Read Batak Simalungun 4 MUSA 20 Bible Online

4 MUSA 20 - Batak Simalungun bible

4 MUSA 20

¹Dob ai das ma halak Israel, ganup tumpuan ai tene hu halimisan Sin bani bulan sada, anjaha marsaran ma bangsa ai i Kades; matei ma si Miryam ijai, lanjar itanom ijai. [179]

²Dob ai hurangan bah ma tumpuan ai, jadi rongom ma sidea roh marayak si Musa pakon si Aron. [180]

³Ipungkah bangsa ai ma partinggilan dompak si Musa, nini sidea ma, “Ambit rotap ma namin hosahnami sanggah na matei saninanami i lobei ni Jahowa.

⁴Mase ma arah-arahonnima kuria ni Jahowa hu halimisan on, ase matei hanami ijon rap pakon pinahannami?

⁵Anjaha mase ma arahkononnima hanami tangkog hun Masir, laho mamboan hanami bani ianan na masambor on? Seng dong ijon gandum, hayu ara barang hayu anggur barang hayu dalima; gari bah inumon seng dong jumpah.”

⁶Dob ai laho ma si Musa pakon si Aron hun lobei ni kuria ai, hu labah ni lampolampo partumpuan ai, anjaha marrogop ma sidea. Dob ai taridah ma hamuliaon ni Jahowa bani sidea. [181]

⁷Dob ai nini Jahowa ma hubani si Musa,

⁸“Buat ma tungkot ai, patumpu ma kuria in, ho pakon abangmu si Aron, dob ai parsahapkon hanima ma dolog batu ai, i lobei ni mata ni sidea, ase ibere bahni; sonai ma paluaronmu bah hun dolog batu ai hubani sidea; sonai ma bereonmu minum kuria in pakon pinahanni.”

⁹Dob ai ibuat si Musa ma tungkot ai hun lobei ni Jahowa, songon na tinonahkonni ai hu bani.

¹⁰Ipatumpu si Musa pakon si Aron ma kuria in hu lobei ni dolog batu ai, anjaha nini ma hubani sidea, “Bogei ma, nasiam sipanggeori! Tarpaluar do bah bani nasiam hun dolog batu on?” [182]

¹¹Dob ai ipagostong si Musa ma tanganni anjaha ibogbog ma dolog batu ai marhitei tungkotni ai dua hali; jadi luar ma bah buei tumang, gabe minum ma kuria ai ampa pinahanni.

¹²Dob ai nini Jahowa ma hubani si Musa pakon hubani si Aron, “Halani na so porsaya ai hanima Bangku, laho papansingkon Ahu namin i lobei ni halak Israel, halani ai seng be hanima mangarahkon kuria on das hu tanoh, na dob Hulayak-layakkon bani sidea namin.” [183]

¹³Ai ma Bah Meriba, halani ijai itinggili halak Israel Jahowa, anjaha Ia papansing diri-Ni i tongah-tongah ni sidea. [184]

¹⁴Dob ai isuruh si Musa ma suruhanni hun Kades marayak raja ni halak Edom, “Sonon do hata ni anggimu halak Israel, ʻIbotoh ham do ganup sitaronon na idagei hanami; [185]

¹⁵sonaha ompungnami tuad hu tanoh Masir, anjaha hanami dokah marianan i tanoh Masir, anjaha bajan do pangarsik-arsik ni halak Masir bennami pakon bani ompungnami.ʼ

¹⁶Jadi doruh-doruh ma hanami bani Jahowa, gabe itangar ma soranami, anjaha isuruh sada malekat, anjaha iarahkon ma hanami luar hun Masir; anjaha tonggor ma, domma i Kades hanami nuan, sada huta bani parbalogan ni tanohmu. [186]

¹⁷Mahua palopas ham ma hanami mamontas hun nagorimu. Lang pe hanami mardalan hun ladang barang pohon anggurmu, anjaha lang pe iinum hanami bah hun parigi; dalan na bolon in pe idalani hanami, lang pe manirpang hanami hu siamun barang hu sambilou, paima salpu ibontas hanami nagorimu.” [187]

¹⁸Tapi nini raja ni Edom ma hu bani, “Seng bulih bontasonmu nagoringku, ase ulang luar ahu mangimbang ho marhasoman podang.”

¹⁹Dob ai nini halak Israel ma hu bani, “Dalan na bolon in pe dalanannami, anjaha anggo iinum hanami humbani bahmu, hanami pakon pinahannami, igalar hanami pe in; pitah mamontas, mardalan nahei do hanami, seng dong na legan.”

²⁰Tapi nini ma, “Seng bulih bontasonmu!”Anjaha luar ma raja ni Edom mangolat sidea rap pakon buei balani ni gopas marsinjata.

²¹Ase sonai ma pangengkar ni raja ni Edom palopas halak Israel mamontas hun nagorini, jadi manlembang ma halak Israel manlembangisi.

²²Dob ai bingkat ma sidea hun Kades, gabe das ma ganup kuria ni halak Israel hu Dolog Hor.

²³Dob ai nini Jahowa ma hubani si Musa pakon hubani si Aron, i bona ni Dolog Hor, bani parbalogan ni tanoh Edom,

²⁴“Patumpuon ma anggo si Aron hubani bangsani, seng bulih ia masuk hu tanoh, na dob Hubere bani halak Israel, halani na ilanggar hanima hatang-Ku i lambung ni Bah Meriba.

²⁵Arahkon ma si Aron pakon si Eleasar, anakni ai, anjaha bobanon ma sidea tangkog hu Dolog Hor;

²⁶tanggali ma pakeanni ai humbani si Aron, anjaha sorungkon ma ai hubani si Eleasar, anakni ai; patumpuon ma si Aron hubani bangsani anjaha matei ijai.” [188]

²⁷Jadi ibahen si Musa ma songon na tinonahkon ni Jahowa, tangkog ma sidea hu Dolog Hor, ituludkon ganup na sakuria ai.

²⁸Dob ai itanggali si Musa ma pakean ai humbani si Aron, anjaha isorungkon ma ai hubani si Eleasar, anakni ai; jadi matei ijai ma si Aron i pakpak ni dolog ai. Dob ai tuad ma si Musa pakon si Eleasar hun dolog ai. [189]

²⁹Jadi dob ididah ganup kuria ai na dob matei do hape si Aron, gabe itangisi ganup ginompar ni halak Israel ma si Aron, tolu puluh ari dokahni.