Read Batak Simalungun SEPANYA 1 Bible Online

SEPANYA 1 - Batak Simalungun bible

SEPANYA 1

¹Hata ni Jahowa, na roh hubani si Sepanya, anak ni si Husi, anak ni si Gedalya, anak ni si Amarya, anak ni si Hiskia, sanggah panorang ni si Josia, anak ni si Amon, raja ni Juda. [1]

²“Siapkonon-Ku do haganup hun datas ni tanoh on,” nini Jahowa.

³“Siapkonon-Ku do jolma ampa pinahan; siapkonon-Ku do manuk-manuk na i langit ampa dengke na ibagas laut. Jombahonon-Ku do halak parjahat, siap do bahenon-Ku jolma hun datas tanoh on,” nini Jahowa. [2]

⁴“Pagostongon-Ku do tangan-Ku mangimbang Juda, ampa mangimbang ganup pangisi ni Jerusalem, siapkonon-Ku do humbani ianan on goran ni Baal ampa goran ni malim-malim ni naibata na legan, [3]

⁵ronsi halak na marsombah bani bala na i langit i atas tayub, ampa halak na marsombah bani Jahowa, tapi na marbija homa bani Milkom; [4]

⁶sonai homa halak na marbalik humbani Jahowa, na so mangindahi Jahowa anjaha na so marpanungkun be Bani. [5]

⁷Sip ma nasiam i lobei ni Jahowa! Ai dohor mando ari ni Jahowa. Domma ipasirsir Jahowa sada galangan sisayaton, anjaha iuras na niontang-Ni. [6]

⁸Jadi bani ari ni panggalangan sisayaton ni Jahowa ai, marlulu ma Ahu dompak kopala-kopala ampa anak ni raja ampa haganup halak na mamakei pakeian ni nagori na legan. [7]

⁹Marlulu do Ahu homa bani ari ai dompak haganup halak na manlumpati molmolan, na manggoki rumah ni tuanni bani buah ni paksa ampa panipuon. [8]

¹⁰Bani ari ai,” nini Jahowa, “Tarbogei ma sora ni na tangis hun Horbangan Dengke, ampa doruh-doruh hun huta baru ai ampa pardobur na gogoh humbani buntu-buntu ai.

¹¹Tangis ma nasiam, na marianan i huta pandudaan! Ai seng dong be partiga-tiga, haganup sitimbang pirak domma bois.

¹²Bani panorang ai Ahu sandiri ma mamareksai Jerusalem marhitei lampu, anjaha marlulu ma Ahu bani halak, na gabe mombur i atas parat ni sidea, halak na mangkatahon ibagas uhurni, ʻSeng anjai bahenon ni Jahowa na madear atap na masambor pe.ʼ [9]

¹³Sirampason ma ugas-ugas ni sidea, anjaha siparsedaon ia rumahni. Age pe ipauli sidea rumah, seng sidea mangiankon ai; age pe ipungkah sidea pohon anggur, seng anjai inumon ni sidea anggur hunjai. [10]

¹⁴Dohor mando ari ni Jahowa na bolon ai, dohor mando anjaha mangolos roh. Bogei ma ari ni Jahowa na mapaet ai! Age puanglima mandoruh do ijai. [11]

¹⁵Ari panringisan do ari ai, ari hasosakan ampa habiaran, ari hasedaon ampa hasiapon, ari hagolapan ampa halotiron, ari na gok hombun ampa na lotir tumang, [12]

¹⁶ari parsora ni tarompit ampa surak-surak na mandorab huta na pinatoguh ampa manara na gijang.

¹⁷Tarsosak ma bahenon-Ku jolma, gabe dadap-dadap ma sidea songon halak na mapitung, halani mardousa sidea dompak Jahowa; duruskononkon do daroh ni sidea songon orbuk ampa bituha ni sidea songon hubang.

¹⁸Seng anjai tarbahen pirak barang omas ni sidea paluahkon diri ni sidea bani ari panringison ni Jahowa. Marhitei apuy ni parsimburuonni ai siapkononkon do tanoh on; hasiapon, nai ma tongon, haboison na manompong do bahenon-Ni bani ganup na marianan i tanoh on.” [13]