Read Batak Simalungun 4 MUSA 32 Bible Online

4 MUSA 32 - Batak Simalungun bible

4 MUSA 32

¹Ia ginompar ni si Ruben pakon si Gad parpinahan na buei tumang do; ididah sidea ma tanoh Jaeser pakon tanoh Gilead, anjaha tonggor ma, ianan na dear do ai bani halak parpinahan.

²Dob ai roh ma ginompar ni si Gad pakon si Ruben, nini sidea ma hubani si Musa, hubani Malim Eleasar pakon hubani kopala ni kuria ai,

³“Ia Atarot, Dibon, Jaeser, Nimra, Hesbon, Eleale, Sebam, Nebo pakon Beon,

⁴ai ma tanoh, na dob ipatunduk Jahowa i lobei ni kuria Israel, tanoh na dear do ai bani halak parpinahan; anjaha parpinahan do jabolonmu.

⁵Ambah ni ai nini sidea ma, Anggo dapotan idop ni uhur do hanami i lobeimu, nabere ma namin tanoh on bani jabolonmu bahen parbagiananni; ulang ma pala mandipar hanami hu dipar ni Bah Jordan.”

⁶Tapi nini si Musa ma hubani ginompar ni si Gad pakon hubani ginompar ni si Ruben, “Mintor talup ma sanina nasiam laho hu parporangan, tapi nasiam tading ijon marsonang-sonang?

⁷Mase ma pasangsi-sangsion nasiam uhur ni halak Israel, laho mandipar hu tanoh na dob binere ni Jahowa hubani sidea?

⁸Usih sonai do pambahen ni bapa nasiam, sanggah na husuruh sidea hu Kades-Barnea laho mangkahapi tanoh ai.” (bd. 13)

⁹Ai dob tangkog sidea das hu habungan Eskol anjaha ikahapi tanoh ai, gabe ipasangsi-sangsi sidea do uhur ni halak Israel, laho masuk hu tanoh, na dob binere ni Jahowa hubani sidea.

¹⁰Pala gajag ringis ni Jahowa bani ari na sasada ai, anjaha nini marbija,

¹¹“Seng bulih be dalahi sagala na hubobahon tangkog hun tanoh Masir singgan ni na marumur dua puluh tahun pakon lobih hunjai mangidah tanoh na dob hubijahon hubani si Abraham, si Isak pakon si Jakob, ai lang marsijoloman sidea mangirikkon Ahu; [281]

¹²sada pe lang sobali si Kaleb, anak ni si Jepunne, halak Kenisi ai, pakon si Josua, anak ni si Nun, halani marsijoloman do uhur ni sidea mangirikkon Jahowa.”

¹³Jadi gajag ma ringis ni Jahowa mangidah Israel, gabe mawat-awat sidea ibahen i halimisan ompat puluh tahun dokahni paima bois ganup na sasundut ai, na mangkorjahon hajahaton i lobei ni Jahowa.

¹⁴Anjaha tonggor ma, nasiam do use bangkit gantih ni bapa nasiam, sada tumpuan ni ginompar ni pardousa, laho mangambahi pargajag ni ringis ni Jahowa mangidah halak Israel.

¹⁵Anggo marbalik use nasiam hun bani, hundokah ope bangsa on paturutonni i halimisan on, anjaha magou ma bangsa on ganup bahenon nasiam.

¹⁶Dob ai ipadohor sidea ma hu bani, anjaha nini ma, “Sihol pajongjong sopo-sopo do hanami bani pinahannami pakon huta bani anaknami,

¹⁷tapi gopas pe hanami mambobahon halak Israel paima das sidea iboan hanami hubani iananni, tapi maningon marianan do anaknami ibagas huta na marbatar-batar dompak pangisi ni tanoh on hinan.

¹⁸Seng sihol mulak hanami hu rumahnami, anggo lape isoluk halak Israel ganup parbagiananni bei.

¹⁹Ai seng sihol saparbagianan hanami pakon sidea i dipar ni Bah Jordan pakon hujainkonni ai, anggo domma ondos parbagianannami i dipar ni Jordan on hampit hapoltakan.”

²⁰Dob ai nini si Musa ma hubani sidea, “Anggo ibahen nasiam sonai, anjaha gopas nasiam i lobei ni Jahowa laho hu parporangan, [282]

²¹anjaha ganupan nasiam na gopas marsinjata, mandipari Jordan i lobei ni Jahowa paima iusir munsuhni hun lobeini,

²²anjaha dob tunduk tanoh ai i lobei ni Jahowa, ai pe ase mulak nasiam, gabe lang marpipot be nasiam i lobei ni Jahowa pakon Israel; anjaha gabe parbagianan nasiam ma tanoh on i lobei ni Jahowa.

²³Tapi anggo lang ibahen nasiam sonai, tonggor ma, mardousa ma nasiam dompak Jahowa, anjaha botoh nasiam ma, maningon manginsonoh hubani nasiam do dousa nasiam ai.

²⁴Antong pungkah nasiam ma huta bani anak nasiam pakon sopo-sopo bani biribiri nasiam; tapi bahen nasiam homa na binagahkon nasiam ai.”

²⁵Dob ai nini ginompar ni si Gad pakon ginompar ni si Ruben ma hubani si Musa, “Maningon bahenon ni jabolonmu on do songon na hinatahon ni tuannami in.

²⁶Anaknami, parinangonnami, ugas-ugasnami pakon pinahannami maningon tading do ijon ibagas huta ni Gilead;

²⁷tapi anggo hanami jabolonmu maningon mandipar do sagala na gopas marsinjata hu parporangan i lobei ni Jahowa, songon na dob hinatahon ni tuannami.”

²⁸Jadi roh ma tonah ni si Musa pasal sidea hubani Malim Eleasar pakon hubani si Josua, anak ni si Nun, pakon hubani ganup kopala ni halak Israel mar sasamarga.

²⁹Nini si Musa ma hubani sidea, “Anggo mandipar ginompar ni si Gad pakon ginompar ni si Ruben rap pakon nasiam hu dipar ni Jordan, sagala na gopas hu parporangan i lobei ni Jahowa, anjaha tunduk tanoh ai bani nasiam, maningon bereon nasiam do hubani sidea tanoh Gilead bahen parbagianan ni sidea. [283]

³⁰Tapi anggo lang mandipar halak na gopas marsinjata rap pakon nasiam, maningon i tongah-tongah nasiam sidea marbagian i tanoh Kanaan.

³¹Jadi roh ma balos ni ginompar ni si Gad pakon ginompar ni si Ruben mangkatahon, “Barang aha na hinatahon ni Jahowa hubani jabolonmu on, maningon sonai do bahenonnami.

³²Maningon gopas bei hanami marsinjata mandipar i lobei ni Jahowa hu tanoh Kanaan, anjaha totap bennami parbagianannami i dipar ni Jordan.”

³³Jadi ibere si Musa ma hubani ginompar ni si Gad, hubani ginompar ni si Ruben pakon hubani satongah marga Manase, anak ni si Josep, harajaon ni si Sihon, raja ni halak Amori, pakon harajaon ni si Og, raja ni Basan, tanoh ai ampa huta-hutani rap pakon talunni inggot. [284]

³⁴Dob ai ipauli ginompar ni si Gad ma huta Dibon, Atarot pakon Aroer,

³⁵Aterot-Sofan, Jaeser, Jogbeha,

³⁶Bet-Nimra pakon Bet-Haran, sagala huta na marbatar-batar pakon sopo-sopo ni biribiri.

³⁷Anjaha ginompar ni si Ruben paulihon Hesbon, Eleale, Kiriataim,

³⁸Nebo pakon Baal-Meon, na pinaubah goranni ampa Sibmah; anjaha ipaubah sidea ma goran ni huta sagala na pinaulini ai.

³⁹Dob ai laho ma anak ni si Makir, anak ni si Manase hu Gilead, lanjar ipatunduk ma ai, anjaha iusir halak Amori na ijai ai.

⁴⁰Ibere si Musa ma Gilead hubani si Makir, anak ni si Manase, lanjar marianan ma ia ijai.

⁴¹Tapi anggo si Jair, anak ni si Manase, laho ma ia patundukkon dusun-dusun ni sidea, lanjar ibahen ma goranni dusun ni si Jair. [285]

⁴²Laho ma homa si Nobah, anjaha ipatunduk ma Kenat rap pakon sagala dusun-dusunni, anjaha igoran ma ai Nobah mangihutkon goranni.