Read Batak Simalungun 4 MUSA 21 Bible Online

4 MUSA 21 - Batak Simalungun bible

4 MUSA 21

¹Jadi dob ibogei si Arad, raja ni halak Kanaan, na marianan i tanoh dangsina, na dob roh halak Israel hun dalan na hun Atarim, gabe iporang ma halak Israel, pala itaban deba humbani sidea.

²Dob ai marbagah-bagah ma halak Israel hubani Jahowa, “Anggo iondoskon Ham bangsa on hubagas tanganku, sai siapkononku do sagala huta ni sidea ai.” [190]

³Jadi ibalosi Jahowa ma sora ni halak Israel, iondoskon ma halak Kanaan ai hubani sidea, gabe isiapkon halak Israel ma sidea, ronsi huta ni sidea, anjaha ibaen ma goran ni huta ai Horma. [191]

⁴Jadi bingkat ma sidea hun Dolog Hor, laho dompak Laut Sigerger, sihol manginggoti nagori ni halak Edom; gabe lang sabar be bangsa ai i tongah dalan. [192]

⁵Dob ai marungut-ungut ma bangsa ai hubani Naibata pakon hubani si Musa, “Mase ma arahkonon-Mu hanami tangkog hun Masir, ase matei hanami i halimisan on? Ai seng dong ruti barang bah ijon, ai domma maginei-ginei uhurnami mangidah ruti na magoyak-goyak on.”

⁶Dob ai isuruh Jahowa ma hu tongah-tongah ni bangsa ai ulog darih, na mamaguti bangsa ai, gabe marmateian ma buei humbani halak Israel. [193]

⁷Dob ai roh bei ma bangsa ai marayak si Musa anjaha nini ma, “Domma mardousa hanami dompak Jahowa pakon bamu, martonggo ma ham hubani Jahowa, ase ipadaoh hun bennami ulog darih on.”Jadi martonggo ma si Musa mangapiti bangsa ai.

⁸Dob ai nini Jahowa ma hubani si Musa, “Pauli ma sada ulog darih, anjaha nahkon ma ai bani sada tiang, jadi anggo adong barang ise na pinagut ni ulog ai anjaha mangkawah hujai, jadi manggoluh ma ia.” [194]

⁹Dob ai ipauli si Musa ma sada ulog humbani tombaga, anjaha inahkon ma ai hubani sada tiang, jadi anggo adong barang ise na pinagut ni ulog ai, anjaha itonggor dompak ulog tombaga ai, jadi manggoluh ma ia.

¹⁰Dob ai bingkat ma halak Israel hunjai anjaha marsaran ma sidea i Obot.

¹¹Dob ai bingkat ma use sidea hun Obot anjaha marsaran i Iye Abarim, i halimisan tontang ni Moab, hampit hapoltakan.

¹²Bingkat ma use sidea hunjai, anjaha marsaran ma sidea i habungan Sared.

¹³Bingkat ma use sidea hunjai anjaha marsaran ma i dipar ni Bah Arnon, na i halimisan, na marsumbul i nagori ni halak Amori, na gabe parbalogan ni Moab pakon Amori.

¹⁴Halani ai do ase tarsurat ibagas buku porang ni Jahowa, “Wahab i Supa pakon habungan ni Arnon, [195]

¹⁵pakon raboyon ni habungan, na ampar ronsi ianan ni Ar, anjaha mangunsandei bani parbalogan ni Moab.”

¹⁶Bingkat ma use sidea hunjai hu Beer, ai ma parigi na hinatahon ni Jahowa hubani si Musa, “Patumpu ma bangsa in, ase Hubere bah inumon hubani sidea.

¹⁷Ijia ma idodingkon halak Israel doding on, ʻSirnip ma ho, alo parigi! Dodingkon ma in marsibalos-balosan!ʼ

¹⁸Parigi na hinurak ni sagala kopala, na pinungkor ni na sangap ni bangsa in marhitei tungkot ni sidea. Dob ai bingkat ma use sidea hun halimisan ai hu Matana,

¹⁹hun Matana hu Nahaliel, hun Nahaliel hu Bamot,

²⁰hun Bamot hu habungan na i ladang ni Moab, na patontang pakon pakpak ni Pisga, panatapan hampit halimisan.”

²¹Dob ai isuruh Israel ma suruhanni marayak si Sihon, raja ni halak Amori, nini ma, [196]

²²“Mahua palopas ham ma ahu mamontas hun tanohmu, lang pe manlembang hanami hu ladang barang hu pohon anggur; lang pe iinum hanami bah ni parigi, dalan na bolon in pe idalani hanami paima salpu ibontas hanami nagorimu.” [197]

²³Tapi seng ipalopas si Sihon halak Israel mamontas hun nagori ni sidea. Ipatumpu ma ganup bangsani, anjaha luar ma mangimbang Israel hu halimisan, anjaha dob das hu Jahas, iporang ma halak Israel.

²⁴Tapi italuhon Israel do ia marhitei mata ni podang, anjaha isoluk ma nagorini singgan ni Arnon ronsi Jabok, das hubani halak Amon, ai toguh do parbalogan ni halak Amon.

²⁵Italuhon Israel ma ganup huta ai, anjaha marianan ma Israel i huta ni halak Amori, i Hesbon pakon ganup dusunni inggot.

²⁶Ai Hesbon do huta ni si Sihon, raja ni halak Amori, na dob mamorang raja ni halak Moab, anjaha na dob mangayob ganup tanohni hun tanganni das hu Arnon.

²⁷Halani ai do ase ihatahon pandoding parumpasa, “Roh ma hu Hesbon, gabe pinauli anjaha pinatoguh ma huta ni si Sihon.

²⁸Ai apuy do luar hun Hesbon, dilah ni apuy hun huta ni si Sihon. Ai ma na mamboiskon Ar i Moab, pangisi ni tanoh Dolog Arnon na i topini.

²⁹Hona papa ma ho Moab! Magou ma ho, alo halak Kamos! Domma ibahen anakni gabe sidakdakan ni munsuh, anjaha boruni taban-taban bani si Sihon, raja ni halak Amori. [198]

³⁰Domma itembaki hanami sidea, magou do Hesbon das hu Dibon; domma iparseda hanami ai das hu Noya, pala ronsi Medeba marhitei apuy.”

³¹Jadi marianan ma halak Israel i tanoh ni halak Amori.

³²Dob ai isuruh si Musa ma na mangkahapi Jaeser; ipatunduk sidea ma ai ampa sagala dusunni, anjaha iusir ma halak Amori na marianan ijai.

³³Dob ai marhusor ma sidea anjaha tangkog mardalan hu Basan; jadi luar ma si Og, raja ni Basan, manjumpahkon sidea, mambobahon ganup bangsani laho marporang i Edrei. [199]

³⁴Nini Jahowa ma hubani si Musa, “Ulang ho mabiar mangidahsi, ai domma Huondoskon ia hubagas tanganmu pakon bangsani ronsi nagorini; bahen ma bani songon na dob binahenmu hubani si Sihon, raja ni halak Amori, na marianan i Hesbon.” [200]

³⁵Jadi ipatunduk sidea ma ia pakon anakni ampa ganup bangsani, sahalak pe lang dong tading bani, anjaha isoluk sidea ma tanoh ni ai.