Read Batak Simalungun MIKA 3 Bible Online

MIKA 3 - Batak Simalungun bible

MIKA 3

¹Dob ai ningku ma, “Tangihon ma, nasiam kopala-kopala ni Israel, ampa nasiam sigomgom ginompar ni Israel! Ai lang talup do botohon nasiam uhum? [18]

²Nasiam na magigi bani na madear, na marosuh bani na masambor, na manlikliki hulingkuling ni angkula ni sidea, anjaha na mambuati sibuk-sibuk ni sidea humbani holi-holini, [19]

³na mamangani sibuk-sibuk ni bangsangku, na manlikliki hulingkuling ampa na manropuki holi-holi ni sidea, na manggatgati sidea songon gulei ibagas hudon, songon toktokni ibagas balanga. [20]

⁴Dob ai dilo-dilo ma sidea bani Jahowa, tapi seng anjai balosan-Ni sidea lingodkonon-Ni ma bohi-Ni dompak sidea bani panorang ai, halani na jahat ai pambahenan ni sidea. [21]

⁵Sonon do hata ni Jahowa dompak nabi, na pakahouhon bangsangku, na mandilo-dilohon “damei”, anggo dong sihilhilon ni ipon ni sidea, tapi na maningtingkon porang dompak halak na so mannahkon atap aha bani pamanganni? [22]

⁶Halani ai roh ma borngin bannima, na so marpanonggoran, ampa hagolapan na so marpanjahaion. Sundut ma mata ni ari bani nabi-nabi on, anjaha gabe halotiron ma arian bani sidea. [23]

⁷Mela ma halak na marpanonggoran, anjaha bador ma halak sipanjahai; haganup sidea manrungkub gumisni, ai seng dong roh balos humbani Naibata.

⁸Tapi anggo ahu gok do bangku kuasa. Tonduy ni Jahowa, uhum ampa hagogohon, laho patugahkon panlanggaronni hubani Jakob ampa dousani hubani Israel. [24]

⁹Tangihon ma on, nasiam kopala-kopala ni ginompar ni Jakob ampa nasiam pambobai ni ginompar ni Israel, na mangkagigihon uhum, tapi na papeolhon sagala na pintor, [25]

¹⁰na paulihon Sion marhitei daroh ampa huta Jerusalem marhitei hagedukon. [26]

¹¹Manjalo sisip do kopala ni sidea mandabuh uhum, malim ni sidea manjalo upah mamodahi, anjaha nabi ni sidea manjalo pirak do manjahai, lanjar mangunsagah ope sidea marhitei Jahowa, nini, “Ai lang Jahowa do i tongah-tongahta? Seng tumaram sogop banta hamagouan!” [27]

¹²Ai pe, halani nasiam maningon tinggalaon do Sion songon juma, Jerusalem maningon gabe gugunan batu, anjaha dolog onjolan ni rumah panumbahan ai gabe harangan. [28]