Read Batak Simalungun JONA 3 Bible Online

JONA 3 - Batak Simalungun bible

JONA 3

¹Dob ai roh ma use hata ni Jahowa paduahalihon hubani si Jona sonon,

²“Bingkat ma ho laho hu huta Ninive, huta na bolon ai, anjaha dilohon ma ijai hata sipatugahon-Ku hubam.” [15]

³Jadi bingkat ma si Jona laho hu Ninive domu hubani hata ni Jahowa. Huta na bolon tumang do Ninive ai, tolu ari mardalan bolagni. [16]

⁴Dob ai ipungkah si Jona ma mardalan ibagas huta ai parsadarian. Idilohon ma, “Ompat puluh ari nari mando, jadi marongrong ma Ninive!”

⁵Jadi porsaya ma halak na i Ninive bani Naibata; itingtingkon sidea ma ase marpuasa, jadi marhiou guni bei ma sidea, humbani halak na magodang ronsi na etek-etek. [17]

⁶Dob ai das ma barita ai bani raja ni Ninive. Jongjong ma ia humbani paratasni, itanggali ma pakeianni, isorungkon ma baju guni anjaha hundul ma ia bani abuan.

⁷Dob ai isuruh raja ai ma na martingting paboahon i Ninive, “Songon na pinarentahkon ni raja in ampa hasomanni na sangap-sangap: Jolma barang pinahan, lombu barang biribiri pe, seng bulih mandai atap aha pe, seng bulih manggagat, bah pe seng bulih inumonni.

⁸Maningon marhiou guni haganup, jolma atap pinahan pe, anjaha gogoh bei dilo-dilo bani Jahowa; anjaha ganup jolma maningon mulak do humbani dalanni na bajan ai ampa humbani hagedukon na hinorjahon ni tanganni. [18]

⁹Ise mambotoh, andohar marpangulaki uhur ni Jahowa anjaha isolsoli diri-Ni, isalpuhon pargajag ni ringis-Ni, gabe seng magou hita.” [19]

¹⁰Jadi dob ididah Jahowa pambahenan ni sidea ai, ai ma na mulak ai sidea humbani dalan ni sidea na bajan ai, gabe isolsoli Naibata ma diri-Ni pasal hamagouan, na nilumbahon-Ni sibahenon-Ni bani sidea; jadi seng be saud ibahen. [20]