Read Batak Simalungun 4 MUSA 8 Bible Online

4 MUSA 8 - Batak Simalungun bible

4 MUSA 8

¹Dob ai nini Jahowa ma hubani si Musa,

²“Marsahap ma ho hubani si Aron anjaha hatahon ma hu bani, anggo ipagara ho palita ai, maningon hu lobei ni parpalitaan ai marsinalsal palita na pitu ai.” [69]

³Jadi ibahen si Aron ma sonai; hampit lobei ni parpalitaan ai do ipagara palitani, romban hubani tonah ni Jahowa hubani si Musa.

⁴Sonon do parpaulini bani parpalitaan ai: Itopa do ai humbani omas pitah; age naheini sonai homa bungani, romban hubani tiruan na pinatuduhkon ni Jahowa hubani si Musa, sonai do ipauli parpalitaan ai.

⁵Dob ai nini Jahowa ma hubani si Musa,

⁶“Arahkon ma halak Levi hun tongah-tongah ni halak Israel, anjaha urasi ma sidea. [70]

⁷Anjaha sonon do bahenonmu hubani sidea laho mangurasi sidea, Pispiskon ma hubani sidea bah pangurasion hubani dousa, dob ai suhuron ni sidea ma ganup badan ni sidea, anjaha susionni pakeanni ase borsih sidea. [71]

⁸Dob ai buaton ni sidea ma sada anak ni lombu rap pakon itak na lumat, na niagu pakon minak bahen galangan sipanganon iringanni ai, dob ai buatonmu ma sada nari anak ni lombu bahen galangan pardousaon.

⁹Dob ai hatahon ma halak Levi roh hun dohor hu lobei ni lampolampo partumpuan ai, anjaha patumpu ma ganup tumpuan ni halak Israel.

¹⁰Anggo domma ipatumpu ho halak Israel hu lobei ni Jahowa, tampeihonon ni halak Israel ma tangan ni sidea hubani halak Levi.

¹¹Anjaha toguon ni si Aron ma halak Levi ai hu lobei ni Jahowa, songon sada galangan sitatangon humbani halak Israel, ase talup sidea mangkorjahon horja ni Jahowa. [72]

¹²Dob ai nahkonon ni halak Levi ma tangan ni sidea hubani ulu ni lombu ai, anjaha galangkononmu ma na sada bahen galangan pardousaon anjaha na sada nari bahen galangan situtungon bani Jahowa, mambahen pardearan bani halak Levi.

¹³Dob ai maningon pajongjongonmu halak Levi i lobei ni si Aron pakon anakni ai, laho mangondoskon sidea songon galangan sitatangon bani Jahowa.

¹⁴Sonai ma papuligonmu halak Levi hun tongah-tongah ni halak Israel, ase Ahu simada halak Levi. [73]

¹⁵Dob ai masuk ma halak Levi ai, ase marugas sidea ibagas lampolampo partumpuan ai, dobkonsi iurasi anjaha iondoskon ho sidea songon galangan sitatangon.

¹⁶Ai sibere-bere Bangku do sidea hun tongah-tongah ni halak Israel; ai gantih ni na parlobei hun partapaan, sagala bunga tubuh humbani halak Israel do sidea Hubuat Bangku. [74]

¹⁷Ai Ahu do simada ganup bunga tubuh i tongah-tongah ni halak Israel, age na humbani jolma, age na humbani pinahan, singgan ni ari dob Hubunuh bunga tubuh i tanoh Masir, domma Hupapansing sidea Bangku, [75]

¹⁸anjaha domma Hubuat halak Levi gantih ni sagala bunga tubuh i tongah-tongah ni halak Israel.

¹⁹Domma Hulayak-layakkon halak Levi bahen hasoman ni si Aron pakon anakni ai hun tongah-tongah ni halak Israel laho marugas bani lampolampo partumpuan ai, anjaha mambahen pardearan bani halak Israel, ase ulang masa papa i tongah-tongah ni halak Israel, anggo roh sidea hun dohor bani ianan na pansing ai.” [76]

²⁰Dob ai ibahen si Musa pakon si Aron ampa haganup tumpuan ni halak Israel ma sonai hubani halak Levi romban hubani haganup na tinonahkon ni Jahowa hubani si Musa pasal halak Levi ai, sonai do ibahen halak Israel hubani sidea.

²¹Dob ai iurasi halak Levi ma dirini bei humbani dousa, anjaha isusi bei ma pakeanni, anjaha iondoskon si Aron ma sidea songon galangan sitatangon i lobei ni Jahowa, anjaha si Aron do mambahen pardearan bani sidea laho papansingkon sidea, [77]

²²Dob ai masuk ma halak Levi, laho mandalankon horja ni sidea ibagas lampolampo partumpuan ai i lobei ni si Aron pakon anakni ai; songon na tinonahkon ni Jahowa hubani si Musa pasal halak Levi ai, sonai do ibahen hubani sidea.

²³Dob ai nini Jahowa ma hubani si Musa,

²⁴“On do na mardomu hubani halak Levi: Singgan ni na marumur dua puluh lima tahun pakon i atasni ai, maningon masuk sidea laho mangkorjahon horja ibagas lampolampo partumpuan ai, [78]

²⁵tapi dob marumur lima puluh tahun, maluah ma sidea humbani horja parugason, seng be marhorja sidea.

²⁶Boi do namin urupan ni sidea anggini marhorja i lampolampo partumpuan ai, laho mangkorjahon sihorjahononkon, tapi seng be bulih sidea marjabatan. Sonai ma bahenonmu hubani halak Levi, pasal sihorjahonon ni sidea.”