Read Batak Simalungun MIKA 5 Bible Online

MIKA 5 - Batak Simalungun bible

MIKA 5

¹ “Tapi anggo ho, ale Betlehem Eprata, age pe etek ho i tongah-tongah ni marga Juda, humbam do roh Bangku na gabe panggomgomi bani Israel, anjaha harorohanni humbani nahinan, humbani ari na basaia.” [39]

²Halani ai ondoskonon do sidea bani munsuh das bani panorangni, paima tubuhan tuah na mantubuhkon ai; dob ai mulak ma simasima ni saninani ai hubani halak Israel. [40]

³Dob ai jongjong ma Ia marmahan sidea marhitei gogoh ni Jahowa, marhitei hamuliaon ni goran ni Jahowa Naibatani ai. Dob ai sonang ma sidea marianan, ai timbul ma Ia ronsi ujung ni tanoh on, [41]

⁴anjaha Ia ma gabe hadameion. Anggo roh Assur hu tanohta anjaha imasuki rumah bolonta, jadi bahenonta ma mangimbangsi pitu parmahan ampa ualuh raja humbani jolma. [42]

⁵Jadi gomgoman ni sidea ma Assur marhitei podang ampa tanoh ni si Nimrod marhitei sinjata na sinintak. Anjaha paluahon-Ni ma hita humbani Assur, anggo roh ia hu tanohta anjaha imasuki nagorinta.

⁶Jadi songon namur humbani Jahowa ma simasima ni Jakob i tongah-tongah ni buei bangsa-bangsa, songon udan bani poyon-poyon, na so bani jolma, barang marpangajaman bani anak ni jolma. [43]

⁷Ambahni ai, ia simasima ni si Jakob i tongah-tongah ni bangsa sipajuh begu-begu, i tongah-tongah ni buei bangsa, gabe songon singa ma i tongah-tongah ni binatang harangan, songon singa poso-poso i tongah-tongah ni hulanan ni biribiri, anggo roh ia mandorab ampa mamparsilbak, tapi ise pe lang na paluahkon. [44]

⁸Jadi marhamonangan ma tanganmu dompak na mangimbang ho, anjaha siap ma ganup munsuhmu.

⁹“Bani ari ai masa ma,” nini Jahowa, “raseihonon-Ku ma hudamu hun tongah-tongahmin, anjaha siapkonon-Ku ma gareta porangmu. [45]

¹⁰Parsedaon-Ku ma huta bolon na i tanohmu anjaha reongkonon-Ku sagala benteng-bentengmu.

¹¹Sonai homa tabas-tabas masabkonon-Ku ma hun tanganmu, anjaha seng dong be sipartondung bam.

¹²Anjaha siapkonon-Ku ma homa gana-gananima ampa batu sisombahonnima hun tongah-tongahnima, anjaha seng be marsombah ho bani jadi-jadian ni tanganmu. [46]

¹³Orbaton-Ku ma homa Aseramu hun tongah-tongahmu, anjaha siapkonon-Ku ma homa sisombahonmu.

¹⁴Anjaha bahenon-Ku ma pambalason ibagas gila ampa ringis dompak bangsa sipajuh begu-begu na so ra mambalosi.”