Read Batak Simalungun HAGGAI 1 Bible Online

HAGGAI 1 - Batak Simalungun bible

HAGGAI 1

¹Padua-tahunkon dob bangkit raja si Darius, ari sada bulan paonomkon, roh ma hata ni Jahowa marhitei Nabi Haggai bani si Serubabel, anak ni si Sealtiel, panrajai i Juda, ampa hubani Sintua ni Malim Josua, anak ni si Josadak, sonon: [1]

²Sonon do hata ni Jahowa Zebaot, “Bangsa on mangkatahon, ʻSeng roh ope panorangni ase paulion use rumah ni Jahowa.ʼ

³Halani ai roh ma hata ni Jahowa marhitei Nabi Haggai, sonon,

⁴ʻTapi domma roh gakni panorangni bannima mangiani rumahnima na niuhir, tapi anggo Rumah Panumbahan ai mareong ipaturut hanima?ʼ [2]

⁵Ai pe, sonon do hata ni Jahowa, ʻParuhurhon hanima ma sonaha na dob iahapkon hanima.

⁶Buei do itidahkon hanima, tapi otik do ipahuta hanima; mangan do namin hanima, tapi seng bosur; minum do namin hanima, tapi seng sombuh horahnima; marsabing do namin hanima, tapi seng malas angkulanima anjaha ise na marombou, marombou bani parduiton na matolpus do.ʼ [3]

⁷Sonon do hata ni Jahowa Zebaot, ʻParuhurhon hanima ma, sonaha na dob iahapkon hanima.

⁸Tangkog ma hanima hu dolog, tarui hanima ma parhayu, anjaha pauli hanima ma Rumah Panumbahan, ase marrosuh ni uhur Ahu ijai, anjaha marsangap Ahu,ʼ nini Jahowa.

⁹ʻBuei do namin iparkirahon hanima, hape tonggor ma, lambin otikni do ai, anjaha ijin ipahuta hanima ai, Hupurpurhon do ai. Mase?ʼ nini Jahowa Zebaot. ʻHalani rumah-Ku na mareong ai, hape ganup hanima marsioloskon rumahni bei.

¹⁰Halani ai do ase ijolomi langit ai namur i atasnima, anjaha ijolomi tanoh in gogohni, [4]

¹¹anjaha domma Huhatahon roh logou ni ari hu tanoh on ampa hu dolog-dolog, bani gandum, anggur na bayu, minak, bani ganup na tinubuhkon ni tanoh in, bani jolma ampa pinahan ampa bani haganup na hinorjahon ni tangan.ʼ ” [5]

¹²Jadi itangihon si Serubabel anak ni si Sealtiel, pakon sintua ni Malim Josua anak ni si Josadak, ampa haganup simasima ni bangsa ai ma sora ni Jahowa, Naibata ni sidea ai, ampa hata ni si Haggai nabi ai, domu hubani parsuruh ni Jahowa, Naibata ni sidea ai bani, jadi marhabiaran ma bangsa ai i lobei ni Jahowa.

¹³Dob ai ihatahon si Haggai, suruhan ni Jahowa ai ma bani bangsa ai, domu hubani tonah ni Jahowa, sonon, “Ahu do hasomannima,” nini Jahowa. [6]

¹⁴Jadi ipuhoi Jahowa ma tonduy ni si Serubabel, anak ni si Sealtiel, panrajai ni Juda, ampa tonduy ni si Josua, anak ni si Josadak, sintua ni malim ai, ampa tonduy ni haganup simasima ni bangsa ai, gabe roh bei ma sidea mangkorjai horja bani rumah ni Jahowa Zebaot, Naibata ni sidea ai,

¹⁵ai ma bani ari dua puluh ompat bulan onom.