Read Batak Simalungun OBAJA 1 Bible Online

OBAJA 1 - Batak Simalungun bible

OBAJA 1

¹Panonggoran ni si Obaja. Sonon do hata ni Tuhan Jahowa pasal Edom, domma ibogei hanami sada barita humbani Jahowa, anjaha domma isuruh sada utusan hu tongah-tongah ni bangsa-bangsa, eta, bingkat ma hita marmunsuh dompaksi.

²“Tonggor ma, paetekon-Ku ma ho i tongah-tongah ni bangsa-bangsa, mahiri tumang ma ho.

³Gijang ni uhur do na paoto-otohon ho, ho na marianan ibagas liang ni batu, na gijang pariananmu, ho na mangkatahon ibagas uhurmu, ʻIse ma na boi manjombahon ahu hu tanoh?ʼ [1]

⁴Age pe gijang ho mayap-ayap songon haluhuy, anjaha asarmu ibahen ho i holangkolang ni bintang, sai dabuhonon-Ku do ho hunjai,” nini Jahowa.

⁵“Anggo roh panangko bam, barang sipanrampok borngin-borngin tontu siap ma ho! Ai lang ansa na sungkup bani sidea do tangkoonni? Anggo roh sitangko anggur marayak ho, ai lang tading ope turiang bahenon ni sidea?

⁶Tapi sonaha do in parsursar ni Esau, hona sungkapan do arta ponopanni!

⁷Das hu parbalogan ijuar-juar ganup halak sisapanriahanmu do ho, ioto-otoi anjaha ipatunduk hasomanmu do ho, hasoman hatengeran ni uhurmu do manaon tirangkap bam. Seng dong pangarusion bani.

⁸Nai ma, bani ari ai,” nini Jahowa, “siapkonon-Ku ma halak na pentar hun Edom ampa pangarusion hun dolog ni si Esau. [2]

⁹Bajoraon ma puanglimamu ale Teman, ase bois ganup hona bunuh dalahi hun dolog ni si Esau. [3]

¹⁰Halani hajahatonmu bani anggimu si Jakob, maningon rungkubon ni habadoron ma ho, anjaha siapkononkon ho ronsi sadokah ni dokahni. [4]

¹¹Ijia, sanggah na jongjong ai ho dohor hujai, sanggah na itangkapi halak na legan ai balani, anjaha imasuki parnagori na legan ai horbanganni, anjaha mandabuh ruji-ruji sidea pasal Jerusalem, dihut do ho ijai sada humbani sidea ai.

¹²Tapi seng patut namin marpuas-puas ho pasal ari ni anggimu bani ari hamagouanni; seng patut namin marmalas ni uhur ho mangidah halak Juda bani parbois ni sidea, anjaha seng patut namin mangoga-oga ho bani ari hasosakan ni sidea. [5]

¹³Seng patut namin masukanmu horbangan ni bangsang-Ku bani ari parbois ni sidea; seng patut namin marpuas-puas ho bani ari hamagouanni; anjaha seng bulih namin padurduronmu tanganmu mambuat ugas-ugasni bani ari parsiapni.

¹⁴Seng bulih namin jongjong ho bani sirpang ni dalan, laho manraseihon na maporus humbani sidea; seng bulih namin tahihononmu sagala na maluah humbani sidea bani ari hasosakanni. [6]

¹⁵Dohor mando ari ni Jahowa bani ganup bangsa-bangsa. Songon na dob binahenmu, sonai ma bahenon-Ku bam, mulak bani ulumu ma pambahenanmai. [7]

¹⁶Ai songon parminumnima i atas dolog hapansingon-Ku, sonai ma bangsa-bangsa inggot minum, minum ma tongon sidea anjaha munjei-unjei; anjaha adong pe sidea, hira na so adong hinan do. [8]

¹⁷Tapi anggo i atas ni Dolog Sion, adong do holi haluahon anjaha gabe pansing do ai, anjaha teanon ni ginompar ni si Jakob do use parbagianan ni sidea ai. [9]

¹⁸Dob ai gabe apuy ma ginompar ni si Jakob, anjaha gabe dilah ni apuy ginompar ni si Josep, tapi gabe anggala ma ginompar ni si Esau; jadi nahitan ni sidea ma ai anjaha monsongkononni, anjaha seng dong be simasima ni ginompar ni si Esau, ai Jahowa do mangkatahon ai. [10]

¹⁹Jadi teanon ni sidea ma tanoh dangsina, ai ma dolog ni si Esau ampa pamah ni halak Palistim; teanon ni sidea do homa tanoh ni Efraim ampa tanoh ni Samaria; tapi si Benjamin do manean Gilead.

²⁰Anjaha na tarbuang humbani halak Israel do manean tanoh ni halak Kanaan das hu Sarpat, anjaha halak na tarbuang hun Jerusalem, na marianan i Separat, sidea do manean huta na i tanoh dangsina.

²¹Anjaha tangkog ma sipaluah hu Dolog Sion, laho manguhum dolog ni si Esau, jadi ondos bani Jahowa ma harajaon ai.