Read Batak Simalungun SAKARIA 8 Bible Online

SAKARIA 8 - Batak Simalungun bible

SAKARIA 8

¹Dob ai roh ma hata ni Jahowa Zebaot hu bangku,

²“Sonon do hata ni Jahowa Zebaot, ʻSimburu tumang do Ahu mangkopkop Sion, anjaha gila tumang do uhur-Hu mangkopkop sidea.ʼ [52]

³Sonon do hata ni Jahowa, ʻMulak ma Ahu use hu Sion anjaha marianan i tongah-tongah ni Jerusalem, anjaha targoran ma Jerusalem: Huta na bujur, anjaha dolog ni Jahowa Zebaot: Dolog Na Pansing.ʼ [53]

⁴Sonon do hata ni Jahowa Zebaot, ʻManingon hundul do use dalahi na matua ampa naboru na matua i alaman ni Jerusalem, ganup marsijolom tungkotni bei ibagas tanganni halani tuani. [54]

⁵Anjaha alaman ni huta ai gok dakdanak dalahi ampa dakdanak naboru na marguro-guro i alaman ai.ʼ

⁶Sonon do hata ni Jahowa Zebaot, ʻAnggo halongangan ai bani pangidah ni simasima ni bangsa on bani panorang on, mintor halongangan ma gakni ai Bangku?ʼ Nini Jahowa Zebaot. [55]

⁷Sonon do hata ni Jahowa Zebaot, ʻTonggor ma, Ahu ma paluahkon bangsang-Ku hun tanoh na hampit hapoltakan ampa hun tanoh na hampit hasundutan,

⁸anjaha Ahu mamboan sidea mulak marianan i tongah-tongah ni Jerusalem; jadi gabe bangsang-Ku ma sidea anjaha gabe Naibata ni sidea ma Ahu ibagas hasintongan ampa hapintoron.ʼ [56]

⁹Sonon do hata ni Jahowa Zebaot, ʻPahinsah hanima ma tangannima, hanima na mambogei hata on, bani panorang on humbani pamangan ni nabi-nabi, bani ari ipasukkon onjolan ni rumah ni Jahowa Zebaot, ase boi ipauli rumah ai. [57]

¹⁰Ai i lobei ni ari on seng dong manjalo upah halak atap upah aha pe humbani pinahan; sonai homa bani halak na marhujai-hujon seng dong hahorason i lobei ni munsuh ai; ai marsilawanan do jolma samah jolma Hubahen. [58]

¹¹Tapi anggo sonari seng be bahenon-Ku hubani simasima ni bangsa on, songon sapari,ʼ nini Jahowa Zebaot,

¹²ʻAi suankonon-Ku ma damei: Bereon ni hayu anggur ma buahni, tanoh on mambere gogohni, anjaha langit ai mambere namurni; bereon-Ku ma ganupan ai bani simasima ni bangsa on gabe parbagiananni.

¹³Hanima ginompar ni Juda ampa Israel, songon hanima na dob gabe bangsa sibura-buraonkon na saindokah i tongah-tongah ni bangsa-bangsa, sonai ma hanima gabe pasu-pasu tumpakon-Ku. Ulang mabiar, tapi pahinsah hanima ma tangannima.ʼ [59]

¹⁴Ai sonon do hata ni Jahowa Zebaot, ʻSongon na dob Husurahon mambahen roh hamagouan bannima, sanggah na pinaroh ni ompungnima ringis-Hu,ʼ nini Jahowa Zebaot, ʻanjaha seng marpangulaki uhur-Hu,

¹⁵sonai do sura-surang-Ku bani panorang on laho mambahen na madear bani Jerusalem ampa bani ginompar ni Juda; ulang mabiar.

¹⁶Tapi on ma na maningon sibahenonnima: Ganup ma mangkatahon hata hasintongan bani hasomanni anjaha idalankon uhum na bonar bani horbangannima. [60]

¹⁷Ulang ma ipingkiri atap ise ibagas uhurni hamagouan bani hasomanni, anjaha ulang ma iharosuhkon hanima na so sintong, ai magigi do uhur-Hu mangidah na sonai ai ganup,ʼ ” nini Jahowa. [61]

¹⁸Dob ai roh ma hata ni Jahowa Zebaot hu bangku,

¹⁹“Sonon do hata ni Jahowa Zebaot, ʻParpuasaon bani bulan ompat, bani bulan lima, bani bulan pitu, bani bulan sapuluh gabe malas ni uhur do ai ampa hasonangan bani ginompar ni Juda, nai ma tongon, gabe pesta parolob-oloban. Halani ai haholongi hanima ma hasintongan ampa damei!ʼ [62]

²⁰Sonon do hata ni Jahowa Zebaot, ʻNa roh ope bangsa-bangsa ampa pangisi ni huta-huta na bolon,

²¹pangisi ni huta na sada laho bani na sada nari, mangkatahon: Laho ma hita marsombah bani Jahowa, mangindahi Jahowa Zebaot!ʼ Ahu pe laho do hujai.” [63]

²²Tongon tene, roh do magira buei bangsa sonai homa bangsa na gogoh mangindahi Jahowa Zebaot i Jerusalem anjaha marsombah i lobei ni Jahowa.ʼ

²³Sonon do hata ni Jahowa Zebaot, ʻBani ari ai tangkapon ni sapuluh halak humbani bangsa na marbagei-bagei sahap ai ma sada halak Jahudi bani sisi ni hiouni anjaha ihatahon, “Rap ma hita laho, ai domma ibogei hanami, Naibata do hasoman nasiam.” ʼ [64]