Read Batak Simalungun SAKARIA 5 Bible Online

SAKARIA 5 - Batak Simalungun bible

SAKARIA 5

¹Dob ai mangkawah ma ahu use dompak datas, jadi tonggor ma, sada buku ginulung na habang. [34]

²Jadi nini ma hu bangku, “Aha dong ididah ham?” Ningku ma mambalosi, “Huidah do sada buku ginulung na habang; ganjangni dua puluh asta anjaha bolagni sapuluh asta.”

³Dob ai nini ma hu bangku, “In ma papa na maniar sab tanoh on; ai sagala panangko siapkononkon do domu hujai, hunjon-hujanan, anjaha sagala sibijahon na tongon, siapkononkon do domu hujai, hunjon-hujanan.

⁴Domma Hupaturut laho papa ai,” nini Jahowa Zebaot, “jadi masukanni ma rumah ni panangko ampa rumah ni halak sibijahon na tongon marhitei goran-Ku; marianan ma ai i rumahni anjaha boiskononni ma parhayuni ampa batu-batuni.”

⁵Dob ai roh ma hundohor malekat hasomanku marsahap ai, anjaha nini ma hu bangku, “Kawahkon ma dompak datas, anjaha tonggor ma atap aha do na roh hundohor ai!”

⁶Jadi ningku ma, “Ai aha do ai tongon?” Nini ma, “Tapongan do na roh hundohor ai.” Anjaha nini ope, “Ai ma hajahaton ni sidea i sab tanoh in.” [35]

⁷Anjaha tonggor ma, tarangkat ma tutupni humbani simbora ai, anjaha adong do sada naboru hundul ibagas tapongan ai.

⁸Dob ai nini ma, “In ma hajahaton ai.” Jadi ionjarhon ma naboru ai hubagas tapongan ai, anjaha inahkon ma simbora na sangkimpal ai hu babou ni ai.

⁹Dob ai mangkawah ma ahu dompak datas, gabe tonggor ma, dua naboru roh hundohor anjaha logou do ibagas habong ni sidea, songon habong ni sitindaulog do habong ni sidea, anjaha iusung sidea ma tapongan ai i holangkolang ni tanoh pakon langit.

¹⁰Jadi ningku ma bani malekat hasomanku marsahap ai, “Huja do boanon ni sidea tapongan ai?”

¹¹Nini ma hu bangku, “Hu tanoh Sinear, laho paulihon sada rumah bani ijai;“ siapkonsi ai inahkon sidea ma tapongan ai bani iananni. [36]