Read Batak Simalungun AMOS 9 Bible Online

AMOS 9 - Batak Simalungun bible

AMOS 9

¹Huidah do Tuhan in jongjong i atas anjapanjap, jadi nini ma, “Palu ma ulu ni tiang in, ase dugur molmolan. Ropukan-Ku ma ulu ni sidea ganup, anjaha bunuhon-Ku do simasima ni sidea marhitei podang, sada pe lang humbani sidea na maluah, sada pe lang humbani sidea na maporus, na boi pabansah dirini. [80]

²Porini pe manrutas sidea das hu nagori toruh, alopon ni tangan-Ku do sidea hunjai; anjaha porini pe manangkih sidea das hu nagori atas, paturunon-Ku do sidea hunjai. [81]

³Porini pe marponop sidea i pakpak ni Karmel, pindahan-Ku do sidea hujai, anjaha boanon-Ku sidea mulak hunjai; porini pe marponop sidea hun lobei-Hu ibagas luhung ni laut, parentahkonon-Ku do ijai naga mangkarat sidea.

⁴Porini pe laho sidea hu habungan i lobei ni munsuh ni sidea, parentahkonon-Ku do ijai podang mamunuhi sidea, anjaha dompakkonon-Ku do matang-Ku bani sidea laho mangagou, seng laho padearhon.” [82]

⁵Tuhan Naibata Zebaot na manjamah tanoh on gabe malala, anjaha marhoru ganup pangisini, gabe sampur songon Bah Nil ganup tanoh in, anjaha surut use songon Bah Masir; [83]

⁶Ia na paulihon kamar pardatasni i nagori atas anjaha na pajongjongkon langit-langitni i atas tanoh on, Ia na mandilo bah ni laut, anjaha iuseihon use hu atas tanoh on, Jahowa do Goran-Ni. [84]

⁷“Ai lang songon halak Etiopia do hanima Bangku, ale halak Israel?” nini Jahowa. “Ai lang Ahu do na mangarahkon halak Israel luar hun tanoh Masir, anjaha halak Palistim hun Kaptor, anjaha halak Aram hun Kir? [85]

⁸Tonggor ma, sai kawah do mata ni Tuhan Jahowa mangimbang harajaon sipardousa in, anjaha siapkonon-Ku do in hun datas tanoh on; tapi seng siap tumang bahenon-Ku anggo ginompar ni si Jakob,” nini Jahowa. [86]

⁹“Tonggor ma, Ahu mamarentahkon anjaha manogu ginompar ni Israel i tongah-tongah ni ganup bangsa, songon halak na marsege marhitei anduri, tapi sangkamata pe lang dong na porngis maperper hu tanoh.

¹⁰Maningon matei do marhitei podang sagala pardousa hun tongah-tongah ni bangsang-Ku, sagala na mangkatahon, ʻSeng tumaram das barang mangonai banta hamagouan ai.ʼ [87]

¹¹ Bani ari ai pajongjongon-Ku ma use lampolampo ni si Daud na dob mareong in, paulion-Ku ma tembokni na mangkabungbung, anjaha umbanon-Ku sagala na mangkareong, paulion-Ku do use usih songon na bani mula-mulani, [88]

¹²ase sidea manean simasima ni Edom ampa haganup bangsa na targoran bani goran-Ku,” nini Jahowa, na mandalankon sonai.

¹³“Tonggor ma, na roh ma arini,” nini Jahowa, “marsijaloan ma paninggala pakon siparpariama, parkilang pakon sipanuan, mantektekkon anggur sagala dolog, anjaha linir dolog-dolog ganupan. [89]

¹⁴Pasuangon-Ku ma use hadearon ni bangsang-Ku halak Israel, ase ipauli use huta na dob maseda ai lanjar iiani, ase ipungkah use pohon anggur lanjar inumonni anggurni, anjaha ibahen jumani lanjar daionni gogohni. [90]

¹⁵Suankonon-Ku ma sidea i tanoh ni sidea, anjaha seng be orbaton-Ku sidea hun tanoh ni sidea, na dob hubere bani sidea,” nini Jahowa, Naibatamu. [91]