Read Batak Simalungun MALEAKI 2 Bible Online

MALEAKI 2 - Batak Simalungun bible

MALEAKI 2

¹“Ai pe, hanima malim-malim, mangonai do bannima hata lumba-lumba on.

²Anggo seng ra hanima manangihon, anjaha anggo seng ra hanima marimbagaskon, laho pasangapkon goran-Ku,” nini Jahowa Zebaot, “tongoson-Ku ma papa hu tongah-tongahnima, anjaha gabe papa bahenon-Ku pasu-pasu na bannima in; domma tongon hona papang-Ku ai, halani na so ra hanima marparimbagaskon ai. [9]

³Tonggor ma, rotapon-Ku do tangannima, anjaha lapuhonon-Ku do kotoran bani bohinima, ai ma kotoran ni galangannima, anjaha saradon do hanima hunjai.

⁴Jadi botohonnima ma, Ahu do na manongos haputusan on bannima, laho patotapkon padan-Ku na bani halak Levi,” nini Jahowa Zebaot. [10]

⁵“Ia padan na Hubahen ai bani, ai ma padan hagoluhan ampa hadameion, anjaha Hubere do ai bani, ase unduk ia marhabiaran bani goran-Ku. [11]

⁶Titah na sintong do bani pamanganni, anjaha seng jumpah hagedukon bani bibirni, ibagas damei ampa hasintongon do ia marparlahou i lobei-Hu, anjaha buei do halak ipaulak humbani hajahaton. [12]

⁷ Ai maningon ramotkonon ni malim do habotohon, anjaha humbani pamanganni pindahan pangajarion, ai suruhan ni Jahowa Zebaot do ia. [13]

⁸Tapi anggo hanima domma manlembang humbani dalan ai, anjaha buei halak jomba ibahen hanima marhitei pangajarionnima, iparseda hanima do padan na bani halak Levi,” nini Jahowa Zebaot.

⁹“Halani ai do ase hiri anjaha dorun hanima Hubahen i lobei ni ganup bangsa in, halani na so nidalanannima dalan-Kai, tapi martonggor jumbak do hanima bani pangajarion.”

¹⁰Ai lang sada do bapa ni hita on ganup? Ai lang sada do Naibata na manompa hita? Mase ma marsioseian hita samah hita, anjaha ibutaki hita padan na bani ompungta? [14]

¹¹Mosei do halak Juda, anjaha masa do sihagigihononkon i Israel ampa i Jerusalem; ai ibutaki halak Juda do rumah hapansingon ni Jahowa, na hinaholonganni ai, anjaha iompoi do boru ni naibata na legan. [15]

¹²Sai siapkonon ni Jahowa do halak na mangkorjahon na sonai ai, sipangadu ampa sipangapiti, hun lampolampo ni si Jakob, age humbani halak na mamboan galangan bani Jahowa Zebaot.

¹³Anjaha on do na binahennima. Irungkub hanima do anjapanjap ni Jahowa marhitei iluh-iluh, partangison ampa hoih-hoih, halani na so pinardiateihon-Ni ai be galangan ai, anjaha na so rosuh ai be uhur-Ni manjalo ai humbani tangannima. [16]

¹⁴Nini hanima sungkun-sungkun, “Mase sonai?” Halani Jahowa do saksi ni parpadanan na binahenmu ampa naboru bani haposoonmu, na dob nioseimu age pe ia do huanmu ampa parinangonmu mangihutkon padan. [17]

¹⁵Ai lang Naibata na sasada in do manjadihon ampa patotapkon banta tonduy hagoluhan? Anjaha aha do na pinarsinta-Ni? Bonih ni Naibata. Halani ai marjaga-jaga ma hanima ibagas tonduynima, ulang ma adong na mosei humbani naboru hinaholonganni sanggah poso. [18]

¹⁶“Ai Huhagigihon do parsirang-sirangon,” nini Jahowa Naibata ni Israel, “ampa na manrungkubkon hiouni bani hajahaton,” nini Jahowa Zebaot. “Halani ai jaga hanima ma dirinima, anjaha ulang be mosei.” [19]

¹⁷Ilojai nasiam do Jahowa marhitei sahap-sahap nasiam. Tapi nini nasiam, “Marhitei aha ilojai hanami Ia?” Marhitei na mangkatahon, “Sagala sihorjahon hajahaton, dear do uhur ni Jahowa mangidah ai, anjaha rosuh do uhur-Ni bani sidea.” Barang marhitei na manungkun, “Ija do Naibata, sidabuh uhum?” [20]