Read Batak Simalungun SAKARIA 4 Bible Online

SAKARIA 4 - Batak Simalungun bible

SAKARIA 4

¹Dob mulak malekat, hasomanku marsahap ai, ipuhoi ma ahu, songon sada halak na pinuhoan humbani na modom.

²Ihatahon ma hu bangku: Aha dong ididah ham?” Hubalosi ma, “Huidah do sada parsuluhan, pitah humbani omas, parminakanni i atasni; pitu do lampu i atasni ampa pitu pipa bani lampu na i atasni ai. [28]

³Anjaha adong do dua hayu jetun jongjong i lambungni, sada hampit siamun ni parsuluhan ai anjaha na sada nari ai hampit sambilou.

⁴Dob ai ningku ma dompak malekat, na marsahap pakon ahu ai, “Ai aha do artini on, ale tuannami?”

⁵Dob ai nini malekat hasomanku marsahap ai ma mambalosi ahu, “Ai seng ibotoh ham aha do artini in?” Jadi ningku ma, “Lang, tuanku.”

⁶Dob ai nini ma dompak ahu, “On ma hata ni Jahowa hubani si Serubabel, ʻSeng marhitei bala barang marhitei gogoh, tapi marhitei Tonduy-Hu do ase saud,ʼ nini Jahowa Zebaot. [29]

⁷Ai aha do ho, ale dolog na bolon? Maningon gabe pamah do ho i lobei ni si Serubabel. Angkatonni ma hu atas batu parsuhi ai marhasoman surak-surak, ʻJengesni in, dearni in!ʼ ” [30]

⁸Ambahni ai roh do hata ni Jahowa hu bangku sonon,

⁹“Tangan ni si Serubabel do na dob mambahen onjolan ni rumah on, tanganni do homa na sihol mandobkon on. Jadi botohon nasiam ma, Jahowa Zebaot do marsuruh ahu bani nasiam. [31]

¹⁰Ai barang ise na mapas bani ari pamungkah na etek ai, maningon marolob-olob sidea mangidah batu parsuhi, na ibagas tangan ni si Serubabel. Ia na pitu ai, ai ma Tonduy ni Jahowa, ai ma maniar ganup tanoh on.” [32]

¹¹Dob ai ningku ma hu bani, “Ai aha do arti ni na dua hayu jetun na hampit siamun ampa sambilou ni parsuluhan ai?”

¹²Ningku ma paduahalihon hu bani, “Ai aha do arti ni ranting ni hayu jetun na dua ai, na i lambung ni pipa omas na dua ai panguseian ni minak ai?”

¹³Dob ai nini ma hu bangku, “Seng ibotoh ham, aha do artini ai?” Balosku, “Lang, tuannami.”

¹⁴Jadi nini ma, “Sidea ma sidua halak na mininakan ai, na jongjong i lobei ni Jahowa, sigomgom ganup tanoh on.” [33]