Read Batak Simalungun 4 MUSA 31 Bible Online

4 MUSA 31 - Batak Simalungun bible

4 MUSA 31

²“Maningon balaskononmu do pambahenan ni halak Midian hubani halak Israel, dob ai patumpuon ma ho hubani bangsamu.” [273]

³Jadi nini si Musa ma hubani bangsa ai, “Pilih nasiam ma humbani nasiam dalahi na laho marporang mandorab halak Midian, laho mandalankon pambalason ni Jahowa hubani halak Midian.

⁴Saribu halak humbani ganup marga ni halak Israel tene pabingkaton nasiam laho marporang.”

⁵Jadi iarahkon ma humbani halak Israel na marribu-ribu ai, saribu humbani ganup marga, gabe sapuluh dua ribu halak ma na laho marporang ai.

⁶Ipabangkit si Musa ma sidea saribu halak humbani ganup marga hu parporangan rap pakon si Pinehas, anak ni Malim Eleasar, mamboban parugas na mapansing ampa tarompit na marsora mareta-eta. [274]

⁷Jadi iporang sidea ma halak Midian, songon na tinonahkon ni Jahowa hubani si Musa, anjaha ibunuh sidea ma sagala dalahi. [275]

⁸Ambah ni halak na marradagan ai, ibunuh sidea do homa raja-raja ni halak Midian, ai ma: Si Ewi, si Rekem, si Zur, si Hur pakon si Reba, na lima raja ni halak Midian ai; ibunuh sidea do age si Bileam, anak ni si Beor marhitei podang. [276]

⁹Dob ai iboan halak Israel ma puang-puang ni halak Midian pakon dakdanak ni sidea; iayob ma homa ganup pinahan ni sidea, ugas-ugas ni sidea ampa arta ni sidea haganup.

¹⁰Haganup huta ni sidea ronsi ganup ianan ni sidea ampa lampolampo ni sidea bois do isurbuy bani apuy.

¹¹Iboan sidea ma haganup taban-taban ampa rampasan ai marrupa jolma pakon pinahan,

¹²iboan sidea ma ai hubani si Musa, hubani Malim Eleasar pakon hubani kuria ni halak Israel, ai ma sagala na tartangkap ai pakon ugas rampasan ampa taban-taban ai, hu parsaranan na i pamah Moab, na i topi ni Jordan, tontang ni Jeriko.

¹³Luar ma si Musa, Malim Eleasar pakon ganup kopala ni kuria ai mangalo-alo sidea hu darat ni parsaranan ai.

¹⁴Dob ai marringis ma si Musa hubani pambobai ni bala ai, hubani kopala ni sisaribu halak pakon hubani kopala ni sisaratus halak, sagala na roh mulak hun parporangan.

¹⁵Nini si Musa ma hubani sidea, “Mase ma pagoluhonnima ganup puang-puang ni sidea in?

¹⁶Tonggor ma, sidea do sigiutini mambahen marbalik halak Israel humbani Jahowa laho mangirikkon Peor, niajaran ni si Bileam, gabe masa sampar ondi hu kuria ni Jahowa. [277]

¹⁷Halani ai, bunuh hanima ma sagala dakdanak dalahi, pakon sagala puang-puang na dob ongga saor pakon sada dalahi. [278]

¹⁸Tapi sagala dakdanak naboru, sagala na so ongga saor hubani sada dalahi, pagoluh hanima ma bennima.

¹⁹Tapi anggo hanima, maningon mar saran do hanima i darat ni parsaranan ai pitu ari dokahni; barang ise na dob mambunuh jolma anjaha barang ise na dob manjamah jolma na binunuh ai, maningon urasonnima do dirinima rap pakon halak tangkapannima in bani ari patoluhon pakon bani ari papituhon. [279]

²⁰Anjaha sagala pakean, sagala parugas humbani hulingkuling, sagala na pinauli humbani imbulu ni hambing pakon sagala ugas-ugas humbani hayu, maningon urasonnima do.”

²¹Dob ai nini Malim Eleasar ma hubani halak parporang ai, sagala na dob mulak humbani parporangan. On do aturan ni titah na dob tinonahkon ni Jahowa hubani si Musa,

²²“Ia omas, pirak, tombaga, bosi, seng pakon simbora,

²³sagala na tahan ibagas apuy, maningon pabontasonkon do hubagas apuy, ase pitah ai; tapi maningon urason do homa ai marhitei bah pangurasion, anjaha sagala na so tahan ibagas apuy maningon pabontasonkon nasiam do ai humbagas bah.

²⁴Maningon taptapan nasiam do homa pakean nasiam bani ari papituhon, ase pansing nasiam; dob ai bulih ma nasiam masuk hu parsaranan ai.”

²⁵Dob ai nini Jahowa ma hubani si Musa,

²⁶“Suratkon ma buei ni taban-taban pakon rampasan humbani jolma pakon pinahan, ho pakon Malim Eleasar ronsi sagala kopala ni kuria in mar sasaompung.

²⁷Dob ai bagi dua ma taban-taban ai, satongah bani halak parporang, sagala na bingkat hu parporangan, na satongah nari bani ganup kuria in. [280]

²⁸Dob ai maningon papuligonnima ma guguan bani Jahowa humbani halak parporang ai, sagala na bingkat hu parporangan, sada humbani lima ratus humbani jolma, lombu, halode pakon biribiri ai;

²⁹buat ma humbani na satongah parbagianan ni parporang ai anjaha bere ma ai bani Malim Eleasar bahen galangan bani Jahowa.

³⁰Tapi anggo humbani na satongah parbagianan ni halak Israel, maningon buatonmu sada humbani na lima puluh, humbani jolma, lombu, halode pakon biribiri, na humbani sagala pinahan, anjaha bere ma ai hubani halak Levi, na mangkorjahon horja bani lampolampo ni Jahowa.”

³¹Jadi ibahen si Musa pakon Malim Eleasar ma, songon na tinonahkon ni Jahowa hubani si Musa.

³²Ia buei ni taban-taban ai na teba humbani sagala na tinaban ni parporang ai, ai ma onom ratus pitu puluh lima ribu biribiri,

³³pitu puluh dua ribu lombu,

³⁴onom puluh sada ribu halode.

³⁵Ia buei ni naboru, na so ongga marsaor hubani dalahi, tolu puluh dua ribu halak do bueini.

³⁶Ia bilangan ni na satongah, parbagianan ni halak na bingkat hu parporangan ai, ai ma tolu ratus tolu puluh pitu ribu lima ratus biribiri,

³⁷anjaha guguan hubani Jahowa humbani biribiri ai, onom ratus pitu puluh lima biribiri do;

³⁸lombu tolu puluh onom ribu, anjaha guguan hubani Jahowa hunjai pitu puluh dua.

³⁹Halode tolu puluh ribu lima ratus, anjaha guguan hubani Jahowa onom puluh sada.

⁴⁰Jolma na manggoluh sapuluh onom ribu, anjaha guguan bani Jahowa tolu puluh dua halak.

⁴¹Dob ai ipadas si Musa ma guguan ai bahen galangan, parbagianan ni Jahowa hubani Malim Eleasar, songon na tinonahkon ni Jahowa hubani si Musa.

⁴²Anjaha na satongah nari, na binuat ni si Musa humbani halak parporang ai, anjaha na binerehonni hubani halak Israel,

⁴³na satongah nari ai, ai ma parbagianan ni kuria ai, tolu ratus tolu puluh pitu ribu lima ratus biribiri,

⁴⁴tolu puluh onom ribu lombu,

⁴⁵tolu puluh ribu lima ratus halode

⁴⁶pakon sapuluh onom ribu jolma.

⁴⁷Dob ai ibuat si Musa ma humbani na satongah parbagianan ni halak Israel ai, sada humbani lima puluh, na humbani jolma age na humbani pinahan, ibere ma ai hubani halak Levi, na mangkorjahon horja bani lampolampo ni Jahowa, songon na tinonahkon ni Jahowa hubani si Musa.

⁴⁸Dob ai roh ma hun dohor hubani si Musa sagala pambobai ni na marribu-ribu, kopala ni sisaribu halak pakon kopala ni sisaratus halak,

⁴⁹nini sidea ma hubani si Musa, “Domma ibilangi juakjuakmu sagala halak parporang na i toruh ni parentahnami, anjaha sahalak pe lang na magou hun bennami.

⁵⁰Anjaha iboan hanami do nuan galangan hubani Jahowa, ganup humbani na dapotsi, ugas-ugas omas, golang bani nahei, golang bani pargolangan, tintin sap, anting-anting ampa sinongkok, laho mambahen pardearannami i lobei ni Jahowa.”

⁵¹Dob ai ijalo si Musa pakon Malim Eleasar ma omas ai humbani sidea, sagala ugas-ugas na pinauli.

⁵²Anjaha ganup omas galangan, na binoan ni sidea ai hubani Jahowa, sapuluh onom ribu pitu ratus lima puluh sekel do boratni, ai ma humbani kopala ni sisaribu halak pakon kopala ni sisaratus halak.

⁵³Sagala halak parporang pe adong do ibuat bagianni bei.

⁵⁴Dob ai ijalo si Musa pakon Malim Eleasar ma omas ai humbani kopala ni sisaribu halak pakon sisaratus halak, anjaha iboan sidea ma ai hu lampolampo partumpuan ai bahen pardingatan bani halak Israel i lobei ni Jahowa.