Read Batak Simalungun SAKARIA 11 Bible Online

SAKARIA 11 - Batak Simalungun bible

SAKARIA 11

¹Buka ma labahmu ale Libanon, ase iboiskon apuy ni hayu aresmin! [84]

²Mandoruhi ma ho, ale hayu sipres, ai domma maroboh hayu ares, anjaha siap na banggal-banggal ai! Mandoruhi ma, ale jajabi na i Basan, ai domma itobas harangan toras ai! [85]

³Tangar, doruh-doruh ni parmahan, ai domma siap hasangapon ni sidea! Tangar, paraum ni singa, ai domma siap hamuliaon ni Jordan!

⁴Sonon do hata ni Jahowa Naibatangku, “Parmahani ma biribiri sisayaton in! [86]

⁵Halak na mamboli sidea manayati sidea anjaha seng marsalah sidea iahap, anjaha sidea na manjualsi mangkatahon, ʻPinuji ma Jahowa, ai domma gabe bayak ahu.ʼ Seng harga sidea bani parmahan ni sidea. (Jer. 23)

⁶“Ahu pe, seng be hargaan-Ku pangisi ni tanoh on,” nini Jahowa. “Tonggor ma, Ahu sandiri padaskon jolma in sada-sada hubagas kuasa ni hasomanni ampa hubagas kuasa ni rajani; jadi parsedaon ni sidea ma tanoh on anjaha sahalak pe lang paluahon-Ku humbani tangan ni sidea.

⁷Anjaha Ahu do na marmahan biribiri sisayaton in bani sipartiga-tiga biribiri. Hubuat ma Bangku dua simambu: Sada Hugoran Haholongan, na sada nari Pardomuan; anjaha Huparmahan ma biribiri in. [87]

⁸Ibagas sabulan Husiapkon ma parmahan sitolu halak ai. Dob ai lang sabar be Ahu mangidah sidea, sidea pe sobalan ma Bangku. [88]

⁹Jadi ningku ma, ʻSeng marosuh be Ahu marmahan hanima. Matei hujin na matei in; bois hujin na bois in, anjaha paturut hujin na tading in marsipangan daging ni hasomanni.ʼ [89]

¹⁰Dob ai Hubuat ma simambu-Hu Haholongan ai, Huponggolhon ma ai, laho manlangkon padan na Hubahen ai bani ganup bangsa-bangsa,

¹¹masab ma padan ai bani na sadari ai. Jadi mangahap ma sipartiga-tiga biribiri ai, na mardiateihon Ahu ai, paboa hata ni Jahowa do ai hape.” [90]

¹²Dob ai ningku ma bani sidea, “Anggo dear ninuhur nasiam, bere nasiam ma bangku upahku, anggo lang, paturut nasiam ma hujin. Jadi itimbang sidea ma upahku tolu puluh rupiah.” [91]

¹³Tapi nini Jahowa ma hu bangku, “Gijigkon ma in hu poti parartaan ai, ai ma harga na jagar, na tinaksir ni sidea Bangku.” Jadi hubuat ma sitolu puluh rupiah ai, anjaha hugijigkon ma ai hu poti parartaan ai, na ibagas rumah ni Jahowa. [92]

¹⁴Dob ai huponggolhon ma simambuhu na paduahon ai, ai ma Pardomuan ni Juda ampa Israel. [93]

¹⁵Dob ai nini Jahowa ma hu bangku, “Buat ma sahali nari bam parugas ni sada parmahan na jahat.

¹⁶Ai tonggor ma, Ahu pabangkit sada parmahan i tanoh on, na so manarihon na laho magou in, na so mangindahi na kahou in, na so mangindahi na ugahan in, na so marmuduhon na jorgit in, tapi na mamboiskon daging ni na mombur anjaha na mangkiskisi ronsi holiholini. [94]

¹⁷Magou ma parmahan-Ku na so margagan, na manadingkon biribiri in! Podang do mangonai bani tanganni ampa bani matani siamun. Sai na laho melus do tanganni, anjaha na laho golap do mata siamunni.”