Read Batak Simalungun AMOS 8 Bible Online

AMOS 8 - Batak Simalungun bible

AMOS 8

¹Sonon do ipataridahkon Jahowa hu bangku: Tonggor ma, sada hirang marisi buah na dob mabei.

²Dob ai nini ma, “Aha do na nididahmu Amos?” Jadi ningku ma, “Sada tapongan marisi buah na dob mabei.” Dob ai nini Jahowa ma dompak ahu, “Domma jumpah ujung ni bangsang-Ku, Israel, seng marpangulaki be uhur-Hu mangidahsi. [68]

³Gabe tangis-tangis ma pandoding naboru na i rumah panumbahan bani panorang ai,” nini Tuhan Jahowa, “radag ma holi bangkei bani ganup ianan, panggijingkononkon ma ai sip-sip.” [69]

⁴Tangar ma on, nasiam na mandogei-dogei na musil anjaha na mangodoh-odoh halak na masombuh i tanoh on, [70]

⁵na mangkatahon, “Antigan pe salpu poltak ni bulan, ase manjual omei hita? Antigan salpu homa ari Sabat, ase boi aruhononta omeita laho manjual ai, ase boi paetek-etekonta tumba anjaha panaikonta harga, anjaha boi hita mandalankon sipaoto-oto marhitei timbangan palsu, [71]

⁶ase boi bolionta halak na musil marhitei pirak ampa halak na masombuh marhitei sapasang sipatu, sonai homa manjualhon lapung ni gandum?” [72]

⁷Domma pala marbulawan Jahowa bani hamuliaon ni si Jakob, “Tongon, seng anjai halupahonon-Ku be pambahenan ni sidea ai ganup. [73]

⁸Mintor lang ma dugur tanoh on halani ai, anjaha marpusok ni uhur sagala pangisini? Mintor lang ma sampur ganupan ai songon Bah Nil anjaha ipalindak-lindak, dob ai surut use songon Bah Masir? [74]

⁹Bani panorang ai,” nini Tuhan Jahowa, “bahenon-Ku ma mata ni ari sundut tongah ari, anjaha manggolapi tanoh on arian. [75]

¹⁰Paubahon-Ku ma ari rayanima gabe pusok ni uhur, anjaha ganup doding-dodingnima gabe tangis-tangis. Nahkonon-Ku ma guni bani binongeinima ampa hapalpalon bani ganup ulu. Bahenon-Ku ma ai songon pusok ni uhur bani parmatei ni anak sasada, anjaha ujung ni ai songon ari na gok hapaeton.” [76]

¹¹“Tonggor ma, na roh ma arini,” nini Tuhan Jahowa, “tongoson-Ku ma lohei hu tanoh on, sedo lohei bani ruti barang horah bani bah, tapi bani hata ni Jahowa do, sihol tangaronni namin.

¹²Jadi madou-adou ma sidea hun laut na sada hu laut na sada nari, anjaha hun utara hu hapoltakan; mardalani sidea hujai-hujon, laho mangindahi hata ni Jahowa, tapi seng anjai jumpah sidea ai. [77]

¹³Bani ari na sada ai mandatei ma anak boru na majenges ampa anak parana halani horahan. [78]

¹⁴Sidea na marbulawan bani Asera ni Samaria, anjaha na mangkatahon, ʻSongon sintongni manggoluh naibatamu, ale Dan, anjaha songon naibata, parlingodanmu manggoluh do, ale Barseba, maningon ragei do sidea holi, anjaha seng be tarjongjongkonsi.ʼ ” [79]