Read Batak Simalungun MALEAKI 1 Bible Online

MALEAKI 1 - Batak Simalungun bible

MALEAKI 1

¹Hata pangungkabon ni Jahowa bani Israel marhitei si Maleaki.

²“Holong do uhur-Hu bannima,” nini Jahowa. Tapi ihatahon hanima, “Sonaha ma pangkaholongi-Mu bennami?” “Ai lang si Esau do namin abang ni si Jakob,” nini Jahowa, “hape si Jakob do Huhaholongi, [1]

³tapi sogam do uhur-Hu bani si Esau. Halani ai do ase gabe halimisan Hubahen dolog-dologni, anjaha Huondoskon parbagiananni gabe ianan ni sorigala, na somal marianan i halimisan.” [2]

⁴Porini nini Edom, ʻDomma tongon iparseda hanami, tapi ulakkononnami do paulihon na mareong ai,ʼ hatahonon ni Jahowa Zebaot ma, ʻSidea paulihon, tapi Ahu use manreongkon; goranon ni halak ma sidea, “Tanoh hajahaton, bangsa siringisan ni Jahowa sadokah ni dokahni.”

⁵Idahon ni matanima ope ai, gabe hatahononnima ma, “Banggal do Jahowa, age i darat ni parbalogan ni Israel.” ʼ

⁶Nini Jahowa Zebaot, “Ipasangap anak do bapani, anjaha ihabiari juakjuak tuanni. Anggo bapa do Ahu, ija do hasangapon-Ku? Anggo Tuhan Ahu, ija do biar dompak Ahu? Hanima malim-malim sipahiri goran-Ku. Hape nini hanima ope, ʻSonaha, hanami pahiri goran-Mu?ʼ [3]

⁷Iboan hanima do bani anjapanjap-Ku ruti na mabutak. Anjaha ihatahon hanima do, ʻSonaha ibahen hanami pabutak ai?ʼ Marhitei na ipingkiri hanima, ʻBoi do pahirion meja ni Jahowa.ʼ [4]

⁸Anggo iboan hanima pinahan na mapitung bahen galangan, ai lang na sambor ma ai? Anggo igalangkon hanima na oyangon atap na boritan, ai lang na sambor ma ai? Parsiluah hanima ma ai bani panggomgominima, mintor tumaram ma rosuh uhurni mangidah ho barang layak ia bam?” nini Jahowa Zebaot. [5]

⁹“Ai pe buat hanima ma uhur ni Naibata marhitei galangan sisonai ai, ase idop uhur-Ni banta! Sonai do pambahenannima, mintor tarbahen ma rosuh uhur-Ni mangidah hanima?” nini Jahowa Zebaot.

¹⁰“Ambit adong ma namin sada halak hun tongah-tongahnima na ra manutup labah ni Rumah Panumbahan in, ase ulang sisoya-soya pannahitinima apuy bani anjapanjap-Kin. Seng marosuh uhur-Hu mangidah hanima,” nini Jahowa Zebaot, “anjaha seng tarharosuhkon Ahu galangan hun tangannima. [6]

¹¹Ai hun hapoltakan das hu hasundutan timbul do goran-Ku i tongah-tongah ni bangsa-bangsa anjaha bani ganup ianan igalangkon do dahupa bani goran-Ku ampa galangan sipanganon na pitah; ai timbul do goran-Ku i tongah-tongah ni bangsa-bangsa,” nini Jahowa Zebaot. [7]

¹²“Tapi anggo hanima ipabutak hanima do in, marhitei na hinatahonnima, ʻBoi do butak bahenon meja ni Jahowa, anjaha mapas uhur bani sipanganon na ijai ai.ʼ

¹³Nini hanima, ʻTonggor ma, loja ni in!ʼ Anjaha mapas do uhurnima Bangku,” nini Jahowa Zebaot. “Iboan hanima do na nirampok, na oyangon ampa na boritan, iboan hanima do ai gabe galangannima. Mintor tarharosuhkon Ahu ma manjalo ai hun tangannima?” nini Jahowa.

¹⁴“Sai hona papa ma sipangoto-otoi, na marnah pinahan tunggal namin bani hulananni, na dob binagahkonni, hape na martikas do saudni igalangkon bani Tuhan in! Ai Raja na bolon do Ahu,” nini Jahowa Zebaot, “anjaha sihabiaran do goran-Ku i tongah-tongah ni bangsa-bangsa.” [8]