Read Batak Simalungun 4 MUSA 1 Bible Online

4 MUSA 1 - Batak Simalungun bible

4 MUSA 1

¹Dob ai marsahap ma Jahowa hubani si Musa i halimisan Sinai, ibagas lampolampo partumpuan ai, bani ari sada bulan dua, padua-tahunkon dob luar sidea hun tanoh Masir, nini ma,

²“Suratkon ma bilangan ni ganup tumpuan ni halak Israel, marmarga-marga, mar sasaompung, domu hubani buei ni goran-goran, sagala dalahi, mar sasahalak; [1]

³singgan na marumur dua puluh tahun pakon lobih hunjai, sagala na boi laho hu parporangan i Israel, maningon bilanganmu do sidea, ho pakon si Aron marguru hubani hulanan ni sidea. [2]

⁴Anjaha maningon dong hasomanmu sahalak humbani ganup marga, ai ma gabe pambobai ni sidea na samarga.

⁵Anjaha on ma goran-goran ni sagala na mangkasomani hanima, Humbani Ruben, si Elisur, anak ni si Sedeur;

⁶humbani Simeon, si Selumiel, anak ni si Surisadai;

⁷humbani Juda, si Nahason, anak ni si Aminadab; [3]

⁸humbani Isasar, si Natanael, anak ni si Zuar;

⁹humbani Zebulon, si Eliab, anak ni si Helon;

¹⁰humbani anak ni si Josep: humbani Efraim, si Elisama, anak ni si Amihud; humbani Manase, si Gamaliel, anak ni si Pedasur; [4]

¹¹humbani Benjamin, si Abidan, anak ni si Gideoni; [5]

¹²humbani Dan, si Ahieser, anak ni si Amisadai; [6]

¹³humbani Asser, si Pagiel, anak ni si Okran;

¹⁴humbani Gad, si Eliasap, anak ni si Deguel,

¹⁵humbani Naftali, si Ahira, anak ni si Enan. [7]

¹⁶In ma halak na tardilo humbani tumpuan ai, pambobai ni marga-marga ni ompung ni sidea, kopala ni mar sasaribu halak do sidea i Israel.”

¹⁷Dob ai ipapulig si Musa pakon si Aron ma sagala dalahi na dob ginoranan ai,

¹⁸anjaha bani ari sada bulan dua, martumpu ma ganup tumpuan ai, laho manuratkon dirini mar samarga, mar sasaompung, romban hubani buei ni goran-goran, singgan ni na marumur dua puluh tahun pakon i atasni ai, mar sasahalak,

¹⁹songon tinonahkon ni Jahowa hubani si Musa. Jadi ibilangi ma sidea i halimisan dohorhon Sinai.

²⁰Anak ni si Ruben, bunga tubuh ni si Israel, ginompar ni sidea mangihutkon partubuh ni sidea mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang:

²¹na tarbilang humbani marga Ruben ompat puluh onom ribu lima ratus halak.

²²Humbani anak ni si Simeon, ginompar ni sidea, mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang:

²³na tarbilang humbani marga Simeon, lima puluh siah ribu tolu ratus halak. [8]

²⁴Humbani anak ni si Gad, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang;

²⁵na tarbilang humbani marga Gad, ompat puluh lima ribu onom ratus lima puluh halak.

²⁶Humbani anak ni si Juda, ginompar ni sidea mangihutkon partubuh ni sidea mar sasamarga, mar sasaompung, romban hubani buei ni goran-goran, mar sasahalak sagala dalahi na marumur dua puluh tahun pakon i atasni ai, sagala na boi marporang:

²⁷na tarbilang humbani marga Juda, pitu puluh ompat ribu onom ratus halak.

²⁸Humbani anak ni si Isasar, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran mar sasahalak, sagala dalahi na marumur dua puluh tahun pakon i atasni ai, sagala na boi marporang:

²⁹na tarbilang humbani marga Isasar, lima puluh ompat ribu ompat ratus halak.

³⁰Humbani anak ni si Zebulon, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang;

³¹na tarbilang humbani marga Zebulon, lima puluh pitu ribu ompat ratus halak.

³²Humbani anak ni si Josep: Humbani anak ni si Efraim, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang;

³³na tarbilang humbani marga Efraim ompat puluh ribu lima ratus halak.

³⁴Humbani anak ni si Manase, ginompar ni sidea, mangihutkon partubuh ni sidea, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

³⁵na tarbilang humbani marga Manase, tolu puluh dua ribu dua ratus halak.

³⁶Humbani anak ni si Benjamin, ginompar ni sidea mangihutkon partubuh ni sidea, mar sasamarga, mar sasaompung romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

³⁷na tarbilang humbani marga Benjamin, tolu puluh lima ribu ompat ratus halak.

³⁸Humbani anak ni si Dan, ginompar ni sidea, mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

³⁹na tarbilang humbani marga Dan, onom puluh dua ribu pitu ratus halak.

⁴⁰Humbani anak ni si Asser, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

⁴¹na tarbilang humbani marga Asser, ompat puluh sada ribu lima ratus halak.

⁴²Humbani anak ni si Naftali, ginompar ni sidea, mangihutkon partubuh ni sidea, mar sasaompung, romban hubani bilangan ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

⁴³na tarbilang humbani marga Naftali, lima puluh tolu ribu ompat ratus halak.

⁴⁴Ai ma ganup jolma na tarbilang, na binilang ni si Musa pakon si Aron, rap pakon kopala ni halak Israel na sapuluh dua halak ai, ganup sidea ihutan bani sidea na saompung.

⁴⁵Ase haganup na tarbilang humbani halak Israel, mar sasaompung, singgan ni na marumur dua puluh tahun pakon i atas ni ai, sagala dalahi na boi marporang i Israel,

⁴⁶sagala na tarbilang ai, onom ratus tolu ribu lima ratus lima puluh halak. [9]

⁴⁷Tapi anggo halak Levi, sidea na samarga, mar sasaompung, seng masuk bani bilangan ni sidea ai.

⁴⁸Ai domma ihatahon Jahowa hubani si Musa,

⁴⁹“Pitah marga Levi seng bulih bilanganmu, anjaha seng bulih patumpuon buei ni sidea i tongah-tongah ni halak Israel, [10]

⁵⁰tapi pabangkit ma halak Levi paturei-turei rumah panumbahan hasaksian ai ronsi ganup parugasni pakon sagala na masuk hujai; maningon sidea do na mangusung lampolampo ai ronsi ganup parugasni, anjaha sidea do na marugas ijai, anjaha marianan inggot ni lampolampo ai. [11]

⁵¹Laho bingkat lampolampo ai, maningon halak Levi do na mandayok ai; anggo pajongjongon ma lampolampo ai, halak Levi do na pajongjong ai; anggo adong halak na legan mandohori ai, maningon marutang hosah do ia. [12]

⁵²Maningon mar saran halak Israel ganup bani parsarananni bei, anjaha ganup dohorhon mandera ni sidea bei.

⁵³Tapi anggo halak Levi maningon inggot ni lampolampo hasaksian ai do sidea mar saran, ase ulang mangonai ringis hubani tumpuan ni halak Israel; ase maningon horjahonon ni halak Levi do sihorjahononni bani lampolampo hasaksian ai.”

⁵⁴Jadi ibahen halak Israel ma romban hubani haganup na tinonahkon ni Jahowa hubani si Musa, sonai do ibahen sidea.