Read Batak Simalungun MATEUS 15 Bible Online

MATEUS 15 - Batak Simalungun bible

MATEUS 15

¹Jadi roh ma Parisei pakon sibotoh surat hun Jerusalem marayak Jesus, nini sidea ma,

²“Mase ma ilanggar susian-Mu adat na humbani ompung nalobei? Seng iburihi sidea tanganni laho mangan.” [237]

³Jadi nini Jesus ma mambalosi sidea, “Mase ma ilanggar nasiam titah ni Naibata, halani mardingat adat nasiam ai?

⁴Naibata do mangkatahon, ʻPasangap bapamu pakon inangmu!ʼ ambahni ai, ʻNa mamurai bapani atap inangni, maningon do sipamateion!ʼ [238]

⁵Tapi nasiam mamodahkon, ʻBarang ise na mangkatahon bani bapani atap inangni, na sahira pamberengku bamu, dearan ma nagalangkon ai!ʼ

⁶Halak ai, seng pala be pasangaponni bapani atap inangni. Isedai nasiam do titah ni Naibata halani adat nasiam.

⁷E nasiam sipakulah-kulah! Sintong do panjahaion ni si Jesayas pasal nasiam, na mangkatahon, [239]

⁸ʻIpasangap pamangan ni bangsa on do Ahu, tapi anggo uhur ni sidea daoh do hun Bangku.

⁹Tapi soya do parpasangap ni sidea Bangku, ai podah ni jolma do ipodahkon sidea.ʼ ”

¹⁰Jadi idilo ma halak na mabuei ai, nini ma hubani sidea, “Bogei anjaha parimbagaskon nasiam ma!

¹¹Seng gabe butak jolma halani na masuk humbani pamanganni, tapi na luar humbani pamanganni ai do pabutakkonsi.” [240]

¹²Dob ai iparayak susian-Ni ai ma Ia, nini ma, “Domma ibotoh Ham, na dob marah do Parisei ai mambogei hata ai?”

¹³Tapi nini ma mambalosi, “Siorbaton do sagala suan-suanan, na so sinuan ni Bapa na i nagori atas ai.

¹⁴Paturut hanima ma sidea, pambobai na mapitung do sidea manogu na mapitung. Tapi anggo na mapitung manogu na mapitung, tarrobung ma sidea haduasi.” [241]

¹⁵Nini si Petrus ma mambalosi-Si, “Patorang Ham bennami limbaga ai!”

¹⁶Jadi nini Jesus ma, “Ai seng iarusi hanima ope homa?

¹⁷Ai seng ibotoh hanima, sagala na masuk hubagas pamangan, laho hubagas boltok, dob ai mandarat bani ianan na suhi?

¹⁸Tapi na luar hun pamangan humbagas uhur do ai roh, anjaha ai do na pabutakkon jolma.

¹⁹Ai humbagas uhur do tubuh pingkiran na jahat, pamunuhon, parbangkison, parriah-riahon, panangkoon, hata ladung ampa panreheion. [242]

²⁰Sisonai do na pabutakkon jolma, tapi mangan seng marburih, seng butak jolma halani ai.”

²¹Dob ai misir ma Jesus hunjai, laho hu nagori Tirus pakon Sidon.

²²Jadi roh ma sada boru Kanaan hun nagori ai mardilo-dilo, “Idop ma uhur-Mu bangku, Tuhan, Anak ni si Daud! Parah do iahap borungku, iarsik-arsik setan.”

²³Tapi seng ibalosi, sangkababah hata pe lang. Jadi roh ma susian-Ni ai hu Bani, nini ma, “Palao Ham ma ia, ai sai iirikkon do hita anjaha dilo-dilo.”

²⁴Tapi nini ma mambalosi, “Pitah hubani biribiri na magou humbani ginompar ni halak Israel do Ahu isuruh.” [243]

²⁵Jadi idohori naboru ai ma Ia, isombah ma Ia lanjar ihatahon, “Tuhan, urupi Ham ahu!”

²⁶Tapi nini ma mambalosi, “Seng patut nabuat ruti humbani dakdanak, laho mamberehon ai bani baliang.”

²⁷Balos ni puang-puang ai, “Tongon, Tuhan, tapi ipangan baliang do rimah-rimah na matektek humbani meja ni tuanni.”

²⁸Nini Jesus ma mambalosisi, “Inang, banggal do haporsayaonmu, saud ma songon na pinindomu ai! Jadi jorgit ma boruni ai humbani panorang ai nari.” [244]

²⁹Dob misir hunjai, das ma Jesus hu Tao Galilea, jadi tangkog ma Ia bani sada dolog, lanjar hundul ijai.

³⁰Jadi roh ma buei tumang halak hu Bani mamboan halak na repat, na tempang, na mapitung, na longah ampa buei na legan ope, anjaha iparpatibal ma sidea i lobei ni nahei ni Jesus, gabe ipamalum ma sidea haganup.

³¹Jadi longang ma halak na mabuei ai, halani ididah, marsahap do na longah, malum na martikas, mardalan na repat, anjaha marpangidah na mapitung, gabe ipuji sidea ma Naibata ni Israel. [245]

³²Tapi idilo Jesus ma susian-Ni ai hu lobei-Ni, nini ma, “Maidop do uhur-Hu mangidah na mabuei on, ai adong ma tolu ari sidea rapkon Ahu, anjaha seng dong sipanganon bani sidea, anjaha seng ra Ahu palaohon sidea sonin loheian, ase ulang tompas sidea i tongah dalan.” [246]

³³Jadi nini susian-Ni ai ma hu Bani, “Hunja ma buatonta ruti i halimisan on sungkup pabosur halak na sain bueini?”

³⁴Nini Jesus ma hubani sidea, “Ai adong do piga ruti isimpan hanima?” Jadi nini sidea ma, “Pitu ruti ampa dengke otik.”

³⁵Jadi isuruh ma na mabuei ai hundul bani tanoh,

³⁶ibuat ma ruti na pitu ai ampa dengke ai, anjaha dob ihatahon tarima kasih, ipartopik ma ai, anjaha iberei bani susian-Ni ai, ase susian-Ni ai mamberei halak na mabuei ai.

³⁷Jadi mangan ma sidea haganup ronsi bosur; lanjar ipatumpu sidea ma teba-tebani, gok pitu bantei.

³⁸Ia buei ni na mangan ai, adong do ompat ribu halak dalahi, sobali naboru pakon dakdanak.

³⁹Jadi dob isuruh mulak halak na mabuei ai, naik ma Ia hu parau, anjaha laho ma hu Nagori Magdala.