Read Batak Simalungun 4 MUSA 3 Bible Online

4 MUSA 3 - Batak Simalungun bible

4 MUSA 3

¹On do ginompar ni si Aron pakon si Musa bani panorang sanggah na marsahap Jahowa hubani si Musa i Dolog Sinai. [21]

²On do goran ni anak ni si Aron: Si Nadab bunga tubuhni, si Abihu, si Eleasar pakon si Itamar.

³Ai ma goran-goran ni anak ni si Aron, na niminakan gabe malim, na dob pinabangkit mangkorjahon hamalimon.

⁴Tapi domma matei popor anggo si Nadab pakon si Abihu i lobei ni Jahowa sanggah na binoban ni sidea apuy na legan hu lobei ni Jahowa i halimisan dohorhon Sinai; jadi si Eleasar pakon si Itamar ma mangkorjahon hamalimon ai i lobei ni si Aron bapa ni sidea ai. [22]

⁵Dob ai nini Jahowa ma hubani si Musa,

⁶“Hatahon ma roh hun dohor marga Levi, anjaha pajongjong ma sidea i lobei ni Malim Aron, ase marugas sidea bani, [23]

⁷ase ihorjahon sidea horja na bani si Aron pakon horja na bani ganup tumpuan ai i lobei ni lampolampo ai, sanggah na marugas ai sidea bani lampolampo ai;

⁸lanjar sidea do na paturei-tureihon sagala parugas ni lampolampo partumpuan ai pakon mandalankon horja na porlu bani halak Israel, sanggah na marugas ai sidea bani lampolampo ai. (bd. 4)

⁹Maningon ondoskononmu do halak Levi in hubani si Aron pakon hubani anakni ai; sidea do na dob niondoskon bani hun tongah-tongah ni halak Israel.

¹⁰Tapi anggo si Aron pakon anakni ai maningon pabangkitonmu do mangkorjahon hamalimon ni sidea ai, tapi anggo roh hundohor halak na legan, maningon marutang hosah do ia.” [24]

¹¹Dob ai nini Jahowa ma hubani si Musa,

¹²“Tonggor ma, domma Hutodoh halak Levi hun tongah-tongah ni halak Israel bahen gantih ni sagala bunga tubuh humbani halak Israel, ai ma gantihni, na parlobei luar hun partapaan, ase Ahu simada halak Levi; [25]

¹³ai Ahu do simada sagala bunga tubuh. Singgan ni ari dob Hubunuh sagala bunga tubuh i tanoh Masir, domma Hupapansing Bangku sagala bunga tubuh i Israel humbani jolma ronsi pinahan; maningon Ahu do simadasi, Ahu do Jahowa.” [26]

¹⁴Dob ai nini Jahowa ma hubani si Musa i halimisan dohorhon Sinai,

¹⁵“Bilangi ma halak Levi mar sasaompung pakon mar sasamarga; sagala dalahi na marumur sabulan pakon lobih hunjai maningon bilanganmu do sidea.”

¹⁶Jadi ibilangi si Musa ma sidea romban hubani hata ni Jahowa songon na dob tinonahkon-Ni ai.

¹⁷Anjaha on ma goran ni anak ni si Levi: Si Gerson, si Kahat pakon si Merari. [27]

¹⁸On do goran ni anak ni si Gerson mangihutkon marga ni sidea ai: Si Libni pakon si Simei.

¹⁹Anak ni si Kahat mangihutkon marga ni sidea, “si Amram, si Jizhar, si Hebron pakon si Usiel.”

²⁰Anjaha anak ni si Merari mangihutkon marga ni sidea, “si Mahli pakon si Musi. Ai ma marga ni halak Levi mar sasaompung.

²¹Humbani si Gerson roh marga ni halak Libni pakon marga ni halak Simei; ai ma marga humbani ginompar ni si Gerson.

²²Buei ni bilangan ni sidea, sagala dalahi singgan na marumur sabulan pakon lobih hunjai pitu ribu lima ratus halak do.

²³Ginompar ni si Gerson, maningon marsaran i pudi ni lampolampo ai hampit hasundutan,

²⁴anjaha si Eliasap, anak ni si Lael do pambobai ni ginompar ni si Gerson.

²⁵Anak ni si Gerson ai do haondosan ni lampolampo partumpuan, poti parpadanan, tirei ampa langit-langitni pakon tirei ni labah harorohan hu lampolampo partumpuan ai,

²⁶sonai homa tirei ni alaman pakon tirei ni labah harorohan hu alaman inggot ni lampolampo ai pakon inggot ni anjapanjap ai ampa tali-talini ambahni ai sagala horja na mardomu hujai.

²⁷Humbani si Kahat do roh marga ni halak Amram, marga ni halak Jizhar, marga ni halak Hebron pakon marga ni halak Usiel; ai ma marga humbani ginompar ni si Kahat.

²⁸Ia bilangan ni sagala dalahi singgan ni marumur sabulan pakon i atasni ai ualuh ribu onom ratus halak do, sagala na marugas ibagas ianan na pansing ai.

²⁹Ia ginompar ni si Kahat maningon marsaran do i lambung ni lampolampo ai hampit dangsina,

³⁰anjaha si Elisapan, anak ni si Usiel do pambobai ni ginompar ni si Kahat. [28]

³¹Sidea do haondosan ni poti, meja, parpalitaan, anjapanjap pakon parugas na pansing ai, na pinakei sanggah marugas, sonai homa tirei ai rap pakon ganup parugasni, ambahni ai sagala horja na mardomu hujai. [29]

³²Kopala ni pambobai ni halak Levi ai ma si Eleasar, anak ni Malim Aron, ia do haondosan ni halak, sagala na marugas bani ianan na pansing ai.

³³Humbani si Merari do roh marga ni halak Mahli pakon marga ni halak Musi, ai ma marga humbani ginompar ni si Merari.

³⁴Ia buei ni bilangan ni sidea, sagala dalahi na marumur sabulan pakon i atasni ai onom ribu dua ratus halak do.

³⁵Anjaha si Zuriel, anak ni si Abihail do pambobai ni ginompar ni si Merari, anjaha maningon marsaran do sidea i lambung ni lampolampo ai hampit utara.

³⁶Maningon anak ni si Merari do haondosan ni papan ni lampolampo ai, ransang-ransangni, tiangni, nahei ni tiang ai pakon ganup parugasni, ambahni ai sagala horja na mardomu hujai;

³⁷ambah ni ai tiang ni alaman ai inggot pakon naheini, pakuni pakon talini.

³⁸Halak na marsaran i lobei ni lampolampo partumpuan ai dompak hapoltakan ni mata ni ari, ai ma si Musa, si Aron pakon anakni ai; sidea do na mandalankon horja bani ianan na pansing ai, laho mangugaskon horja haporluan ni halak Israel. Barang ise halak na legan na roh hun dohor maningon marutang hosah do ia.” [30]

³⁹Sagala na tarbilang humbani halak Levi, sagala na binilang ni si Musa pakon si Aron, romban hubani na tinonahkon ni Jahowa, mangihutkon margani bei, sagala dalahi na marumur sabulan pakon i atasni ai, dua puluh dua ribu halak do bueini.

⁴⁰Dob ai nini Jahowa ma hubani si Musa, “Bilangi ma sagala bunga tubuh i tongah-tongah ni halak Israel, singgan na marumur sabulan pakon i atasni ai, anjaha buat ma homa bilangan ni goran-goran ni sidea.

⁴¹Papulig ma halak Levi Bangku -- Ahu do Jahowa -- gantih ni sagala dalahi bunga tubuh i tongah-tongah ni halak Israel, pakon pinahan ni halak Levi, gantih ni sagala bunga tubuh i tongah-tongah ni pinahan ni halak Israel.”

⁴²Jadi ibilangi si Musa ma sagala bunga tubuh i tongah-tongah ni halak Israel, songon na tinonahkon ni Jahowa hu bani.

⁴³Anjaha sagala bunga tubuh dalahi na tarbilang ai, mangihutkon bilangan ni goran-goran, singgan ni na marumur sabulan pakon i atasni ai, dua puluh dua ribu dua ratus pitu puluh tolu halak do bueini.

⁴⁴Dob ai nini Jahowa ma hubani si Musa,

⁴⁵“Buat ma halak Levi gantih ni sagala bunga tubuh i tongah-tongah ni halak Israel, pakon pinahan ni halak Levi gantih ni pinahan ni sidea, ase Ahu simada halak Levi, Ahu do Jahowa. [31]

⁴⁶Bahen partobus ni sidua ratus pitu puluh tolu halak bunga tubuh ni halak Israel, na lobih humbani bilangan ni halak Levi, [32]

⁴⁷maningon buatonmu do lima sekel pirak tobus ni ganup halak, mangihutkon sekel na bani ianan na pansing ai do buatonmu ai, ai ma dua puluh gera sasekel.

⁴⁸Maningon bereonmu do pirak partobus ni halak na ganda ai hubani si Aron pakon hubani anakni ai.”

⁴⁹Jadi ibuat si Musa ma pirak partobus ai humbani halak na ganda, sagala na tinobus ni halak Levi ai.

⁵⁰Humbani bunga tubuh ni halak Israel do ibuat pirak ai, saribu tolu ratus onom puluh lima sekel, marguru hubani sekel bani ianan na pansing ai.

⁵¹Dob ai ibere si Musa ma pirak partobus ai hubani si Aron pakon hubani anakni ai, romban hubani hata ni Jahowa, songon na tinonahkon ni Jahowa hubani si Musa.