Read Batak Simalungun SAKARIA 1 Bible Online

SAKARIA 1 - Batak Simalungun bible

SAKARIA 1

¹Bani bulan ualuh, padua-tahunkon dob manrajai si Darius, roh ma hata ni Jahowa bani Nabi Sakaria, anak ni si Berekia, anak ni si Iddo, sonon, [1]

²“Manringis tumang do Jahowa bani ompungnima.

³Tapi hatahon ma bani sidea, sonon do hata ni Jahowa, ʻSai mulak ma hanima hu Bangku, ase marpangulaki uhur-Hu dompak hanima,ʼ nini Jahowa Zebaot. [2]

⁴ʻUlang ma hanima songon ompungnima, na niambilanan ni nabi na parlobei in.ʼ Sonon do hata ni Jahowa Zebaot, ʻSai mulak ma hanima humbani dalannima na jahat in ampa humbani pambahennima na bajan in.ʼ Tapi seng itangihon anjaha seng ipardulihon sidea Ahu,” nini Jahowa. [3]

⁵“Ompungnima, ija do sidea nuan? Anjaha nabi-nabi ai, lalab do sidea manggoluh?

⁶Tapi anggo hatang-Kin ampa titah-Kin na Hutonahkon bani juakjuak-Ku, nabi-nabi ai, ai lang mangonai do bani ompungnima?” Gabe mubah do uhur ni sidea anjaha ihatahon, “Songon na sinurahon ni Jahowa Zebaot mambahen hu banta, romban hubani dalanta ampa pambahenanta, sonai do tongon ibahen hu banta.”

⁷Bani ari dua puluh ompat bulan sapuluh sada, ai ma bulan Sebat, padua-tahunkon dob manrajai si Darius, roh ma hata ni Jahowa hubani Nabi Sakaria, anak ni si Berekia, anak ni si Iddo sonon,

⁸“Marpanonggoran do ahu borngin ai, anjaha tonggor ma, sada halak mangajak huda sigerger. Jongjong do ia i holangkolang ni hayu mirtus ibagas sada lombang, anjaha i pudini huda na gerger, na mahuning ampa silopak. [4]

⁹Dob ai ningku ma, ʻAi aha do artini in, tuan?ʼ jadi nini malekat hasomanku marsahap ai ma bangku, ʻHupatuduhkon pe bamu aha do artini in.ʼ

¹⁰Dob ai nini dalahi na jongjong i holangkolang ni hayu mirtus ai ma mambalosi, ʻIn ma na sinuruh ni Jahowa maniar tanoh on.ʼ

¹¹Dob ai nini sidea ma mambalosi malekat ni Jahowa na jongjong i holangkolang ni hayu mirtus ai, ʻDomma isiari hanami tanoh on, anjaha tonggor ma, sonang anjaha damei do ganup tanoh on.ʼ

¹²Jadi nini malekat ni Jahowa ai ma mambalosi, ʻAle Jahowa Zebaot, sadiha dokah nari lang marpangulaki uhur-Mu mangidah Jerusalem ampa mangidah huta ni Juda, na niringisan-Mu ibagas na pitu puluh tahun on?ʼ [5]

¹³Jadi ibalosi Jahowa ma malekat, na marsahap pakon ahu marhasoman hata na madear ampa hata apoh-apoh.

¹⁴Dob ai nini malekat hasomanku marsahap ai ma hu bangku: Ambilankon ma: Sonon do hata ni Jahowa Zebaot, ʻGara tumang do uhur-Hu ibagas mangkopkop Jerusalem ampa Sion, [6]

¹⁵tapi gajag tumang do ringis-Hu dompak bangsa sipajuh begu-begu, na jungkat ai, ai sanggah manggila Ahu otik, gabe inunut sidea manambahi hamagouan ai.ʼ [7]

¹⁶Halani ai, sonon do hata ni Jahowa, ʻDomma marpangulaki uhur-Hu mangidah Jerusalem, maningon paulion do use rumah-Ku ibagas huta ai,ʼ nini Jahowa Zebaot, anjaha pagistangon do tali sibar-sibar bani Jerusalem. [8]

¹⁷Ambilankon ope: Sonon do hata ni Jahowa Zebaot, ʻSirnip ope sagala huta na dong Bangku bahenon-Ku bani na madear, anjaha ulakan ni Jahowa ope mangapohi Sion, anjaha pilihon-Ni use Jerusalem.ʼ ” [9]