Read Batak Simalungun MIKA 6 Bible Online

MIKA 6 - Batak Simalungun bible

MIKA 6

¹Tangihon nasiam ma na hinatahon ni Jahowa. Jongjong ma Ham, bahen Ham ma panguhumon dompak dolog-dolog, anjaha pabogeihon ma sora-Mu dompak buntu-buntu. [47]

²Tangihon nasiam ma dolog-dolog, pangaduan ni Jahowa ampa nasiam onjolan ni tanoh na jonam, ai adong do pangaduan ni Jahowa dompak bangsa-Ni, sihol marturiak Ia pakon Israel. [48]

³“Ale bangsang-Ku, aha do pambahenan-Ku na lepak bam? Marhitei aha Hulojai ho? Balosi Ahu! [49]

⁴Halani na Huarahkon ho luar hun tanoh Masir, anjaha Hupaluah ho hun rumah parjabolonanmu, anjaha Husuruh si Musa, si Aron ampa si Miryam mambobahon ho? [50]

⁵Ale bangsang-Ku, sai ingat ma tahi-tahi ni si Balas, raja ni Moab ampa balos ni si Bileam, anak ni si Beor ai bani, sonai homa na masa hun Sittim nari das hu Gilgal, ase itanda ho habujuron ni Jahowa.” [51]

⁶Marhitei aha tarbahen ahu manjumpahkon Jahowa, laho marsombah i lobei ni Naibata na i babou? Marhitei galangan situtungon do gakni tarjumpahkon ahu Ia, atap marhitei anak ni lombu na marumur satahun? [52]

⁷Marosuh do gakni uhur ni Jahowa mangidah hambing tunggal na marribu-ribu barang mangidah habaoran ni minak na marloksa-loksa? Berehononku ma nani bunga tubuhku halani panlanggaronku, boras ni boltokku halani pardearan ni tonduyhu?

⁸ Domma ipabotohkon bam ale jolma, barang aha na madear ampa barang aha na pinindahan ni Jahowa humbam, ai ma na mangkorjahon hasintongan ampa na mandalankon halayakon anjaha marparlahou ibagas toruh ni uhur i lobei ni Naibatamu. [53]

⁹Dilo-dilo do sora ni Jahowa hu huta ai, anjaha hapentaran do ai mangkabiari goran-Ni. “Bogei hanima ma bangsa na marianan i ladang ampa na i huta!

¹⁰Mintor tarhalupahon Ahu ma arta hajahaton na i rumah ni parjahat ampa suhat-suhat na etektu, sihagigihononkon? [54]

¹¹Mintor tarhadearhon Ahu ma simada timbangan na lepak ampa parranjut-ranjut na marisi batu timbangan na palsu? [55]

¹²Gok hakorason do halak na bayak na i kota, parladung do pangisini, anjaha pangoto-otoion do i toruh ni dilah ni sidea. [56]

¹³Ahu pe pungkahon-Ku ma manguhum ho, siapkonon-Ku ma ho halani dousamu.

¹⁴Mangan pe ho seng anjai bosur, loheian do ho tong ibagas; aha na niluahkonmu, seng maluah, anjaha aha na pinaluahmu, ondoskonon-Ku do ai bani podang. [57]

¹⁵Martidah pe ho, hape seng marpariama, mardogei buah ni hayu jetun pe ho, tapi seng bulih minakanmu dirimu bani minak ai; age pe mangkilang buah ni anggur ho, seng bulih inumonmu anggur ai. [58]

¹⁶Ai idalankon hanima do aturan ni si Omri ampa horja-horja ni ginompar ni si Ahab, anjaha mardalan hanima ibagas sura-sura ni sidea. Halani ai bahenon-Ku ma hanima tarulang ampa pangisini gabe sisurak-surakon; sonai ma hanima mangusung pandorun ni bangsa-bangsa. [59]