Read Batak Simalungun AMOS 6 Bible Online

AMOS 6 - Batak Simalungun bible

AMOS 6

¹Bursik ma halak na so marpanarian i Sion, ampa halak na mangahapkon aman i Dolog Samaria, ai ma halak na sangap i tongah-tongah ni bangsa sibetengan, tuan-tuan ni ginompar ni Israel. [50]

²Mandipar ma nasiam manorih hu Kalne, dob ai laho ma nasiam hu Hamat, huta na bolon ai; dob ai tuad ma nasiam hu Gat, huta ni halak Palistim. Mintor dearan ma sidea ase harajaon on? Atap bolagan ma tanoh ni sidea ase tanoh nasiam? [51]

³E nasiam na mangagan daoh ari hamagouan ai, hape lambin ipadohor nasiam do tahun hasedaon ai;

⁴nasiam na martibalan i atas ni podoman gading, na patordangkon diri i atas ni podoman-podomanni, na mangankon biribiri humbani hulanan ampa anak ni lombu humbani harang; [52]

⁵nasiam na mandoding-doding pairik-irik sora ni husapi ampa na padomu-domu doding songon si Daud; [53]

⁶nasiam na manginum anggur simantinan ampa na mamminaki diri marhitei minak sidearan, tapi na so mangkaruhon hasedaon ni si Josep.

⁷Halani ai maningon sidea ma na parlobei tarbuang humbani na tarbuang, anjaha maronti ma surak-surak ni halak na pasonang-sonangkon dirini.

⁸Domma pala marbulawan Jahowa bani diri-Ni, nini Jahowa Naibata Zebaot do, “Magigi do Ahu mangidah gijang ni uhur ni Jakob, anjaha sogam do uhur-Hu bani benteng-bentengni, anjaha palopason-Ku ma tarulang huta ai ampa ganup pangisini.

⁹Anjaha porini tading ope sapuluh halak ibagas rumah, maningon matei do sidea.

¹⁰Jadi anggo dong sindohorni atap na mananomsi sihol mambuatsi, laho padaratkon holiholi ai hun rumah ai, jadi hatahononni ma hubani halak na i kamar parbagas ni rumah ai, ʻAdong ope atap ise rapkon ho?ʼ Jadi hatahononni ma, ʻIse pe lang!ʼ Tapi hatahononni ma, ʻSip! Seng bulih diloon goran ni Jahowa.ʼ [54]

¹¹Ai tonggor ma, Jahowa do na mamarentahkon, gabe iropuki halak rumah na bolon, anjaha itahai rumah na etek-etek.

¹²Mintor mardingkal ma huda i atas dolog batu, barang adong ma na maninggala laut marhitei lombu? Tapi ipaubah hanima do hasintongan gabe rasun ampa buah ni hapintoron gabe pogu. [55]

¹³Hanima na mangkamalaskon Lodebar, na mangkatahon, ʻAi lang domma italuhon hita banta Karnaim marhitei gogohta?ʼ [56]

¹⁴Tonggor ma, puhoan-Ku ma sada bangsa ase iimbang hanima, alo ginompar ni Israel,” nini Jahowa, Naibata Zebaot, “jadi sosakonni ma hanima olat ni dalan laho hu Hamat das hu bah na i Araba.” [57]