Read Batak Simalungun MIKA 7 Bible Online

MIKA 7 - Batak Simalungun bible

MIKA 7

¹Ngalutni in bangku, ai usih do ahu bani na patumpuhon buah ni hayu, songon na marturiang buah ni anggur, seng dong be buah ni anggur panganon, seng dong be buah ni hayu ara sidingaton ni uhurhu.

²Domma siap halak na daulat hun tanoh on, anjaha seng dong be halak parpintor i tongah-tongah ni jolma. Ganup sidea mambahen paronggopan laho manduruskon daroh; ganup marsitaon tirangkapni bei dompak hasomanni. [60]

³Hinsah do tangan ni sidea mangkorjahon na masambor; igil do halak na sangap-sangap, panguhum manjalo sisip anjaha halak na markuasa uhur-uhurni do ibahen; sonai do pandalankon ni sidea. [61]

⁴Halak sidearan humbani sidea, songon suga do, anjaha sipintoran songon tatada. Domma roh ari parkahapon bam, ari pambalason bam, dohor ma hasonggoton bani sidea.

⁵Ulang ma dong na porsaya bani kawanni; ulang ma marhatengeran bani hasomanni; jaga homa bibir ni pamanganmu age dompak naboru na modom bani abinganmu. [62]

⁶Ai anak pe seng ipasangap bapani, anjaha boru jongjong manlawan inangni, parumaen dompak simatuani, ase munsuh ni halak ma hasomanni sarumah. [63]

⁷Tapi anggo ahu mangkawah bani Jahowa do, anjaha mangarap do ahu bani Naibata ni haluahonku; sai tangihonon ni Naibatangku do ahu.

⁸Ulang ma ho marmalas ni uhur, alo munsuhku, mangidah ahu; ai jomba pe ahu, sai na jongjong do use, ai hundul pe nuan ahu ibagas hagolapan, Jahowa do panondang bangku. (Obj. 12)

⁹Usungonku do ringis ni Jahowa, ai hu Bani do ahu mardousa, paima iapiti ahu anjaha ipintori, itogu ahu hu haliharon, gabe huidah hapintoron-Ni. [64]

¹⁰Jadi idahon ni munsuhku ma ai, gabe rongkobon ni habadoron ma ia, ai ma na mangkatahon hu bangku, “Ija do Jahowa Naibatamu?” Marpuas-puas do matangku mangidahsi; idogei-dogei do ia nuan songon hubang i alaman. [65]

¹¹Na roh ma sada ari, paulion ma use ijai tembokmu. Bani ari ai palumbangon ma parbaloganmu. [66]

¹²Bani ari ai roh ma sidea bam, hun Assur das hu Masir, hun Masir das hu Bah Eprat, hun laut na sada das hu laut na sada nari ampa hun dolog na sada das hu dolog na sada nari. [67]

¹³Tapi gabe halimisan ma tanoh ai halani pangisini, marhalanihon ni pambahenan ni sidea. [68]

¹⁴Parmahani Ham ma bangsa-Mu marhitei simambu-Mu, biribiri parbagianan-Mu, na marianan pulou i harangan, i tongah-tongah ni tanoh na lambutan; lopas Ham ma sidea manampal i Basan ampa i Gilead songon sapari. [69]

¹⁵Songon bani panorang parpadarat-Mu hun Masir, pataridahkon Ham ma bennami halongangan.

¹⁶Idahon ni bangsa sipajuh begu-begu ma ai, gabe bador ma sidea marhalanihon ni ganup hagogohon ni sidea ai; tutupon ni sidea ma pamanganni bani tanganni, anjaha nengel ma pinggol ni sidea. [70]

¹⁷Dilaton ni sidea ma tanoh songon ulog, songon sagala na manjulur i tanoh; gobir-gobir ma sidea roh humbagas bentengni, hitir-hitir manjumpahkon Jahowa Naibatanta, anjaha marhabiaran ma sidea bam. [71]

¹⁸ Ise ma Naibata usih songon Ham, na manasap dousa anjaha na manalpuhon panlanggaron ni simasima ni parbagiananni? Seng lalab itahan-tahan ringis-Ni, ai marharosuh do Ia bani idop ni uhur. [72]

¹⁹Sai marpangulaki do uhur-Ni maridop ni uhur banta, anjaha dogei-dogeion-Ni do hajahatonta. Nai ma tongon, gijigkonon-Mu do ganup dousanami hubagas laut. [73]

²⁰Sai patidakon-Mu do habujuron bani si Jakob, idop ni uhur bani si Abraham, na dob binulawankon-Mu bani ompungnami humbani sapari nari. [74]