Read Batak Simalungun 4 MUSA 18 Bible Online

4 MUSA 18 - Batak Simalungun bible

4 MUSA 18

¹Dob ai nini Jahowa ma hubani si Aron, “Maningon ho pakon anakmu ampa ginompar ni bapamu, na rap pakon ho do mamorsan hasalahan, na mardomu hubani ianan bani na mapansing ai; ho ampa anakmu na rap pakon ho do mamorsan na mardomu hubani hamalimon. [161]

²Age saninamu humbani marga Levi, marga ni bapamu, maningon boanonmu do hun dohor rap pakon ho, ase sidea mangkasomani ho anjaha marugas bam, sanggah i lobei ni lampolampo hasaksian ai ho rap pakon anakmu. [162]

³Maningon horjahonon ni sidea do horjamu, pakon horja ni sidea, na mardomu hubani lampolampo ai, tapi seng bulih sidea hun dohor bani parugas na pansing ai barang hu anjapanjap ai, ase ulang matei sidea age hanima.

⁴Ho do sihasomanan ni sidea mandalankon horja bani lampolampo partumpuan ai, bani haganup horja tene bani lampolampo ai; tapi anggo halak na legan seng bulih hun dohor bennima.

⁵Maningon hanima do mangkorjahon sihorjahonon bani ianan na pansing ai, pakon sihorjahonon bani anjapanjap ai, ase ulang be mangonai ringis bani halak Israel. [163]

⁶Tonggor ma domma Hubuat halak Levi, saninanima in hun tongah-tongah ni halak Israel, silayak-layak bennima do sidea, na binere hubani Jahowa, ase ihorjahon sidea horja sihorjahonon bani lampolampo in. [164]

⁷Tapi anggo ho pakon haganup anakmu na rap pakon ho, maningon horjahononnima do horja hamalimonnima, na mardomu hubani haganup horja na bani anjapanjap ai pakon na i pudi ni tirei ai; maningon dalankononnima do horja ai, ai silayak-layak na Hulayakkon do bennima jabatan hamalimon in, tapi barang ise halak na legan na roh hun dohor, maningon marutang hosah do.” [165]

⁸Dob ai nini Jahowa ma hubani si Aron, “Tonggor ma, domma Hubere hubam humbani galangan na hu Bangku, ai ma na boi sitebaan; humbani haganup tene na pinapansing ni halak Israel, domma Hubere rupeimu ampa anakmu; gabe aturan na totap ma in ronsi sadokah ni dokahni. [166]

⁹On ma rupeimu humbani na pansing sahalian ai, na so mosog ibahen apuy: Ganup galangan ni sidea, ai ma ganup galangan sipanganon, ganup galangan pardousaon, ampa ganup galangan parsalahan ni sidea, sagala na kinahulhon ni sidea hu Bangku, gabe na pansing sahalian ma ai bam bani anakmu.

¹⁰Maningon bani ianan na pansing sahalian do ai panganonnima; sagala dalahi bulih do panganonni ai, maningon pansing do ai bam.

¹¹On pe rupeimu do, Humbani sibere-bere ni sidea na legan, humbani ganup galangan sitatangon ni halak Israel, domma Hubere ai bam, hubani anakmu pakon hubani borumu na rap pakon ho; gabe aturan na totap ma ai sadokah ni dokahni; sagala na niuras ibagas rumahmu, bulih do mangankon hunjai. [167]

¹²Sagala minak sidearan, sagala anggur sijengesan ronsi omei, limbuah na binere ni sidea hubani Jahowa, domma Hubere bam.

¹³Sagala limbuah ni na adong bani tanoh ni sidea, na binoan ni sidea hubani Jahowa, maningon ho do simadasi; barang ise na dob niuras ibagas rumahmu bulih do mangankon hunjai. [168]

¹⁴Sagala na hona haram i Israel, maningon ho do simadasi. [169]

¹⁵Sagala bunga tubuh na manggoluh, na binoan ni sidea hubani Jahowa, humbani jolma atap humbani pinahan, maningon ho do simadasi; tapi tene maningon tobusonmu do anggo bunga tubuh ni jolma, anjaha maningon tobusonmu do bunga tubuhni pinahan na butak. [170]

¹⁶Anggo pasal partubuhni, maningon marumur lobei sabulan ase boi tobusonmu, romban hubani pangasammu, ai ma harga lima sekel pirak, domu hubani sekel na bani ianan na pansing ai, ai ma dua puluh gera.

¹⁷Tapi anggo bunga tubuh ni lombu barang biribiri barang hambing seng bulih tobusonmu, ai na pansing do ai, anjaha daroh ni ai maningon pispiskononmu ai bani anjapanjap, anjaha tabohni ai maningon tutungonmu ai bahen galangan apuy, gabe uap na misbou bani Jahowa.

¹⁸Tapi anggo sibukni maningon ho do simadasi, usih songon tonton ni galangan sitatangon ai ampa songon hae-hae siamun parlobei ai; maningon ho do simadasi.

¹⁹Haganup galangan na mapansing, na binere ni halak Israel bani Jahowa, domma Hubere bam, hubani anakmu pakon hubani borumu na rap pakon ho; gabe aturan na totap ma ai sadokah ni dokahni; sada parpadanan garam (padan na so tarosei) na sadokah ni dokahni ma ai bam, i lobei ni Jahowa pakon bani ginomparmu na rap pakon ho.”

²⁰Dob ai nini Jahowa ma hubani si Aron, “Seng bulih dapotan tean-teanan ho i tanoh ni sidea, barang marbagian ho i tongah-tongah ni sidea, ai Ahu do parbagiananmu pakon tean-teananmu i tongah-tongah ni halak Israel.” [171]

²¹Tapi anggo bani halak Levi, tonggor ma, domma Hubere ganup parsapuluhan i Israel bahen tean-teanni bahen parbagiananni, upah ni horja ni sidea, na hinorjahon ni sidea bani lampolampo partumpuan ai. [172]

²²Halani ai seng bulih be roh hun dohor halak Israel, hu lampolampo partumpuan ai, ase ulang mardousa sidea anjaha matei.

²³Maningon halak Levi do tene mandalankon horja bani lampolampo partumpuan ai; maningon mangonai hubani sidea do hajahaton ni sidea; aturan na totap ma in sadokah ni dokahni, seng bulih dapotan tean-teanan sidea i tongah-tongah ni halak Israel.

²⁴Ai parsapuluhan ni halak Israel, na binere ni sidea hubani Jahowa bahen galangan, domma Hubere hubani halak Levi bahen tean-teanan; halani ai do ase Huhatahon hubani sidea, “Seng bulih dapotan tean-teanan sidea i tongah-tongah ni halak Israel.”

²⁵Dob ai nini Jahowa ma hubani si Musa,

²⁶“Maningon hatahononmu ope hubani halak Levi, anggo ibuat hanima humbani halak Israel parsapuluhan, na dob Hubere bennima humbani sidea bahen tean-teannima, jadi maningon bereonnima do hunjai galangan hubani Jahowa, parsapuluhan ni parsapuluhan.

²⁷Anjaha hiraon do bennima galangannima ai, songon omei hun pardogeian anjaha songon anggur na marlobih-lobih hun pangilangan.

²⁸Sonai homa maningon bereonnima do galangannima bani Jahowa humbani ganup parsapuluhannima, na binuatnima humbani halak Israel; anjaha galangan ai na bani Jahowa, maningon bereonnima do ai hubani Malim Aron.

²⁹Humbani sagala sibere-bere bennima maningon bereonnima do galangannima bani Jahowa; humbani sagala sidearan hunjai, ai ma na patut maningon sipapansingon hunjai.

³⁰Halani ai maningon hatahononmu do hubani sidea, ʻAnggo ibere hanima sidearan hunjai, maningon hiraon do na tading ai bani halak Levi, usih songon buah na dapot hun pardogeian pakon songon buah na dapot hun pangilangan.ʼ

³¹Bulih do homa panganonnima hunjai bani ganup ianan, hanima pakon sinrumahnima, ai upahnima do in halani horjanima ibagas lampolampo partumpuan in. [173]

³²Anjaha seng mardousa hanima halani in, asal ibere hanima hunjai sidearan bahen galangan. Sonai ma bahen hanima, ase ulang butak sibere-bere ni Israel na pansing in, ase ulang matei hanima.”