannima. [45]

²²Age pe igalangkon hanima Bangku galangan situtungon ampa galangan sipanganon, seng marosuh Ahu bani ai, anjaha galangan pardearan humbani pinahan na pinamombur pe, seng ra Ahu mangkawahkon ai. [46]

²³Padaoh hun Bangku hageoron ni dodingnima, anjaha logu ni husapinima pe seng marosuh Ahu manangar ai.

²⁴Tapi mabaor ma bahen hanima uhum songon bah, anjaha hapintoron songon bah na totap marbanggal.

²⁵Ai adong do iboan hanima galangan sisayaton ampa sibere-bere Bangku i halimisan sadokah siompat puluh tahun ai, ale ginompar ni Israel? [47]

²⁶Halani ai usungonnima ma Sakut, rajanima ai, ampa Kiwun, bintang ni naibatanima ai, gana-gananima, na binahennima bannima. [48]

²⁷Jadi toguon-Ku ma hanima tarbuang, daoh hu dipar ni Damaskus,” nini Jahowa, na margoran Naibata Zebaot. [49]