Read Batak Simalungun MIKA 1 Bible Online

MIKA 1 - Batak Simalungun bible

MIKA 1

¹Hata ni Jahowa, na roh bani si Mika, par Moreset ai, bani panorang ni si Jotam, si Ahas pakon si Hiskia, raja ni Juda, ai ma na niidahni pasal Samaria ampa Jerusalem. [1]

²Tangar ma, nasiam ganup bangsa! Paruhurhon nasiam ma tanoh ampa pangisini, paboa Tuhan Jahowa do manaksihon mangimbang nasiam, Tuhan in, hun rumah hapansingon-Ni ai. [2]

³Tonggor ma, luar do Jahowa humbani ianan-Ni, tuad do Ia, mardalan i atas buntu-buntu ni tanoh on. [3]

⁴Malala do dolog i toruhni, anjaha mabolah habungan songon pantis i lambung apuy, songon bah madurus bani raboyon. [4]

⁵Halani panlanggaron ni Jakob do ganupan ai anjaha halani dousa ni Israel. Hunja do hasalahan ni Jakob? Ai lang hun Samaria do ai? Anjaha hunja do dousa ni ginompar ni Juda? Ai lang hun Jerusalem do ai? [5]

⁶Jadi bahenon-Ku ma Samaria gabe gugunan batu i tongah ladang, gabe pohon panuanan ni anggur mando; gulangkonon-Ku ma batuni hu habungan, anjaha patidakon-Ku onjolanni.

⁷Ganup gana-ganani ropukonkon do, anjaha ganup upah parriah-riahonni mosogkonon do, anjaha ganup sisombahonni sedahonon-Ku do; ai humbani upah ni boru jalang do ai ipatumpu sidea, anjaha maningon mulak do ai gabe upah ni boru jalang. [6]

⁸Halani ai do ase tangis anjaha doruh-doruh ahu, mardalan seng marsipatu anjaha talanjang do ahu; dokik-dokik do ahu songon baliang harangan anjaha doruh-doruh songon manuk-manuk unta, [7]

⁹ai seng hatambaran ugah ni panlonsingan ni Jahowa, anjaha torus do ai hu Juda, das hu horbangan ni bangsangku, das hu Jerusalem.

¹⁰Ulang patugah nasiam ai i Gat, ulang tangis nasiam i Akko; i Betleapra ma nasiam margulu i abuan. [8]

¹¹Bingkat ma nasiam pangisi ni Sapir, talanjang marhahirion; borani luar ia pangisi ni Saanan. Tangis-tangis ni Bet-Ezel manlanglangi nasiam marianan ijai. [9]

¹²Hitir do pangisi ni Marot paima-imahon na madear, halani domma turun hamagouan humbani Jahowa age bani horbangan ni Jerusalem. [10]

¹³Pasang nasiam ma huda bani gareta, nasiam pangisi ni Lakis; in do parmulaan ni dousa bani boru Sion, ai bamu do jumpah panlanggaron ni Israel.

¹⁴Halani ai bere ma surat sirang bani Moreset-Gat. Rumah-rumah ni Aksib do gabe sipangoto-otoi bani raja ni Israel.

¹⁵Ambahni ai parohon-Ku ope sipartaban bam, ale pangisi ni Maresa, das ronsi Adullam roh na sangap-sangap ni Israel.

¹⁶Palpali dirimu, marsuhur ma ho halani anak haudungan ni uhurmu; pabolag palpalmu songon haluhuy, ai boanon ma sidea humbam hu habuangan.