Read Batak Simalungun NAHUM 1 Bible Online

NAHUM 1 - Batak Simalungun bible

NAHUM 1

¹Panjahaion Pasal Ninive. Buku Pangungkabon ni si Nahum, halak Elkos ai.

²Naibata parsimburu anjaha pambalas do Jahowa; sipambalas do Jahowa anjaha parringis tumang. Sipambalas do Jahowa dompak imbang-Ni, anjaha totap manggila dompak munsuh-Ni. [1]

³Tongon nanget do Jahowa manringis anjaha paridop ni uhur banggal, tapi sai na marlulu do Ia. Marhasoman habahaba ampa halisungsung do Ia mardalan. anjaha hombun do orbuk ni nahei-Ni. [2]

⁴Mangonai hata Ia bani laut, gabe horah do, anjaha ipahorah do ganup bah mardalan. Horah do Basan ampa Karmel, anjaha melus bunga ni Libanon.

⁵Dugur do dolog i lobei-Ni anjaha malala buntu-buntu; gobir do tanoh on i lobei-Ni, dunia on ampa haganup isini. [3]

⁶Ise ma na tahan jongjong mandompakkon gajag ni gila-Ni? Ise ma na pag manjumpahkon gara ni ringis-Ni? Marjimbur-jimbur do songon apuy gila-Ni, anjaha mangkatorban dolog batu i lobei-Ni.

⁷ Pardear layak do Jahowa, benteng bani panorang hasosakan; anjaha itanda do na marhaporusan Bani. [4]

⁸Tapi marhitei bah na sumbang siap tumang do ibahen na mangimbang-Si anjaha idakdaki do munsuh-Ni hubagas na golap.

⁹Aha do na tinahi ni uhurnima dompak Jahowa? Siap tumang do ai bahenon-Ni, seng pala dua hali timbul hasosakan.

¹⁰Songon suga-suga na itagili bois sidea, songon anggala na horah tene mosog sidea.

¹¹Ai lang hun tongah-tongahmu do luar halak na manguhurhon hajahaton dompak Jahowa, halak na manranggihon na masambor tumang?

¹²Sonon do hata ni Jahowa, “Age pe gogoh anjaha buei sidea, maningon sabion do sidea ase masab sidea. Age pe domma Hupatoruh ho, seng be patoruhon-Ku ho. (Jes. 36)

¹³Sonari pe buaton anjaha ponggolhonon-Ku ma pasanganmu humbam, anjaha rotapon-Ku ma garimu.

¹⁴Tapi dompak ho iparentahkon Jahowa do, ʻSeng be patotapon goranmu; hun rumah ni naibatamu siapkonon-Ku ma gana-gana na niuhir ampa gana-gana na tinuang: Ahu do na pasirsirhon tanomanmu, ai siambukkonon do ho.ʼ ”