Read Batak Simalungun MATEUS 11 Bible Online

MATEUS 11 - Batak Simalungun bible

MATEUS 11

¹Ase dob siap ipodahi Tuhan Jesus susian-Ni na sapuluh dua ai, misir ma Ia hunjai, laho mangajari pakon marambilan i huta ni sidea.

²Jadi dob ibogei si Johannes ibagas tutupan pasal pambahenan ni Kristus, isuruh ma na manungkun-Si marhitei susianni,

³“Ham do na sihol roh ia, atap na legan ope sipaimaonnami?” [166]

⁴Nini Jesus ma mambalosi sidea, “Mulak ma, anjaha patugah nasiam ma bani si Johannes, aha na binogei ampa na nididah nasiam:

⁵Gabe marpangidah do na mapitung, mardalan na repat, malum na gadamon, marpanangar na nengel, mulak manggoluh na matei, anjaha bani halak na masombuh iambilankon do Ambilan Na Madear. [167]

⁶Martuah ma halak na so sangsi pasal Ahu.” [168]

⁷Dob mulak sidea, ipungkah Jesus ma mansahapkon pasal si Johannes hubani halak na mabuei ai, “Aha do na sihol idahon nasiam, ase laho nasiam hu halimisan? Arung-arung na meol-eol do ibahen pangombus ni logou? [169]

⁸Aha do na sihol idahon nasiam? Sada halak parhiou na lampot do? Tonggor ma, i rumah ni raja do parhiou na lampot.

⁹Aha do na sihol idahon nasiam? Sihol mangidah nabi? Tongon do na Huhatahon on bani nasiam, lobih do Ia humbani sada nabi. [170]

¹⁰Pasalsi do na tarsurat on, ʻTonggor ma, suruhon-Ku do suruhan-Ku i lobeimu, ase ipasirsir dalan i lobeimu.ʼ [171]

¹¹Sintong do na Huhatahon on bennima, humbani jolma, na itubuhkon humbani naboru, seng dong na bangkit banggalan marimbang si Johannes Pandidi, tapi halak sietekan pe ibagas Harajaon nagori atas, banggalan do ai hun bani. [172]

¹²Hun bani panorang ni si Johannes nari sigogohan do Harajaon nagori atas ai, anjaha halak na manggogohi do na dapotan ai. [173]

¹³Ai singgan si Johannes do panjahaion ni sagala nabi ampa titah;

¹⁴anjaha anggo ijalo nasiam do in, ia do si Elias na sihol roh in. [174]

¹⁵Barang ise siparpinggol, itangar ma in!

¹⁶Tapi hubani ise ma pausihon-Ku bangsa on? Usih do sidea hubani sakdanak na hundul i tiga, mardilo-dilo bani hasomanni,

¹⁷ʻIsompul hanami do sulim bennima tapi seng ra hanima manortor, ipabogeihon hanami do tangis-tangis, tapi seng ra hanima tangis.ʼ [175]

¹⁸Ai roh do si Johannes, seng parmangan, seng parminum, hape ihatahon sidea, ʻNa setanon do ia.ʼ

¹⁹Na roh do Anak ni Jolma in, ra do Ia mangan anjaha ra minum, hape ihatahon sidea, ʻTonggor ma, halak sipapangan magou ampa sisobur anggur, huan-huan ni sijalo sohei ampa pardousa!ʼ Tapi gabe pintor do Hapentaran in marhitei pambahenan-Ni.” [176]

²⁰Dob ai ipapai Jesus ma huta, ianan-Ni sibuenan mangkorjahon hagogohon-Ni ai, halani seng mubah uhur ni sidea, nini ma,

²¹“Bursik ma ho Korasin! Bursik ma ho Betsaida! Ai ambit i huta Tirus pakon Sidon ipamasa hagogohon songon na masa bannima, seng tarbahen lang mubah do uhur ni sidea, marhiou guni anjaha hundul bani abuan. [177]

²²Tapi Huhatahon ma bennima, hampungan do sitaronon ni Tirus ampa Sidon marimbang sitarononnima bani ari paruhuman ai.

²³Anjaha ho, ale Kapernaum, ai sipagijangon do ho ronsi langit? Sidabuhkononkon do ho ronsi apuy naraka. Ai ambit i huta Sodom ipamasa hagogohon songon na masa ibagas ho, seng tarbahen lang totap ope huta ai ronsi sadari on. [178]

²⁴Tapi Huhatahon ma bennima, hampungan do sitaronon ni huta Sodom bani ari uhum ai marimbang sitarononnima!” [179]

²⁵Bani panorang ai ma ihatahon Tuhan Jesus, “Hupuji Ham Bapa, Tuhan sigomgom langit ampa tanoh on, halani iponopkon Ham do in humbani halak na maruhur ampa na pentar, tapi ipatalar Ham do in bani dakdanak. [180]

²⁶Eak, Bapa, ai sonin do rosuh ni uhur-Mu.

²⁷Haganupan in, domma iondoskon Bapa Bangku, seng dong, na mananda Anak in, sobali Bapa in, anjaha Bapa in pe, seng dong na mananda-Si, sobali Anak in, ampa na pinodahan ni Anak in, domu hubani rosuh ni uhur-Ni. [181]

²⁸Roh ma nasiam hu Bangku, nasiam na loja anjaha na boratan, ase Hupasonang nasiam. [182]

²⁹Jalo nasiam ma pasangan-Ku anjaha marguru ma nasiam hun Bangku, ai na lamlam do Ahu anjaha na toruh maruhur, ase dapotan hasonangan tonduy nasiam.

³⁰Ai lamlam do pasangan-Ku, anjaha hampung do na Hupaporsankon.”