Read Batak Simalungun SAKARIA 13 Bible Online

SAKARIA 13 - Batak Simalungun bible

SAKARIA 13

¹ Bani ari ai adong ma sada bah tubuh ibuha bani ginompar ni si Daud ampa bani pangisi ni Jerusalem laho mamurihi sidea humbani dousa ampa habutakon. [105]

²Bani ari ai, nini Jahowa Zebaot, “Siapkonon-Ku ma goran-goran ni naibata na legan hun tanoh on, ase ulang be taringat halak hujai; sonai homa nabi-nabi ampa tonduy na mabutak usiron-Ku do hun tanoh on. [106]

³Anggo adong ope atap ise na manjahai songon nabi, hatahonon ni bapa atap inangni na manubuhkon ai ma bani, ʻSeng bulih be ho manggoluh, ai ihatahon ho do ladung marhitei goran ni Jahowa;ʼ anjaha bapani ampa inangni na manubuhkon ai ma na mamantomsi anggo manjahai ia. [107]

⁴Bani ari ai maila ma sagala nabi marhitei panonggoranni sanggah na manjahai ia, seng be pakeionni baju na marambulu laho paoto-otohon, [108]

⁵tapi hatahononni ma, ʻSeng nabi ahu, parjuma-juma do ahu, ai simada juma do ahu humbani haposoonku ope.ʼ [109]

⁶Porini adong na manungkunsi, ʻUgah aha do na bani tontonmu in?ʼ Hatahononni ma, ʻNa hona bogbogan do ahu i rumah ni hasomanku.ʼ ” [110]

⁷“Misir ma, ale podang, dompak parmahan-Ku, dompak dalahi tang sindohor-Hu,” nini Jahowa Zebaot. “Hubogbog ma parmahan in, ase merap biribiri in, durdurhonon-Ku do tangan-Ku laho manogu halak na maetek. [111]

⁸Masa ma bani ganup tanoh in,” nini Jahowa, “Siapkonon anjaha agouon-Ku ma dua partolu pangisini, tapi tebahonon-Ku do manggoluh na sapartolu nari. [112]

⁹Na sapartolu ai pe nahkonon-Ku do hubagas apuy, laho papitahkon songon pirak; anjaha ujion do sidea songon panguji bani omas. Diloon ni sidea ma goran-Ku anjaha balosan-Ku ma sidea. Hatahonon-Ku ma, ʻBangsang-Ku do in;ʼ anjaha sidea pe hatahononni do, ʻJahowa do Naibatangku.ʼ ” [113]