Read Batak Simalungun SAKARIA 2 Bible Online

SAKARIA 2 - Batak Simalungun bible

SAKARIA 2

¹Dob ai hukawahkon ma dompak datas, anjaha tonggor ma, adong ma ompat tanduk.

²Jadi ningku ma dompak malekat na marsahap pakon ahu, “Ai aha do arti ni on?” Nini ma mambalosi ahu, “In ma da tanduk na paerapkon Juda, Israel ampa Jerusalem.”

³Dob ai ipataridahkon Jahowa ma bangku ompat panopa.

⁴Jadi ningku ma, “Aha do na sihol bahenon ni sidea ase roh?” Nini ma mambalosi, “Ai ma da tanduk na paerapkon Juda, gabe seng dong na boi padirgak uluni; na roh do sidea on laho manonggoti sidea, laho mamunukkon tanduk ni bangsa-bangsa, na pagijang tandukni dompak tanoh Juda, laho pamerapkon ai.”

⁵Dob ai mangkawah ma use ahu dompak datas, anjaha tonggor ma; sada dalahi jolom bani tali sibar-sibar ibagas tanganni. [10]

⁶Dob ai ningku ma, “Laho huja ham?” Nini ma mambalosi ahu, “Laho manibar Jerusalem, laho mangidah barang sadiha do bolagni anjaha sadiha do ganjangni.”

⁷Jadi tonggor ma, roh ma malekat na marsahap pakon ahu hinan, anjaha roh ma homa sada malekat na legan manjumpahkonsi,

⁸anjaha nini ma dompaksi, “Ne ma, hatahon ma hubani anak garama na ijai ai. Gabe ianan na buha ma Jerusalem halani hinabuei ni jolma ampa pinahan na i tongah-tongahni. [11]

⁹ Ai Ahu do,” nini Jahowa, “gabe tembok apuy inggot huta ai, anjaha Ahu do gabe hamuliaon i tongah-tongahni.” [12]

¹⁰“Podas! Podas! Lintun ma hanima hun tanoh par Utara,” nini Jahowa, “ai humbani deisa na ompat in do sihol patumpuon-Ku hanima,” nini Jahowa. [13]

¹¹“Podas, maporus ma hu Sion, hanima na marianan rap pakon boru Babel.”

¹²Ai sonon do hata ni Jahowa Zebaot pasal bangsa-bangsa na mangayob hanima, “Barang ise na manjamah hanima, anak ni matani do na jinamahni ijai. [14]

¹³Tonggor ma, mardas tangan ma Ahu bani sidea, ase gabe taban-taban sidea bani halak na pinarjabolon ni sidea na sain dokah,“ ase ibotoh hanima, paboa Jahowa Zebaot do na marsuruh ahu.

¹⁴“Marolob-olob anjaha marmalas ni uhur ma ho, ale boru Sion, ai tonggor ma, na roh ma Ahu marianan i tongah-tongahmin,” nini Jahowa. [15]

¹⁵Jadi buei ma bangsa na pasadahon dirini bani Jahowa bani ari ai, gabe bangsa-Ni ma sidea, anjaha marianan ma sidea i tongah-tongahmin, ase ibotoh ho, paboa Jahowa Zebaot do na manuruh ahu marayak ho. [16]

¹⁶Jadi ainon ni Jahowa ma use Juda bahen parbagianan-Ni i tanoh na mapansing in, anjaha pilihon-Ni ma use Jerusalem. [17]

¹⁷Sip ma ganup dunia on i lobei ni Jahowa! Ai domma hehe Ia humbani ianan hapansingon-Ni ai. [18]