Read Batak Simalungun 4 MUSA 12 Bible Online

4 MUSA 12 - Batak Simalungun bible

4 MUSA 12

¹Dob ai marungut-ungut ma si Miryam pakon si Aron dompak si Musa, halani parinangonni, halak Kus na binuatni ai, ai boru Kus do na binuatni ai bahen parinangonni. [99]

²Anjaha nini sidea ma, “Ai pitah marhitei si Musa do gakni Jahowa mangkatahon hata-Ni? Ai lang dihut do Ia marhitei hanami mangkatahon hata-Ni?”Jadi ibogei Jahowa ma ai.

³Tapi jolma na lamlam tumang do si Musa lobih humbani sagala jolma na i atas tanoh on.

⁴Dob ai sompong ma marsahap Jahowa hubani si Musa, si Aron pakon si Miryam, “Luar ma hanima na tolu hu lampolampo partumpuan in!” Jadi luar ma sidea hatolusi.

⁵Dob ai tuad ma Jahowa ibagas hombun na jongjong, lanjar jongjong i labah ni lampolampo ai anjaha idilo ma si Aron pakon si Miryam; jadi luar ma sidea na dua. [100]

⁶Jadi nini ma, “Tangar ma hatangkon, anggo dong nabi i tongah-tongahnima, Ahu, Jahowa do patalarhon diring-Ku hubani marhitei pangungkabon, Ahu marsahap bani marhitei nipi.

⁷Seng sonai anggo juakjuak-Ku si Musa; hatengeran do ia ibagas ganup rumah-Ku. [101]

⁸Pamangan hu pamangan do Ahu marsahap pakonsi, dompak bohi bei, seng ibagas hutinta, sabonar rupa ni Jahowa sandiri do na nididahni. Mase ma lang mabiar hanima marhata ungut-ungut dompak juakjuak-Ku si Musa?” [102]

⁹Nahit ma ringis ni Jahowa hubani sidea, lanjar laho ma Ia.

¹⁰Dob surut hombun ai hun atas ni lampolampo ai, tonggor ma, domma gadamon si Miryam, lopak songon salju; marhusor ma si Aron mandompakkonsi, tonggor ma, domma gadamon si Miryam. [103]

¹¹Dob ai nini si Aron ma dompak si Musa, “Ham tuannami, ulang ma uhum ham hanami marhitei dousa na binahennami ibagas haotoonnami.

¹²Ulang ma ia songon sada halak na matei, na dob satongah masik angkulani bani parluarni humbani boltok ni inangni.”

¹³Dob ai mandoruhi ma si Musa hubani Jahowa, “Ham Naibata, sai pamalum Ham ma ia!” [104]

¹⁴Tapi nini Jahowa ma hubani si Musa, “Anggo porini itijuri bapani bohini, ai lang maningon bador ia pitu ari dokahni? Maningon tartutup ia pitu ari dokahni i darat ni parsaranan ai, dob ai pe ase bulih ia jaloon use.” [105]

¹⁵Jadi tartutup ma si Miryam pitu ari dokahni i darat ni parsaranan ai, sundat pala bangsa ai mardalan, paima tarjalo use si Miryam.

¹⁶Dob ai bingkat ma use bangsa ai hun Hasarot, anjaha marsaran ma sidea i halimisan Paran.