Read Batak Simalungun 4 MUSA 2 Bible Online

4 MUSA 2 - Batak Simalungun bible

4 MUSA 2

¹Dob ai nini Jahowa ma hubani si Musa pakon hubani si Aron,

²“Maningon marsaran halak Israel ganup dohorhon manderani ai, dohorhon partinandaan ni sidea mar sasaompung, anjaha maningon marsaran sidea mandompakkon lampolampo partumpuan ai inggot. (bd. 1)

³Hampit lobei, hampit hapoltakan ni mata ni ari ma marsaran Juda dohorhon manderani rap pakon balani; si Nahason, anak ni si Aminadab do pambobai ni halak Juda ai. [13]

⁴Anjaha balani na tarbilang ai pitu puluh ompat ribu onom ratus halak do bueini.

⁵I lambungni marsaran do marga Isasar, anjaha si Natanael, anak ni si Zuar do pambobai ni halak Isasar ai.

⁶Anjaha balani na dob tarbilang ai, lima puluh ompat ribu ompat ratus halak do bueini.

⁷Dob ai marga Sebulon, anjaha si Eliab, anak ni si Helon do pambobai ni halak Sebulon ai.

⁸Anjaha balani na dob tarbilang ai, lima puluh pitu ribu ompat ratus halak do bueini.

⁹Bahat ni na tarbilang humbani parsaranan Juda saratus ualuh puluh onom ribu ompat ratus halak do bueini, marbanjei-banjei. Sidea do na maningon mardalan parlobei.

¹⁰Hampit dangsina do mandera ni marga Ruben rap pakon balani, anjaha si Elisur, anak ni si Sedeur do pambobai ni halak Ruben ai. [14]

¹¹Anjaha balani na tarbilang ai ompat puluh onom ribu lima ratus halak do bueini.

¹²Anjaha i lambungni marsaran do marga Simeon, anjaha si Selumiel, anak ni si Surisadai do pambobai ni halak Simeon ai.

¹³Anjaha balani na dob tarbilang ai, lima puluh siah ribu tolu ratus halak do bueini.

¹⁴Dob ai marga Gad, anjaha si Eliasab, anak ni si Rehuel do pambobai ni halak Gad ai.

¹⁵Anjaha balani na dob tarbilang ai, ompat puluh lima ribu onom ratus lima puluh halak do bueini.

¹⁶Ganup na tarbilang ai humbani parsaranan Ruben, saratus lima puluh sada ribu ompat ratus lima puluh halak do bueini marbanjei-banjei. Sidea do na maningon bingkat paidua.

¹⁷Dob ai bingkat ma lampolampo partumpuan ai rap pakon tumpuan ni halak Levi i tongah-tongah ni tumpuan na legan ai; domu hubani partibal ni sidea na marsaran ai, lanjar sonai do sidea bingkat ganup bani iananni bei mangihutkon manderani bei.

¹⁸Hampit hasundutan do mandera ni marga Efraim rap pakon balani, anjaha si Elisama, anak ni si Amihud do pambobai ni halak Efraim ai. [15]

¹⁹Anjaha balani na tarbilang ai ompat puluh ribu lima ratus halak do bueini.

²⁰Anjaha i lambungni marsaran do marga Manase, anjaha si Gamaliel, anak ni si Pedasur do pambobai ni halak Manase ai.

²¹Anjaha balani na dob tarbilang ai tolu puluh dua ribu dua ratus halak do bueini.

²²Dob ai marga Benjamin, anjaha si Abidan, anak ni si Gideon do pambobai ni halak Benjamin ai. [16]

²³Anjaha balani na dob tarbilang ai, tolu puluh lima ribu ompat ratus halak do bueini.

²⁴Ganup na tarbilang ai humbani parsaranan Efraim, saratus ualuh ribu saratus halak do bueini marbanjei-banjei. Sidea do na maningon bingkat paitolu.

²⁵Hampit utara do mandera ni marga Dan rap pakon balani, anjaha si Ahieser, anak ni si Amisadai do pambobai ni halak Dan ai. [17]

²⁶Anjaha balani na dob tarbilang ai, onom puluh dua ribu pitu ratus halak do bueini.

²⁷Anjaha i lambungni marsaran do marga Asser, anjaha si Pagiel, anak ni si Okran do pambobai ni halak Asser.

²⁸Anjaha balani na dob tarbilang ai ompat puluh sada ribu lima ratus halak do bueini.

²⁹Dob ai marga Naftali, anjaha si Ahira, anak ni si Enan do pambobai ni halak Naftali.

³⁰Anjaha balani na dob tarbilang ai, lima puluh tolu ribu ompat ratus halak do bueini.

³¹Ganup na tarbilang ai humbani parsaranan Dan, saratus lima puluh pitu ribu onom ratus halak; anjaha parpudi do sidea bingkat rap pakon manderani.

³²Ai ma ganup na tarbilang humbani halak Israel mar sasaompung; ganup na tarbilang ibagas parsaranan ai mangihutkon balani na marbanjei-banjei ai onom ratus tolu ribu lima ratus lima puluh halak do bueini. [18]

³³Tapi anggo halak Levi seng ibilangi i tongah-tongah ni halak Israel songon na tinonahkon ni Jahowa hinan hubani si Musa.” [19]

³⁴Jadi ibahen halak Israel ma haganup songon na tinonahkon ni Jahowa hubani si Musa; marsaran ma sidea domu hubani manderani bei; sonai homa bingkat ma sidea mar sasamarga pakon mar sasaompung. [20]