Read Batak Simalungun SAKARIA 6 Bible Online

SAKARIA 6 - Batak Simalungun bible

SAKARIA 6

¹Dob ai mangkawah ma use ahu dompak datas, anjaha tonggor ma, ompat gareta roh hun holangkolang ni dua dolog; ia dolog ai humbani tombaga do. [37]

²Bani gareta na parlobei adong do huda sigerger, bani gareta na paduahon huda sibirong,

³bani gareta na patoluhon huda silopak, bani gareta na paompatkon huda sibolang.

⁴Dob ai ningku ma bani malekat na marsahap pakon ahu ai, “Ai aha do arti ni ai, ale tuanku?”

⁵Jadi nini malekat ai ma mambalosi ahu, “Na bingkat do sidea hu deisa ni langit na ompat in, dob mangadap sidea hu lobei ni Tuhan sigomgom ganup tanoh on.” [38]

⁶Gareta na marhuda sibirong ai laho dompak tanoh na hampit utara, na lopak ai laho dompak tanoh na hampit hapoltakan, sibolang ai dompak tanoh na hampit dangsina,

⁷anjaha sigerger ai laho dompak tanoh na hampit hasundutan. Sanggah na roh ai huda ai laho maniari tanoh on, nini ma, “Laho ma, lioti hanima ma tanoh on!” Jadi ilioti sidea ma tanoh on. [39]

⁸Dob ai idilohon ma hu bangku, “Tonggor ma, na laho dompak tanoh na hampit utara ai, ai ma na pahombun ringis-Ku i tanoh na hampit utara ai.” [40]

⁹Dob ai roh ma hata ni Jahowa hu bangku, sonon,

¹⁰“Jalo ma sibere-bere humbani halak na tarbuang, humbani si Heldai, si Tobia ampa humbani si Jedaya na dob mulak hun Babel; lanjar laho ma ho bani ari ai hu rumah ni si Josia, anak ni si Sepanya.

¹¹Jalo ma humbani sidea pirak ampa omas, anjaha pauli ma sada sortali anjaha nahkon ma ai bani ulu ni si Josua, anak ni si Josadak, sintua ni malim ai, [41]

¹²anjaha hatahon ma hu bani, ʻSonon do hata ni Jahowa Zebaot, “Tonggor ma, sada dalahi na margoran si Tumbor. Bani iananni do martumbor anjaha ia do na paulihon rumah ni Jahowa.” [42]

¹³Ia do tongon na paulihon rumah ni Jahowa; anjaha ia do sijujung hamuliaon; hundul anjaha manrajai do ia bani paratasni. Adong do sada malim i lambung ni paratasni; anjaha masa do pangarusion na mardamei-damei i tongah-tongah ni sidea na dua ai. [43]

¹⁴Ia sortali ai tading do ai i rumah ni Jahowa, bahen pardingatan bani si Heldai, si Tobia, si Jedaya ampa si Josia anak ni si Sepanya.

¹⁵Roh do homa halak humbani tanoh na daoh mangurupi laho paulihon rumah ni Jahowa, ase ibotoh nasiam, Jahowa Zebaot do na marsuruh ahu bani nasiam. Maningon jadi do on, anggo sintong itangihon nasiam sora ni Jahowa, Naibata nasiam.” [44]