Read Batak Simalungun HABAKUK 1 Bible Online

HABAKUK 1 - Batak Simalungun bible

HABAKUK 1

¹Pangungkabon na nididah ni Nabi Habakuk.

²“Sadia dokah on, ale Jahowa, dilo-dilo ahu, hape seng ra Ham manangihon? Atap hudilohon Bamu pasal odoh-odoh, tapi seng ra Ham paluahkon?

³Mase ma pataridahkonon-Mu bangku hagedukon, gabe paidah-idahonku hasunsahan? Pandorunion ampa pambahenan hajahaton do i lobeihu, masa do parsalisihan ampa paringoran.

⁴Halani ai lambin galekni do titah, anjaha seng mardalan uhum. Ai halak parjahat do mardalan manginggoti parpintor, gabe peol ma mardalan uhum.”

⁵“Kawahkon nasiam ma hu tongah-tongah ni bangsa sipajuh begu-begu anjaha papangkei ma, ase longang anjaha songgotan nasiam. Ai sihol bahenon-Ku do sada horja bani ari nasiam, lang porsaya nasiam, porini pe ibaritahon ai. [1]

⁶Tonggor ma, papuhoon-Ku ma halak Kasdim, bangsa na garang anjaha na lingkat ai, manlontas deisa na ompat ni tanoh on, laho manoluk ianan na so sidea simadasi. [2]

⁷Sihabiaran anjaha jangin do sidea; luar humbani sidea do uhum ampa hatimbulonni.

⁸Lingkatan do huda ni sidea humbani begu, garangan humbani sorigala sanggah bodari-bodari; roh do siajak hudani humbani na daoh habang songon haluhuy, mangolos laho mamondut. [3]

⁹Roh do sidea ganup laho mandalankon paksa; seng tarolat pangonjarni, ipatumpu sidea do na tartangkap songon horsik bueini.

¹⁰Irehei sidea do raja-raja anjaha sipartatawaan ibahen sipambobai. Ipartatawai sidea do ganup benteng; tanoh do ipajunjun sidea laho manaban ai.

¹¹Dob ai mangolos ma sidea bingkat mannunuti dalanni songon logou; sidea halak siparsalah, na mambahen gogohni gabe naibatani.” [4]

¹²“Ai lang Ham do humbani nabasaia nari, ale Jahowa. Naibatangku na mapansing bangku? Seng anjai matei hanami. Ale Jahowa, bahen uhum do, ase ipabangkit Ham ia; Ham Batu ginggingku, bahen panjoraan do, ase ipajonam Ham ai. [5]

¹³Ham, parmata na pitah, gabe seng tarpaidah-idah Ham na masambor, anjaha seng tahan Ham mangkawahkon na so sintong, mase ma ipaidah-idah Ham halak sipangosei hape sip do Ham, ai ma sanggah na binondut ni halak parjahat jolma sipintoran hun bani, [6]

¹⁴gabe songon dengke na i laut ai ipaturut Ham jolma in, usih songon gilok-gilok, na so marraja?

¹⁵Ganup do isintak marhitei hail hu atas, itarik marhitei jalani, anjaha ipatumpu sidea hubagas durungni; marmalas ni uhur do ia halani ai anjaha marolob-olob.

¹⁶Halani ai do ase manggalang ia bani jalani anjaha manutung dahupa ia bani durungni, ai halani ai do buei parbagiananni anjaha mantin sipanganonni.

¹⁷Sintakonni ope nani podangni torus, anjaha nunutonni mamunuhi bangsa-bangsa lang maralang-alang?”