Read Batak Simalungun MIKA 4 Bible Online

MIKA 4 - Batak Simalungun bible

MIKA 4

¹Jadi masa do holi bani ari parpudi: Jonam ma dolog ianan ni rumah ni Jahowa gijangan humbani dolog-dolog, anjaha atasan humbani raboyon. Jadi marurup ma hujai bangsa-bangsa,

²anjaha buei bangsa sipajuh begu-begu laho hujai, nini, “Eta, laho ma hita tangkog hu dolog ni Jahowa, hu rumah ni Naibata ni si Jakob, ase iajarhon banta dalan-Ni, anjaha mardalan hita bani dalan-Ni. Ai hun Sion do roh titah anjaha hata ni Jahowa hun Jerusalem.” [29]

³Jadi manguhum ma Ia itongah-tongah ni buei bangsa, anjaha bahenon-Ni ma haputusan mangonai bangsa-bangsa na bolon das hubani na daoh, jadi patopahonon ni sidea ma podang ni sidea gabe tinggala, anjaha tanja ni sidea gabe sasabi. Seng be sintakon ni bangsa dompak bangsa podang, anjaha seng be guruhonon ni sidea parmunsuhon.

⁴Hundul bei ma sidea i toruh ni hayu anggurni ampa i toruh ni hayu arani, anjaha seng dong be na manonggoti sidea, ai pamangan ni Jahowa Zebaot do mangkatahon in. [30]

⁵Ai ganupan bangsa mardalan ibagas goran ni naibatani bei, tapi anggo hita ibagas goran ni Jahowa Naibatanta do mardalan ronsi sadokah ni dokahni. [31]

⁶“Bani ari ai,” nini Jahowa, “patumpu-tumpuon-Ku ma halak na tempang, anjaha pahumpulon-Ku ma halak na dob nierapkon ampa na dob Hupasipal hinan. [32]

⁷Pagoluhon-Ku ma na mengkat-engkat ai gabe simasima, anjaha bangsa na dob nierapkon ai gabe bangsa na gogoh, anjaha Jahowa raja ni sidea i Dolok Sion olat ni on ronsi sadokah ni dokahni. [33]

⁸Tapi anggo ho, ale Migdal-Eder, buntu-buntu ni boru Sion, roh do bam, mulak do bam panggomgomion sapari, ai ma panrajaion ni boru Jerusalem. [34]

⁹Tapi nuan, mase sonai gogoh ni pandoruhmu? Seng dong be raja i tongah-tongahmu? Ai na dob matei do sipanuturi bam, ase mangarou ho songon puang-puang na laho mangintubuh? [35]

¹⁰Odonkon anjaha guaskon ma, ale boru Sion, songon puang-puang na laho mangintubuh. Ai maningon luar do ho nuan hun huta in, anjaha marianan i ladang, maningon laho do ho hu Babel. Ijai ma ho paluahon, ijai ma ho tobuson ni Jahowa hun tangan ni munsuhmu.

¹¹Tapi nuan, martumpu do buei bangsa sipajuh begu-begu dompak ho, na mangkatahon, “Nibutakan ma in, ase marsombuh-sombuh matanta mangidah Sion.” [36]

¹²Seng ibotoh sidea pingkiran ni Jahowa anjaha seng iarusi sidea sura-sura-Ni, ai ma na patumpuhon sidea songon radean hu pardogeian.

¹³“Jongjong ma ho anjaha mardogei ma, ale boru Sion, ai bahenon-Ku ma tandukmin gabe bosi anjaha sisilonmu gabe tombaga, gabe marosak ma bahenonmu buei bangsa, anjaha papuligonmu ma bani Jahowa pansarian ni sidea ai, habayakon ni sidea ai bani Tuhan sigomgom ganup tanoh on.” [37]

¹⁴Ai pe roh ma hanima marhulan-hulan, ale boru siparmunsuh! Domma hona hubu hita, anjaha marhitei tungkot ilibas huyum ni siuhum Israel. [38]