Read Batak Simalungun SAKARIA 7 Bible Online

SAKARIA 7 - Batak Simalungun bible

SAKARIA 7

¹Paompat-tahunkon dob manrajai raja Darius, roh ma hata ni Jahowa hubani si Sakaria, bani ari ompat bulan siah, ai ma bulan Kislev,

²sanggah na isuruh si Betel-Sareser pakon si Regem-Melek suruhanni, laho manungkun Jahowa,

³lanjar manungkun malim-malim na i rumah ni Jahowa Zebaot ampa nabi-nabi, “Naha, nunutonnami ope tangis-tangis ampa marpuasa bani bulan lima, songon na somal binahennami, domma pala martahun-tahun?” [45]

⁴Jadi roh ma hata ni Jahowa Zebaot hu bangku sonon,

⁵“Hatahon ma hubani ganup halak na i tanoh on ampa hubani malim, ʻIa marpuasa pe hanima anjaha tangis-tangis bani bulan lima ampa bulan pitu ibagas na pitu puluh tahun on, ai Bangku do hanima na marpuasa ai? [46]

⁶Anjaha anggo mangan ampa minum hanima, ai lang bannima sandiri do hanima na mangan ampa na minum ai?ʼ

⁷Ai lang sonai hinan do hata na ipatugah Jahowa marhitei pamangan ni nabi na ijia, sanggah niiankon ope Jerusalem anjaha marsonang-sonang rap pakon huta-huta inggotni ai, anjaha adong ope na mangiankon tanoh dangsina ampa tanoh bornoh ai?” [47]

⁸Dob ai roh ma hata ni Jahowa hubani si Sakaria sonon,

⁹“Sonon do hata ni Jahowa Zebaot, dalankon ma uhum na sintong, patuduhkon ma dear layak ampa idop ni uhur bani ganup hasomanni. [48]

¹⁰Ulang odoh-odoh na mabalu, na so marinang, na so marbapa panginsolat atap na musil; anjaha ulang ma adong hun bannima na mamingkirhon na jahat dompak hasomanni ibagas uhurni.” [49]

¹¹Tapi manjua do sidea manangihon ai, hengkeng do sidea anjaha itutup pinggolni ulang ibogei.

¹²Ipamapir do uhurni songon batu intan, ase ulang ibogei sidea titah ampa hata na tinongos ni Jahowa Zebaot marhitei Tonduy-Ni ampa marhitei nabi na parlobei ai. Halani ai do ase gajag ringis ni Jahowa Zebaot. [50]

¹³“Songon Ahu na dilo-dilo, hape seng itangihon sidea, sonai ma sidea dilo-dilo, tapi seng tangihonon-Ku,” nini Jahowa Zebaot. [51]

¹⁴“Halani ai domma Hupurpurhon sidea hu tongah-tongah ni sagala bangsa, na so tinanda ni sidea hinan, gabe tarulang tanoh ai dob itadingkon sidea, seng dong be na marhujai-hujon. Sonai ma tanoh na madear ai gabe halimisan ibahen sidea.”