Read Batak Simalungun MATEUS 25 Bible Online

MATEUS 25 - Batak Simalungun bible

MATEUS 25

¹“Anjaha tarpausih do Harajaon nagori atas ai hubani sapuluh anak boru, na bingkat marsiboan suluhni, laho mangalo-alo siparunjuk.

²Lima humbani sidea na oto do, tapi na lima nari maruhur do. [393]

³Ia na oto ai iboan do namin suluhni, tapi seng mamboan minak sidea.

⁴Tapi anggo na maruhur ai, iboan do minak bani iananni rap pakon suluh ni sidea.

⁵Halani dokah ase roh siparunjuk ai, tartunduh ma sidea haganup lanjar tarpodom.

⁶Tapi tongah borngin, adong ma na dilo-dilo, ʻTonggor ma, siparunjuk in! Roh ma mangalo-alosi!ʼ

⁷Jadi puho ma ganup anak boru ai, anjaha ipasirsir bei ma suluhni.

⁸Nini naboru na oto ai ma bani na maruhur ai, ʻBere nasiam ma deba minak nasiam in, ai na laho miloh ma suluhnami!ʼ

⁹Tapi nini na maruhur ai ma mambalosisi, ʻLang! Seng sungkup holi bannami ampa bani nasiam. Dearan ma boli nasiam bani nasiam humbani panjual minak.ʼ

¹⁰Tapi sanggah na laho ai ope sidea mamboli minak, roh ma siparunjuk ai, jadi masuk ma na dob sirsir ai hinan rap pakonsi hu pesta parunjukan ai, anjaha itutup ma labah ai.

¹¹Salpu ai roh ma naboru na legan ai, nini ma, ʻHam tuan, ham tuan, buha ham ma labah on bennami!ʼ [394]

¹²Tapi nini ma mambalosi, ʻSintong do hatangkkon bennima, seng hutandai hanima!ʼ [395]

¹³Halani ai jaga ma hanima, ai seng ibotoh hanima arini pakon panorangni.” [396]

¹⁴“Usih do homa ai bani sada halak, na laho mardalani hu nagori na legan, gabe idilo ma juakjuakni, laho mangondoskon artani bani sidea. [397]

¹⁵Ibere ma bani na sada lima talenta, bani na sada nari dua, anjaha bani na legan use sada, ganup domu hubani gogohni, dob ai misir ma ia. [398]

¹⁶Mintor do laho sijalo na lima talenta ai, mantiga-tigahon ai, gabe dapotsi ma lima talenta.

¹⁷Sonai homa sijalo na dua talenta ai, dapotsi do dua talenta.

¹⁸Tapi anggo na manjalo na sada talenta ai ihurak ma tanoh, laho mamonopkon duit ni tuanni ai.

¹⁹Dob dokah mulak ma tuan ni juakjuak ai, anjaha ibahen ma parhiraan pakon sidea.

²⁰Jadi roh ma na manjalo silima talenta ai, anjaha ibere ma na lima talenta nari ai, nini ma, ʻTuannami, lima talenta do ipadas ham bangku, tonggor ma, lima talenta nari na husari.ʼ

²¹Nini tuanni ai ma hu bani, ʻDear ma ai, ale juakjuak sidear uhur anjaha hatengeran. Hatengeran ni uhur do ho bani na otik, ondoskononku ma buei hubam. Masuk ma ho hubagas pesta malas ni uhur ni tuanmu!ʼ [399]

²²Dob ai roh ma na manjalo sidua talenta ai, nini ma, ʻTuannami, dua talenta do ipadas ham bangku, tonggor ma, dua talenta nari na husari!ʼ

²³Nini tuanni ai ma hu bani, ʻDear ma ai, ale juakjuak sidear uhur anjaha hatengeran. Hatengeran ni uhur do ho bani na otik, ondoskononkon ma buei hubam. Masuk ma ho hubagas pesta malas ni uhur ni tuanmu!ʼ [400]

²⁴Roh ma homa na manjalo sisada talenta ai, nini ma, ʻTuannami, hubotoh paruhur na koras do ham, na manabi na so sinuanmu anjaha na patumpuhon na so tinidahkonmu.

²⁵Jadi mabiar do ahu, gabe laho ma ahu mamonopkon talentamu ai hubagas tanoh. Nam ma artamu on!ʼ

²⁶Tapi nini tuanni ai ma mambalosisi, ʻE ho juakjuak na jahat anjaha parrayoh! Ibotoh ho do hape, ahu manabi na so sinuanku, anjaha patumpuhon na so tinidahkonku.

²⁷Anggo sonai, ai lang patut ma namin pasimpankononmu duitkon hubani halak sipabungahon duit, ase hujalo in rap pakon bungani bani parrohku?

²⁸Ai pe, buat nasiam ma talenta in, anjaha bere nasiam ma hubani simada na sapuluh ai.

²⁹Ai bereon do bani ganup na marnadong ase marlobih-lobih ia, tapi sibuaton do humbani na so marnadong na adong bani hinan.

³⁰Anjaha usir nasiam ma juakjuak na so margagan in hubani na golap marimpot-impot! Ijai ma masa partangison ampa na patungosngoson.ʼ ” [401]

³¹Tapi anggo roh ma Anak ni Jolma in ibagas hasangapon-Ni rap pakon haganup malekat-Ni, hundulan-Ni ma ijai paratas hasangapon-Ni ai. [402]

³²Dob ai martumpu ma hu lobei-Ni haganup bangsa, jadi sirangon-Ni ma sidea songon pambahen ni parmahan na manirang biribiri boru-boru humbani biribiri tunggal. [403]

³³Jadi pajongjongon-Ni ma boru-boru ai hu siamun-Ni, tapi bajar ai hu sambilou-Ni do. [404]

³⁴Dob ai hatahonon ni Raja ai ma hubani na i siamun-Ni ai, “Roh ma nasiam na pinasu-pasu ni Bapa, jalo nasiam ma harajaon in, na dob pinasirsir bani nasiam humbani mula ni tanoh on!

³⁵Ai na loheian do Ahu, ibere nasiam do Ahu mangan, na horahan do Ahu, ibere nasiam do Ahu minum; na mampar-ampar do Ahu, iarahkon nasiam do Ahu; [405]

³⁶seng marhiou Ahu, gabe iparhioui nasiam do Ahu; na boritan do Ahu, gabe itorih nasiam do Ahu, anjaha na tartutup do Ahu, gabe roh do nasiam marayak Ahu.”

³⁷Dob ai hatahonon ni parpintor ai ma mambalosisi, “Tuhan, nantigan ididah hanami Ham loheian, gabe ibere hanami Ham mangan, barang horahan, gabe ibere hanami Ham minum? [406]

³⁸Nantigan ididah hanami Ham mampar-ampar, gabe ijalo hanami Ham, barang seng marhiou, gabe iparhioui hanami Ham?

³⁹Nantigan ididah hanami Ham boritan barang tartutup, gabe iparayak hanami Ham?”

⁴⁰Dob ai balosan ni Raja ai ma sidea, “Sintong do na Huhatahon on bani nasiam:Haganup na binahen nasiam bani sada halak angging-Ku na etek-etek on, na hu Bangku do in ibahen nasiam.” [407]

⁴¹Dob ai hatahonon-Ni ma bani na i sambilou-Ni ai, “Misir ma nasiam hun Bangku, nasiam na binuraan, hubani apuy sisadokah ni dokahni, na pinasirsir bani sibolis ampa bani malekatni. [408]

⁴²Ai na loheian do Ahu, seng ibere nasiam mangan, na horahan do Ahu, seng ibere nasiam minum.

⁴³Na mampar-ampar do Ahu, seng iarahkon nasiam Ahu, na so marhiou do Ahu, seng iparhioui nasiam; na boritan do Ahu anjaha tartutup, seng itorih nasiam.”

⁴⁴Sidea pe balosan ni sidea ma Ia, nini ma, “Tuhan, nantigan ididah hanami Ham loheian, horahan, mampar-ampar, seng marhiou, boritan anjaha tartutup, hape lang ipatorsa-torsa hanami Ham?”

⁴⁵Dob ai hatahonon-Ni ma mambalosi sidea, “Sintong do na Huhatahon on bani nasiam, na so binahen nasiam age aha bani sada halak na etek-etek on, hu Bangku do na so binahen nasiam ijai.”

⁴⁶Jadi misir ma sidea hubani na maparngit sadokah ni dokahni, tapi halak parpintor ai hu hagoluhan sadokah ni dokahni. [409]