Read Batak Simalungun 4 MUSA 30 Bible Online

4 MUSA 30 - Batak Simalungun bible

4 MUSA 30

¹Dob ai nini si Musa ma hubani kopala ni halak Israel mar sasamarga, “On do hata na tinonahkon ni Jahowa,

²ʻAnggo domma marbagah-bagah sada dalahi bani Jahowa barang marpadan marhitei bija, paboa maningon oromon ni uhurni atap aha, seng bulih ubahonni hatani, maningon romban hubani haganup hata na luar hun pamanganni bahenonni.ʼ

³Barang anggo marbagah-bagah sada naboru hubani Jahowa, barang marpadan, paboa maningon oromon ni uhurni barang aha, sanggah i rumah ni bapani, sanggah haposoonni, [272]

⁴anjaha ibogei bapani do bagah-bagah barang padanni ai pasal sioromon ni uhurni ai, tapi ipasip bapani do ai, maningon totap do sagala bagah-bagahni, anjaha ganup padan pasal sioromon ni uhurni ai maningon totap do.

⁵Tapi anggo mintor iulangi bapani ai do ai, bani ari na binogeini sagala bagah-bagah ai, barang padanni ai, ai ma pasal sioromon ni uhurni ai, seng asi be bagah-bagah ai, anjaha marpangulaki do uhur ni Jahowa bani, halani na niulangan ni bapani ai do ia.

⁶Tapi anggo domma marparamangon ia, hape marutang bagah-bagah ia barang tarsor pamanganni marpadan pasal sioromon ni uhurni,

⁷anjaha ibogei paramangonni do ai namin, tapi ipasipkon do ai bani ari binogeini ai; halani ai maningon totap do padanni ai, anjaha padan pasal sioromonni ai maningon asi do.

⁸Tapi anggo iulangi paramangonni ai do ia bani ari na binogeini ai, gabe seng asi be bagah-bagahni ai barang padan na dob tarsor luar hun pamanganni pasal sioromon ni uhurni ai; jadi marpangulaki ma uhur ni Jahowa mangidahsi.

⁹(Tapi anggo bagah-bagah ni sada puang-puang na dob mabalu barang na dob binuangkon do, sagala padan na dob pinadankonni pasal sioromon ni uhurni ai, maningon asi do.)

¹⁰Tapi anggo ibagas rumah ni paramangonni ia marbagah-bagah barang marpadan marhitei bija pasal sioromon ni uhurni,

¹¹anjaha ibogei paramangonni do ai namin, tapi ipasipkon do ai lang iulangi ia, maningon asi do sagala bagah-bagahni ai anjaha sagala padan pasal sioromonni ai maningon asi do.

¹²Tapi anggo iparnalang paramangonni do ai bani ari na binogeini ai, jadi sagala na dob luar hun pamanganni, bagah-bagahni barang padanni pasal sioromon ni uhurni, seng asi be ai, halani na dob iparnalang paramangonni do ai anjaha marpangulaki ma uhur ni Jahowa mangidahsi.

¹³Sagala bagah-bagah pakon bija pasal sioromon laho paundukkon uhur, tarbahen paramangonni do patotapkon, tarbahen paramangonni do homa marnalangkon.

¹⁴Tapi anggo sip do paramangonni das bani ari na legan, jadi na patotapkon do ia ai bani haganup bagah-bagahni pakon bani ganup padanni pasal sioromonni ai, jadi asi ma ai, halani na sip ai do ia bani ari na binogeini ai.

¹⁵Tapi anggo iparnalang ai dob hundokah ai ibogei, maningon manginsonoh do ai bani.

¹⁶Ai ma aturan na tinonahkon ni Jahowa hubani si Musa pasal pardomuan ni sada dalahi hubani parinangonni, pakon pardomuan ni sada bapa hubani boruni sanggah haposoonni i rumah ni bapani.”