Read Batak Simalungun AMOS 7 Bible Online

AMOS 7 - Batak Simalungun bible

AMOS 7

¹Sonon do ipataridahkon Tuhan Jahowa bangku, “Tonggor ma, manjadihon balang do Ia bani mulani martumbor poyon-poyon, anjaha tonggor ma, sagak ni panabian ni raja in do ai.”

²Jadi dob bois igagati suan-suanan ni tanoh ai, ningku ma, “Ham Tuhan Jahowa, marpangulaki ma uhur-Mu! Sonaha ma partahan ni Jakob jongjong? Etek tumang do ia.”

³Jadi marpangulaki ma uhur ni Jahowa pasal ai. “Seng pala saud be in,” nini Jahowa.

⁴Sonon do ipataridahkon Jahowa bangku: Tonggor ma, idilo Tuhan Jahowa do apuy laho manguhum, domma pala iboiskon luhung bagas ai, anjaha ipangan homa tanoh ai.

⁵Jadi ningku ma, Ham Tuhan Jahowa, “Mahua parontihon Ham ma in! Sonaha ma partahan ni Jakob jongjong! Etek tumang do ia.”

⁶Jadi marpangulaki ma uhur ni Jahowa pasal ai. “On pe seng pala saud be,” nini Tuhan Naibata.

⁷Sonon do ipataridahkon Jahowa bangku: Tonggor ma, jongjong do Tuhan in i atas ni sada tembok, manjolom batu baragu ibagas tanganni. [58]

⁸Dob ai nini Jahowa ma hu bangku, “Aha do na nididahmin Amos?” Ningku ma, “Sada batu baragu.” Dob ai nini Tuhan ma, “Tonggor ma, Hupagistang do batu baragu i tongah-tongah ni bangsang-Ku, Israel. Seng marpangulaki be uhur-Hu mangidahsi. [59]

⁹Maningon tarulang ma paturuton tanoh dolog ni si Isak, anjaha sedaonkon rumah panumbahan ni Israel, anjaha Ahu jongjong mangimbang ginompar ni si Jerobeam marhitei podang.” [60]

¹⁰Jadi isuruh si Amasia, malim ni Betel ma suruhanni hu bani si Jerobeam, raja ni Israel, nini ma, “Martahi-tahi do si Amos dompak ham i tongah-tongah ni ginompar ni Israel, seng tartaron tanoh in hata-hatani ganup. [61]

¹¹Ai sonon do nini si Amos, ʻManingon matei si Jerobeam marhitei podang, anjaha maningon tarbuang Israel daoh hun tanohni.ʼ ”

¹²Dob ai nini si Amasia ma dompak si Amos, “E, parpanonggoran, laho ma ho, maporus hu tanoh Juda, anjaha ijai ma ho mangan ruti, anjaha ijai ma ho manjahai! [62]

¹³Ulang ma nunuti manjahai anggo i Betel, ai huta hapansingon ni raja in do in, anjaha rumah panumbahan harajaon.” [63]

¹⁴Dob ai ibalosi si Amos ma si Amasia, “Seng nabi namin ahu barang anak ni nabi, tapi parmahan do ahu anjaha sipaturei-turei hayu ara. [64]

¹⁵Tapi ibuat Jahowa do ahu humbani na mangalai biribiri, anjaha ihatahon Jahowa hu bangku, ʻLaho ne, manjahai dompak bangsang-Ku Israel!ʼ [65]

¹⁶On pe, tangihon ma hata ni Jahowa. Nimu, ʻUlang ho manjahai dompak Israel, anjaha ulang hatahon hatamu dompak ginompar ni si Isak.ʼ [66]

¹⁷Halani ai, sonon do hata ni Jahowa, ʻGabe boru jalang ma parinangonmu ibagas huta, anjaha anakmu pakon borumu rasei ma ibahen podang, anjaha bagion tanohmu marhitei tali sibar-sibar; anjaha ho sandiri matei i tanoh na mabutak, anjaha Israel maningon tarbuang daoh hun tanohni.ʼ ” [67]