Read Batak Simalungun 4 MUSA 34 Bible Online

4 MUSA 34 - Batak Simalungun bible

4 MUSA 34

¹Dob ai nini Jahowa ma hubani si Musa,

²“Marsahap ma ho hubani halak Israel anjaha hatahon ma hubani sidea, anggo masuk ma hanima hu tanoh Kanaan, (on ma tanoh ia, na gabe parbagianannima, tanoh Kanaan ronsi parbaloganni) [311]

³bagiannima hampit dangsina singgan ni halimisan Sin mangihut-ihut tanoh Edom; ase parbalogannima hampit dangsina, ai ma singgan ni ujung ni Laut Garam hampit hapoltakan; [312]

⁴anjaha marlegot ma parbalogan ai hun dangsina ni raboyon Akrabim, mandipar hu Sin, anjaha marujung i dangsina ni Kades-Barnea, dob ai luar ma hunjai hu Hazar-Adar, anjaha laho use hu Asmon.

⁵Marlegot use, parbaloganni ai hun Asmon hu Bah Masir, anjaha marujung i laut.

⁶Parbalogannima hampit hasundutan, ai ma laut na bolon ai pakon topini ai, ai ma parbalogan hampit hasundutan.

⁷On ma parbalogan hampit utara, Hun laut na bolon ai pagistangonnima ma ai hu Dolog Hor,

⁸anjaha hun Dolog Hor pagistangonnima ma ai das hu dalan na hu Hamat, anjaha ujung ni parbalogan ai, ai ma i Zedad.

⁹Dob ai gistang ma parbalogan ai hunjai das hu Zifron, anjaha ujungni, ai ma i Hasar Enan; ai ma parbalogannima hampit utara.

¹⁰Anjaha parbalogannima hampit hapoltakan, gistang do ai hun Hasar-Enan das hu Sefam;

¹¹hun Sefam tuad ma parbalogan ai hu Ribla, hampit hapoltakan ni Ain, dob ai tuad use ma parbalogan ai anjaha gistang manopi-nopi Tao Kinneret hampit hapoltakan. [313]

¹²Dob ai tuad ma parbalogan ai hu Jordan, anjaha ujungni bani laut Garam. Ai ma gabe tanohnima pakon parbaloganni inggot.”

¹³Dob ai nini si Musa ma hubani halak Israel, “On ma tanoh ia, sibagionnima marhitei ruji-ruji, na hinatahon ni Jahowa sibereon hubani na siah marga nari pakon hubani na satongah marga Manase.

¹⁴Ai domma dapotan parbagianan marga ni Ruben mar sasaompung pakon marga ni halak Gad mar sasaompung pakon satongah marga Manase; [314]

¹⁵na dua marga pakon na satongah marga nari, domma dapotan parbagianan idipar ni Jordan, tontang ni Jeriko hampit hapoltakan.”

¹⁶Dob ai nini Jahowa ma hubani si Musa,

¹⁷“On do goran-goran ni dalahi na marbagi tanoh in bennima, Malim Eleasar pakon si Josua, anak ni si Nun. [315]

¹⁸Ambah ni ai maningon buatonnima do sada kopala humbani ganup marga laho marbagi tanoh ai.

¹⁹Anjaha on do goran-goran ni dalahi ai: Humbani marga Juda, si Kaleb, anak ni si Jepunne; [316]

²⁰humbani marga Simeon, si Samuel, anak ni si Amihud;

²¹humbani marga Benjamin, si Elidad, anak ni si Kislon;

²²humbani marga Dan, sada kopala, si Buki, anak ni si Jogli;

²³humbani anak ni si Josep, si Haniel, anak ni si Epod, sada kopala humbani marga Manase;

²⁴humbani marga Efraim, sada kopala, si Kemuel, anak ni si Siftan;

²⁵humbani marga Sebulon, sada kopala, si Elisapan, anak ni si Parnah;

²⁶humbani marga Isasar, sada kopala, si Paltiel, anak ni si Assan;

²⁷humbani marga Asser, sada kopala, si Ahihud, anak ni si Selomi;

²⁸humbani marga Naftali, sada kopala, si Pedahel, anak ni si Amihud.

²⁹Ai ma dalahi, sagala na tinonahkon ni Jahowa mambagihon tanoh Kanaan bani halak Israel.”