Read Batak Simalungun NAHUM 2 Bible Online

NAHUM 2 - Batak Simalungun bible

NAHUM 2

¹Tonggor ma, i atas ni dolog nahei ni siboan Ambilan Na Madear, na maningtingkon damei! Pestahon pestamu ale Juda, galari bagah-bagahmu, ai seng anjai roh be parjahat mangimbang ho, domma siap botul ia. [5]

²Domma tangkog dompak ho pamerapkon! Jaga ma benteng ai! Marjaga-jaga ma i dalan, mamonting bei ma, pakei ma gogohmu!

³Ai Jahowa do pasuangkon hayu anggur ni Jakob songon hayu anggur ni Israel; ai domma irampok panrampok sidea, anjaha iparseda rantingni. [6]

⁴Gerger do gantar-gantar ni puanglimani, marbaju hasumba do balani. Marlinang songon apuy gareta-garetani bani ari parbingkatni, anjaha iawas-awaskon tanja.

⁵Marpojong gareta-gareta i dalan, marhujai-hujon i tanoh lapang; rupani songon rigapan, anjaha songon hilap pardetesni.

⁶Idingat raja ai ma puanglimani, hape marsijombaan do sidea bani nilangkahkonni bei; tarolos sidea marayak tembok, hape domma sonson onding-onding partahanan.

⁷Mungkab ma horbangan na bani bah banggal ai, jadi gobir ma istana ai.

⁸Ipasalang ma raja naboru ai anjaha iboan hu habuangan; gabe songon parturtu ni kuhuy ma partangis ni jabolonni naboru, anjaha ibogbogi bei tontonni.

⁹Songon bongbongan ma Ninive, na mabaor bahni. “Soh! Soh!” Nini sidea, tapi sahalak pe lang adong be na ra mulak.

¹⁰Buati ma pirak in, buati ma omas in! Ai lang marnabois arta ai, sumbang tumang bagei-bagei ni na maharga.

¹¹Lumei! Halumeion ampa hasiapon! Atei-atei na madotei ampa towod na hitir-hitir! Gobir sagala binongei, anjaha marposi sagala bohi. [7]

¹²Ija do nuan ianan ni singa ondi ampa liang ni singa, ai ma parponopanni, anjaha aha pe lang na mangganggusi ijai?

¹³Ija do nuan singa ai, na manoroh ase sungkupan anakni, anjaha na mamongkiki sisorohanni bani boru-boruni, na manggoki liangni bani sorohanni ampa iananni bani na pinarsirakni?

¹⁴“Tonggor ma, marlulu do Ahu dompak ho,” nini Jahowa Zebaot; “martimpul ma bahenon-Ku timus ni garetamu, anjaha bois ma bahenon singa poso-posomu marhitei podang. Siapkonon-Ku ma sorohanmin hun tanoh on, anjaha seng be tarbogei sora ni suruhanmu.”