Read Batak Simalungun MARKUS 16 Bible Online

MARKUS 16 - Batak Simalungun bible

MARKUS 16

¹Ase dob salpu ari Sabat ai, iboli si Maria Magdalena pakon si Maria inang ni si Jakobus ampa si Salome ma minak na misbou, laho maminaki Jesus. [196]

²Jadi girah sogod, bani ari parlobei dob Sabat ai, laho ma sidea hu tanoman ai, bani poltak ni mata ni ari.

³Nini sidea ma samah sidea, “Ise ma manggulang batu ai banta hun babah ni tanoman ai?”

⁴Anjaha sanggah na mangkawah sidea, ididah sidea ma na dob igulang batu ai, borat tumang do batu ai.

⁵Imasuki sidea ma tanoman ai, jadi ididah sidea ma sada garama, marpakeian na lopak, hundul hampit siamun, gabe mabiar tumang ma sidea.

⁶Tapi nini ma dompak sidea, “Ulang nasiam mabiar! Ipindahi nasiam do Jesus na hun Nasaret, na dob pinarsilangkon ai. Domma puho Ia, seng ijon be Ia. Tonggor nasiam ge ianan hatibalan-Ni on hinan!

⁷Tapi laho ma nasiam, patugah nasiam ma bani susian-Ni ampa bani si Petrus, ʻLobeian-Ni do nasiam hu Galilea, songon na dob hinatahon-Ni hinan bani nasiam!ʼ ” [197]

⁸Sidea pe luar ma hun tanoman ai, hitir-hitir anjaha tarsonggot. Halani mabiar sidea seng ipatugah sidea ai atap hubani ise pe.

⁹Dob puho Ia girah sogod, bani ari parlobei ni Minggu ai, ipataridahkon ma diri-Ni parlobei hubani si Maria Magdalena, hun bani do iusir ijia pitu setan. [198]

¹⁰Ia pe laho ma patugahkon ai hubani halak na mangkasomani Jesus hinan, na marhoru anjaha tangis ai.

¹¹Tapi dob ibogei sidea, na dob mulak manggoluh Ia anjaha ipataridahkon diri-Ni bani si Maria Magdalena, seng dong porsaya sidea.

¹²Dob ai ipataridahkon ma use diri-Ni ibagas rupa na legan hubani sua halak humbani sidea, sanggah laho sidea hu huta na legan. [199]

¹³Jadi laho ma sidea patugahkon na masa ai bani na legan ai, tapi seng porsaya age sidea.

¹⁴I pudini ai ipataridahkon ma diri-Ni bani na sapuluh sada ai, sanggah na hundul sidea mangan. Ipinsang ma sidea halani hurang porsaya sidea anjaha hengkeng uhur ni sidea, ai seng porsaya sidea bani halak na mangidah-Si, dob puho Ia. [200]

¹⁵Dob ai nini ma hubani sidea, “Laho ma hanima hu sab dunia on, ambilankon hanima ma Ambilan Na Madear in bani sagala na tinompa. [201]

¹⁶ Na porsaya anjaha tardidi dapotan haluahon, tapi na so porsaya hona uhum do! [202]

¹⁷Anjaha on ma tanda na mangihut bani na porsaya: Marhitei goran-Ku usiron ni sidea do sibolis, anjaha marsahap na baru do sidea. [203]

¹⁸Jomputon ni sidea do ulog, anjaha age pe iinum rasun hamatean, seng pala mahua sidea, tampeihonon ni sidea do tanganni bani na boritan gabe malum ma sidea.” [204]

¹⁹Ia Tuhan Jesus, dob marsahap Ia pakon sidea, tarangkat ma hu nagori atas, anjaha hundul ma i siamun ni Naibata. [205]

²⁰Tapi laho ma anggo sidea mangambilankon Ambilan Na Madear in, huja-huja pe. Iurupi Tuhan in do sidea, anjaha ipatotap do ambilan ni sidea ai marhitei tanda na mangihut ai. [206]