Read Batak Simalungun 4 MUSA 16 Bible Online

4 MUSA 16 - Batak Simalungun bible

4 MUSA 16

¹Dob ai martahi-tahi ma si Kora, anak ni si Izhar, anak ni si Kahat, anak ni si Levi rap pakon si Datan pakon si Abiram, anak ni si Eliab pakon si On, anak ni si Pelet, anak ni si Ruben. [141]

²Jongjong ma sidea manggeori dompak si Musa rap pakon dua ratus lima puluh dahali humbani halak Israel, kopala-kopala ni tumpuan ai, halak na tarpilih hu parrapotan anjaha na tarbarita. [142]

³Jadi martumpu ma sidea mangimbang si Musa pakon si Aron, nini ma dompak sidea, “Na ma lobihtu do pambahennima. Na pansing do ganup tumpuan in, sidea ganup, anjaha i tongah-tongah ni sidea do Jahowa; mase ma pagijang-gijangonnima dirinima manggomgom kuria ni Jahowa?”

⁴Jadi dob ibogei si Musa hata ai, marrogop ma ia hu tanoh. [143]

⁵Dob ai nini ma hubani si Kora pakon hubani haganup hasomanni sapartahian, “Patar ma patugahon ni Jahowa barang ise jujungan na pinabangkit-Ni, anjaha ise na pansing, na bulih dohor hu Bani; anjaha ise na pinilih ni Jahowa, ai ma na bulih dohor hu Bani. [144]

⁶On ma bahen hanima, si Kora pakon ganup hasoman sapartahianni: Buat ma batil pardahupaan;

⁷nahkon ma apuy hubagas, anjaha bahen ma dahupa hu atasni i lobei ni Jahowa patar; jadi barang ise na pinilih ni Jahowa, ai ma na pansing. Pambahenannima do na malobihtu, hanima ginompar ni si Levi.”

⁸Nini si Musa ma hubani si Kora, “Tangihon ma hatangkon hanima ginompar ni si Levi.

⁹Maotiktu ope ninuhurnima, na dob pinapulig ni Naibata ni Israel hanima hun tumpuan ni Israel, ase bulih hanima roh hun dohor hu bani, laho mangkoseihon horja bani ianan ni Jahowa, anjaha jongjong i lobei ni tumpuan in, marugas bani sidea? [145]

¹⁰Domma ilopas ho roh hun dohor, rap pakon saninamu halak Levi, sihol buatonnima ope hamalimon in?

¹¹Halani ai, ho pakon ganup hasomanmu sapartahian, na mangimbang Jahowa do hanima in. Ai ise ma si Aron, ase marungut-ungut hanima hubani?” [146]

¹²Dob ai isuruh si Musa ma na mardilo si Datan pakon si Abiram, anak ni si Eliab, tapi nini sidea ma, “Seng ra hanami tangkog hujai.

¹³Maotiktu ope gakni ninuhurmu, na dob niarahkonmu in hanami luar hun tanoh habaoran ni dadih pakon manisan ni lobah, laho mambunuh hanami i halimisan on? Sihol gakni use pabangkitonmu dirimu gabe raja bennami?

¹⁴Seng dong iboban ho hanami hu tanoh habaoran ni dadih pakon manisan ni lobah, anjaha seng dong ibere ho juma pakon pohon anggur bahen parbagianannami. Sihol use pakon mata ni dalahi pulsitkononmu? Seng ra hanami tangkog hujin. [147]

¹⁵Jadi nahit ma ringis ni si Musa, anjaha nini ma hubani Jahowa, “Sai ulang ma marpanatap Ham bani galangan sipanganon ni sidea. Seng ongga age sada halode hubuat humbani sidea, anjaha seng ongga hubahen na masambor hubani atap ise humbani sidea.” [148]

¹⁶Dob ai nini si Musa ma hubani si Kora, “Patar maningon roh do ho rap pakon hasomanmu sapartahian hu lobei ni Jahowa, ho, sidea pakon si Aron.

¹⁷Dob ai ganup hanima ibuat bei ma batil panutungan ni dahupani anjaha inahkon ma hu atasni dahupa, dob ai ganup ma mamboan hun dohor batil pardahupaanni hu lobei ni Jahowa, ganup dua ratus lima puluh batil pardahupaan, ho pe pakon si Aron iboan bei ma pardahupaanni.”

¹⁸Jadi ganup ma mambuat batil pardahupaanni, inahkon ma apuy hu atasni, anjaha ibahen ma dahupa hu atasni ai, dob ai jongjong ma sidea bani labah ni lampolampo ai rap pakon si Musa ampa si Aron.

¹⁹Domma ipatumpu si Kora hinan haganup tumpuan ai hulabah ni lampolampo partumpuan ai mangimbang sidea. Dob ai taridah ma hamuliaon ni Jahowa bani ganup tumpuan ai. [149]

²⁰Dob ai nini Jahowa ma hubani si Musa pakon si Aron,

²¹“Paholang hanima ma dirinima humbani tumpuan in, ase Husiapkon sidea ibagas na tongkin.”

²²Dob ai marrogop ma si Musa pakon si Aron, anjaha nini sidea ma, “Ham Naibata, Naibata ni tonduy ni sagala angkula, anggo mardousa sahalak, mintor ringisan-Mu ma ganup tumpuan in?” [150]

²³Nini Jahowa ma hubani si Musa,

²⁴“Hatahon ma hubani tumpuan in, ʻLaho ma hanima hun lambung ni lampolampo ni si Kora, si Datan pakon si Abiram.ʼ ”

²⁵Dob ai laho ma si Musa mangayaki si Datan pakon si Abiram, anjaha iirikkon pangintuai ni halak Israel do ia.

²⁶Anjaha nini ma hubani tumpuan ai, “Laho ma nasiam hun lampolampo ni parjahat on, anjaha ulang ma ijamah nasiam barang aha pe ugas ni sidea, ase ulang dihut nasiam siap halani dousa ni sidea ai.”

²⁷Dob ai surut bei ma sidea hun lambung ni lampolampo ni si Kora, si Datan pakon si Abiram. Jadi luar ma si Datan pakon si Abiram, lanjar jongjong i labah ni lampolampo ni sidea rap pakon parinangon ni sidea, anak ni sidea pakon dakdanak ni sidea.

²⁸Dob ai nini si Musa ma, “Hunjon ma botohon nasiam, paboa Jahowa do na marsuruh ahu mangkorjahon horja on, anjaha sedo humbani uhur-uhurhu sandiri.

²⁹Anggo songon parmatei na somal do parmatei ni halak on, atap anggo songon hinamagou na somal do mangonai hubani halak on, na so sinuruh ni Jahowa ma ahu tongon.

³⁰Tapi anggo ijadihon Jahowa na so ongga tarjadi, gabe ipangangang tanoh in babahni anjaha ibondut sidea rap pakon na adong bani sidea, gabe manggoluh sidea tuad hu nagori toruh, jadi botoh nasiam ma, na dob iapasi halak on do Jahowa.”

³¹Jadi dob siap ihatahon hata ondi, marigat ma tanoh ai i toruh ni sidea. [151]

³²Ipangangang tanoh ai ma babahni lanjar ibondut ma sidea, rumah ni sidea pakon haganup halak na mangirikkon si Kora sonai ganup ugas-ugas ni sidea.

³³Jadi sonai ma manggoluh tuad sidea hu nagori toruh ronsi ganup ugas-ugas ni sidea, lanjar irongkob tanoh ai ma sidea. Jadi magou ma sidea hun tongah-tongah ni tumpuan ai.

³⁴Anjaha haganup halak Israel, na inggot bani sidea, lintun bei ma mambogei doruh-doruh ni sidea ai, ai nini sidea do, ʻAse ulang dihut hita ibondut tanoh in.ʼ

³⁵Luar ma homa apuy humbani Jahowa, gabe bois ipangan dalahi sidua ratus lima puluh halak ai, na manggalangkon dahupa ai. [152]