Read Batak Simalungun NAHUM 3 Bible Online

NAHUM 3 - Batak Simalungun bible

NAHUM 3

¹“Papa ma bani huta sisopsop daroh, na gok ladung ampa paksa, lang maronti panrampokon! [8]

²Bogei! Parlisik ni lonsing-lonsing, pargurojob ni galapang! Bogei! Huda na marangkat dua ampa gareta na marpojong.

³Siajak huda na rongom roh, podang na marjilam-jilam ampa tanja na mirlak; buei ni halak na tinampul, marjunjun anjaha lang tarhira bangkei, lang marnarotap bangkei gabe mangkatargompang sidea bani bangkei ai.

⁴Anjaha ganupan ai binahen ni hinabuei ni ulah ni boru jalang do, na jenges-jenges na pandei mandari-dari, na manjualhon bangsa-bangsa marhitei parbangkisonni ai ampa marga marhitei uti-utianni ai. [9]

⁵Tonggor ma, marlulu do Ahu dompak ho,” nini Jahowa Zebaot. “Sintakon-Ku ma hioumin das bani bohimu, anjaha patidakon-Ku ma hatalanjangonmin bani bangsa-bangsa ampa habadoronmu bani harajaon-harajaon. [10]

⁶Gijigkonon-Ku ma bam na mabutak, pabadoron-Ku ma ho, anjaha bahenon-Ku ma ho gabe sitontonan.

⁷Anjaha sagala na mangidah ho, maporus ma humbam, anjaha nini ma, ʻDomma hansur Ninive, ise ma na manangisi?ʼ Hunja ma pindahan-Ku na mangapohi ai?

⁸Mintor dearan ma ho hun bani, na marianan bani topi ni Bah Nil, na niinggotan ni bah, na marbatar-batarhon laut anjaha na martembokkon bah? [11]

⁹Etiopia do hagogohon bani ampa Masir na so marpispis ai: Put ampa Libia sipangurupi bani.

¹⁰Tapi sidea pe domma hu habuangan, maningon laho hu tahanan; dakdanakni irosaki i suhi-suhi ni ganup dalan. Marruji-ruji do halak pasal na sangap ni sidea, anjaha ganup pambosarni isangkut do bani gari. [12]

¹¹Ho pe maningon mabuk do, maningon mirdong do, maningon pindahanmu do haporusan i lobei ni munsuhmu. [13]

¹²Sagala bentengmu usih do bani hayu ara na marboras mula-mula; anggo idugur mintor mardabuhan ma bani pamangan ni na mangankon.

¹³Tonggor ma, doskon naboru do balamu i tongah-tongahmu. Mungkab do horbangan ni tanohmu jumpahon ni munsuhmu, anjaha panganon ni apuy do pating-patingmu. [14]

¹⁴Tahui ma bah managam pangkubu, anjaha patoguh bentengmu! Masuk ma hu tanoh parhalampungan, luntak ma tanoh halampung ai, anjaha buat ma panuangan ni batu!

¹⁵Sai na bois do ho panganon ni apuy ijai, siapkonon ni podang ma ho. Bondutonni ma ho songon balang. Pabuei ma dirimu songon tamponok, pabuei songon balang! [15]

¹⁶Bahatan do partiga-tigamu ibahen ho humbani bintang na i langit; ipaherbang balang ai ma habongni anjaha habang ma ia lintun.

¹⁷Songon balang do gamot-gamotmu, anjaha jurutulismu songon balang na marhulanan, na sogop bani tembok sanggah borgoh ni ari; tapi poltakkonsi mata ni ari habang ma; seng dong na mambotoh, ija hinan iananni.

¹⁸Munduk-unduk do parmahanmu, ale raja ni Assur, tarpodom na sangap-sangapmu. Merap do bangsamu i dolog-dolog, ise pe lang na patumpuhon.

¹⁹Seng hatambaran luhamu, parah do ugahmu. Sagala na mambogei baritamu martopap do halani ho. Ai ise ma na so ihonai hajahatonmu na so marhinggan ai?” [16]